Gusisácanu dxiiñaʼ ni runi Jesús, Moisés ni jma risaca
«De lade binni laanu zandisa Dios ti profeta, ne laucaa diaga laabe irá ni gabi be laatu.» (HECH. 3:22)
1. Xi huayuni binni pur cani biʼniʼ Jesús.
RACA chupa mil iza gule ti baʼduhuiiniʼ nabé risaca ne pur nga dede bisisaca stale ángel Jiobá ne binadiaga caadxi pastor laacabe (Luc. 2:8-14). Gudiʼdiʼ caadxi iza biniisi baʼduhuiiniʼ que dede guca ti hombre. Dxi maʼ nápabe 30 iza bizulube dxiiñaʼ stibe ne chonna iza arondaʼ si bindaani, peru ni bíʼnibe que bichaani xquendanabani binni guidxilayú. Sicaríʼ guníʼ Philip Schaff, ti hombre ni bicaa de historia lu siglu XIX de laabe: «Neca laabe qué liica nucaabe gastiʼ peru cani guniʼbe ne cani bíʼnibe bicaa cani stale hombre gucaa xiixa libru, quíxhecaʼ canción, gudiicaʼ xiixa libana ne gúnicaʼ xiixa cuadru». Jesucristu nga hombre ni caninu ca.
2. Xi guníʼ apóstol Juan de Jesús ne de dxiiñaʼ bíʼnibe.
2 Tobi de ca Evangeliu ni riníʼ de historia stiʼ Jesús nga stiʼ Juan, ne ra rilúxeni na sicaríʼ: «Nuu ru stale ni biʼni Jesús, pa nicá cada tobi ni la? rabe nin qué nugaanda guidxilayú nidxá irá guiʼchi ra nicá ni» (Juan 21:25). Zacá ni, apóstol Juan gunna qué zanda guicá guiráʼ ni guníʼ Jesús ne ni bíʼnibe lu guionnaʼ iza arondaʼ que. Neca zacá la? guiráʼ cani bicaabe lu Evangeliu ni biʼniʼ Jesús nabé risaca cani.
3. Ximodo zanda guiene chaahuinu dxiiñaʼ ni chiguni Jesús para gaca ni naguixhe ique Dios.
3 Cadi guidapaʼ si Evangeliu ca nga caníʼ de Jesús, sínuque nuuruʼ xcaadxi libru stiʼ Biblia ni caníʼ de Jesús ni zacané iguidxi fe stinu. Casi ca historia stiʼ ca hombre ni biʼniʼ ni na Jiobá ni bibánicaʼ ante de laabe racanécani laanu guiénenu xii nga dxiiñaʼ ni chiguni Jesús para gaca ni naguixhe ique Dios guni. Yanna guidúʼyanu chupa chonna de ca ejemplu ca.
Ca hombre ni qué nucheené Jiobá dxiqué bisihuínnicaʼ ni chiguni Cristu
4, 5. Tuu nga ca hombre ni bisihuinni ni chiguni Jesús, ne xii nga ni bíʼnicabe.
4 Guidapaʼ Evangeliu ca culuíʼcani laanu bisihuinni Moisés, David ne Salomón ni chiguni Jesús, hombre ni gulí Jiobá ne ni guniʼbe gaca Rey lu Reinu stibe. Yanna, xiñee zanda guchaaganu ca hombre bibani dxiqué ne Cristu yaʼ. Ne xi zanda guizíʼdinu pur ni bíʼnicabe yaʼ.
5 Biblia na guca Moisés ti ni riguixhená, biquiiñeʼ Jiobá laabe para gudiibe xquidxi ca ley stiʼ, ne bilabe guidxi que, ne ngaca nga zanda guininu biʼniʼ Jesús. David guca ti pastor ne guca rey ne stale biaje biʼniʼ ganarbe ca xhenemígube, Jesús laaca naca pastor stiʼ xquidxi Dios ne naca ti rey ni runi ganar ca xhenemigu (Eze. 37:24, 25). Salomón guca ti rey nabé nuu xpiaaniʼ ora bíʼnibe ni na Dios, ne dxi biʼniʼ mandarbe guirutiʼ nucaalú guidxi Israel (1 Rey. 4:25, 29). Peru Jesús jma nuu xpiaaniʼ ne tobi de ca título nápabe nga «Príncipe ni rudii Guendariuudxi» (Isa. 9:6). Pur cani maʼ guninu ca zanda guchaaganu Jesús ca xpinni Dios ni bibani dxiqué, peru jma risaca dxiiñaʼ ni chigúnibe para gaca ni naguixhe ique Dios guni. Yanna, guidúʼyanu xiñee zanda guchaaganu laabe Moisés. Zacá jma zusisácanu dxiiñaʼ ni chiguni Xiiñiʼ Dios.
Moisés, ni bibani ante de Jesús
6. Ximodo bisihuinni Pedru pabiáʼ risaca gucaadiáganu Jesús.
6 Ora nuu apóstol Pedru nezalú stale judíu ni nuu ndaaniʼ yuʼduʼ que bizeetebe ca diidxaʼ ni guníʼ Moisés, ne guniʼbe de Jesús ngue guníʼ Moisés. Ni guninu ca bizaacani lu Pentecostés iza 33 que, dxi bisianda Pedru ne Juan ti hombre ni qué rizá dede dxi gule. Ora biiyaʼ binni maʼ rizá hombre que nabé bidxagayaacaʼ, ne guyecaʼ ra nuu ca apóstol que para gánnacaʼ ximodo bíʼnicabe ni. Óraque gudxi Pedru laacabe gunda bíʼnicabe ni pur espíritu santu stiʼ Jiobá ni bidii Jesucristu laacabe. De raqué guniʼbe caadxi diidxaʼ riguixhená ni cá lu Stiidxaʼ Dios ni gucuá lu diidxaʼ hebreu ra cayeeteʼ tu chigaca Jesús. Ndiʼ nga ca diidxaʼ gúdxibe ca binni que: «Purti na Moisés rabi ca bixhoze gola nu chiqué: “De lade binni laanu zandisa Dios ti profeta, ne laucaa diaga laabe irá ni gabi be laatu”» (Hech. 3:11, 22, 23; biindaʼ Deuteronomio 18:15, 18, 19).
7. Xiñee maca huayunadiaga ca binni que ni gudxi Pedru laacaʼ.
7 Ca binni ni bicaadiaga Pedru que maca huayunadiágacaʼ diidxaʼ riguixhená ni guníʼ Moisés que. Cumu laaca judíu laacabe la? biʼniʼ respetárcabe Moisés ne gulézacabe guedandá ti ni riguixhená jma risaca que Moisés (Deu. 34:10). Zanda guininu casi ñaca Moisés ti mesías, purtiʼ Dios gulí laabe. Peru ni riguixhená ni cabézacabe que qué zácasibe ti mesías, sínuque laapebe nga Mesías, «Cristu ni ulí Dios» (Luc. 23:35; Heb. 11:26).
Caadxi cosa ni rusihuinni zanda guchaaganu Jesús ne Moisés
8. Gunáʼ nga caadxi cosa ni rusihuinni zanda guchaaganu Jesús ne Moisés.
8 Nuu stale cosa ni rusihuinni bibani Jesús cásica bibani Moisés. Casi dxi guca Moisés baʼduhuiiniʼ la? gucalaʼdxiʼ ti rey malu ñuuti laabe, zaqueca bizaaca Jesús dxi guca baʼduhuiiniʼ (Éxo. 1:22–2:10; Mat. 2:7-14). Ne guirópacabe guníʼ Dios guireecabe de guidxi Egipto. Oseas, ni riguixhená que bicaa ca diidxaʼ ni guníʼ Jiobá riʼ: «Ora guca Israel hombrehuiiniʼ la? gunaxhiee laa, ne de Egipto bicaa ridxeʼ xiiñeʼ» (Ose. 11:1). Jiobá guníʼ ca diidxaʼ riʼ dxi biquiiñebe Moisés, ni gulibe que, para guleebe guidxi Israel de Egipto, ni zeeda gaca casi xiiñibe (Éxo. 4:22, 23; 12:29-37). Zacá nga bihuinni xi chigaca despué: José bireené María ne Jesús de guidxi Egipto guti si rey Herodes (Mat. 2:15, 19-23).
9. 1) Xii nga ca milagru biʼniʼ Moisés ne Jesús. 2) Xi xcaadxi cosa rusihuinni biʼniʼ Jesús cásica biʼniʼ Moisés. (Biiyaʼ cuadru ni láʼ «Xcaadxi cosa ni rusihuinni zanda guchaaganu Moisés ne Jesús», lu yaza 26.)
9 Cásica biʼniʼ Moisés milagru la? Jesús laaca biʼniʼ milagru, nga rusihuinni gucané Jiobá laacabe. Biblia na Moisés nga primé hombre ni biʼniʼ milagru lu Guidxilayú riʼ (Éxo. 4:1-9). Tobi de ca milagru biʼniʼ Moisés ne poder stiʼ Jiobá nga dxi bíʼnibe guiiguʼ Nilo que rini ne zaqueca xcaadxi lugar ra gupa Faraón nisa. Laaca bíʼnibe nisadóʼ Xiñáʼ que chupa ndaa ne guleebe nisa lu ti guié ngola lu desiertu que (Éxo. 7:19-21; 14:21; 17:5-7). Zacagá nga ca milagru biʼniʼ Jesús, lu primé milagru stibe bíʼnibe nisa que vinu lu ti guendaxheelaʼ (Juan 2:1-11). Laaca bicueezabe nisadóʼ de Galilea que ne dede guzabe lu nisa (Mat. 8:23-27; 14:23-25). Lu cuadru ni zeeda lu sti yaza ca zadúʼyanu xcaadxi cosa ni rusihuinni zanda guchaaganu Moisés ne Jesús, Laabe nga Moisés ni jma risaca.
Jesús, ni riguixhená que
10. 1) Xi dxiiñaʼ biʼniʼ cani riguixhená que. 2) Xiñee zanda guininu guca Moisés ti ni riguixhená.
10 Stale binni riníʼ ique dxiiñaʼ si ni gupa cani riguixhená que nga guiniʼcaʼ xiixa ni chigaca, peru ngue nga tobi de ca dxiiñaʼ bíʼnicabe. Ca binni ni dxandíʼ riguixhená que Jiobá gudxi laacaʼ xi guiniʼcaʼ ne guniʼcaʼ «irá enda nandxóʼ ni biʼni Dios» (Hech. 2:11, 16, 17). Laacabe qué niníʼsicabe xi chigaca, sínuque laaca guníʼcabe ni naguixhe ique Jiobá guni ne guníʼcabe zanabaʼ Dios cuenta binni. Nga nga ni biʼniʼ Moisés, casi ti riguixhená. Laabe guniʼbe guiráʼ plaga ni bininá guidxi Egipto. Bidiibe Ley stiʼ pactu que ca israelita lu dani Sinaí ne bisiidibe laacaʼ ximodo gúnicaʼ ni na Dios. Peru beeda sti ni riguixhená jma risaca que Moisés.
11. Xiñee zanda guininu guca Jesús ti ni riguixhená jma risaca que Moisés.
11 Lu primé siglu ante de ca dxi stiʼ Jesús que beeda gaca Zacarías, bixhoze Juan ni Riguunisa, casi ti ni riguixhená purtiʼ guniʼbe xi naguixhe ique Dios guni xiiñibe (Luc. 1:76). Ne Juan ni Riguunisa guníʼ zeeda ti ni riguixhená ni guníʼ Moisés gueeda que: laabe nga Jesucristu (Juan 1:23-36). Jesús laaca guca ti ni riguixhená purtiʼ guniʼbe stale cosa ni chigaca. Casi dxi guniʼbe zadxiña dxi gátibe, ne guniʼbe paraa ne ximodo gátibe ne tuu nga chiguuti laabe (Mat. 20:17-19). Laaca guniʼbe zanitilú Jerusalén ne yuʼduʼ stiʼ, gadxé si gúcani para ca binni que ora binadiágacaʼ ni guniʼbe que (Mar. 13:1, 2). Caadxi de ca diidxaʼ riguixhená guniʼbe que cayaca ni na cani ca dxi stinu riʼ (Mat. 24:3-41).
12. 1) Ximodo bizulú Jesús bicheeche diidxaʼ ni cayaca lu guidubi naca Guidxilayú. 2) Ximodo zanda chinándanu ejemplu stiʼ Jesús.
12 Cadi guníʼ si Jesús cani chigaca, sínuque laaca bicheechebe diidxaʼ ne gúcabe ti maestru. Ne guirútiruʼ tu huaníʼ de ca diidxaʼ nacubi ne galán stiʼ Reinu stiʼ Dios ne stale guendanadxibalú casi bíʼnibe ni (Luc. 4:16-21, 43). Laaca qué zanda guchaaganu modo bisiidibe ne modo rusiidiʼ stobi. Ne dede guníʼ binni de laabe sicaríʼ: «Qué huayuu dxi chuʼ tuuxa iníʼ casi riníʼ hombre que» (Juan 7:46). Bicheechebe ca diidxaʼ nacubi ne galán stiʼ Reinu ne stale gana ne pur nga dede ne ca discípulo stibe bicheeche diidxaʼ casi bíʼnibe. Ne zacá nga bizulú bireeche diidxaʼ ne bisiidicabe de Dios, ne dede yanna cayácani lu guidubi naca Guidxilayú (Mat. 28:18-20; Hech. 5:42). Casi iza gudiʼdiʼ ca jma de gadxe millón de ca xpinni Cristu biquiiñecaʼ 1,500 millón de hora para bicheechecaʼ diidxaʼ ne bisiidicaʼ binni ni cá lu Biblia. Ñee de guidubi ladxidoʼloʼ rúniluʼ dxiiñaʼ ca la?
13. Xi zacané laanu gatananu.
13 Rihuinni dxíchica gundisaʼ Jiobá «ti profeta» ni beeda gaca casi Moisés que. Xi rucaa nga lii guiníʼ íqueluʼ yaʼ. Ñee cadi racané nga lii guni creluʼ zaca xcaadxi diidxaʼ riguixhená ni maʼ guníʼ Dios la? Zacá ni. Pa guiníʼ íquenu guiráʼ ni biʼniʼ Moisés ni jma risaca ca la? zacané nga laanu gatananu, gácanu binni nuu xpiaaniʼ ne zabézanu xcaadxi cosa ni na Dios chiguni (1 Tes. 5:2, 6).
Biquiiñeʼ Jiobá Cristu para biʼniʼ ti pactu ne xquidxi
14. Xi para biquiiñeʼ Jiobá Moisés.
14 Cásica Moisés ne zaqueca Jesús biquiiñeʼ Jiobá laacabe para guiníʼcabe pur laa nezalú binni. Jiobá biquiiñeʼ Moisés para bíʼninebe ca israelita que ti pactu stiʼ Ley. Pa laacabe gúnicabe ni na ca ley stibe que zeeda gácacabe xquídxibe ni nabé risaca (Éxo. 19:3-8). Pactu stiʼ Ley ca guyuu ni dede iza 1513 ante de ca dxi stiʼ Jesús hasta lu primé siglu despué de ca dxi stiʼ Jesús.
15. Xiñee zanda guininu jma risaca dxiiñaʼ ni biʼniʼ Jesús que Moisés.
15 Lu iza 33 despué de ca dxi stiʼ Jesús biʼniʼ Jiobá ti pactu ne ti guidxi cubi, «Israel stiʼ Dios», ni beeda gaca xquidxi Dios (Gál. 6:16, NM). Lu pactu ni biʼniné Jiobá ca israelita, ora biquiiñebe Moisés que, zeeda ca ley stibe ni bicaabe lu ca guié que. Peru pactu cubi ni biʼniʼ Jiobá, ora biquiiñebe Jesús que, jma risácani purtiʼ bicaabe ca ley stini ndaaniʼ ladxidóʼ binni (biindaʼ 1 Timoteo 2:5 ne Hebreos 8:10). Yanna, «Israel stiʼ Dios» ca nga guidxi ni jma risaca stibe, purtiʼ maʼ nácacabe ti Reinu ra cayuni mandar Cristu (Mat. 21:43). Neca «Israel stiʼ Dios» que nga biʼniné Jiobá pactu cubi que la? laaca racaneni stáleruʼ binni, dede millón binni ni maʼ guti zacaacaʼ stale ndaayaʼ pur pactu ni nabé risaca ca.
Jesús, ni rulá laanu
16. 1) Ximodo biquiiñeʼ Jiobá Moisés para bilá xquidxi. 2) Casi na Éxodo 14:13, tuu nga culá ca xpinni Dios.
16 Últimu gueelaʼ guyuu guidxi Israel Egipto guyé ti ángel ndaaniʼ guidxi que para guuti guiráʼ ca baʼduʼ lugola ni nuu raqué, ngue runi dede ne ca xiiñiʼ ca israelita que zándaca gueeda gáticaʼ. Pur ngue biquiiñeʼ Jiobá Moisés para gabi guidxi Israel zalá xiiñicaʼ pa guneʼcaʼ rini stiʼ dendxuʼ huiiniʼ ni gócabe lu Pascua que ruaa puertaʼ lídxicabe (Éxo. 12:1-13, 21-23). Ca israelita que bíʼnicaʼ ni gudxi Moisés laacaʼ ne zaqué bilá xiiñicaʼ. Despué de biree ca israelita que de Egipto ruluíʼ maʼ qué gápacabe paneza chécabe purtiʼ neza zécabe que nuu nisadóʼ Xiñáʼ ne neza déchecabe nanda ca soldadu stiʼ Egipto que laacabe. Óraque biquiiñeʼ Jiobá Moisés sti biaje para guxheleʼ nisadóʼ Xiñáʼ ne zaqué bilá ca israelita (Éxo. 14:13, 21).
17, 18. Xiñee zanda guininu Jesús nga binni ni jma risaca ni rulá que Moisés.
17 Neca nabé naroʼbaʼ milagru ngue biʼniʼ Jiobá para bilá ca israelita que la? qué zanda guchaaganu ni ne ni bíʼnibe ora bidiibe Xiiñibe para gulá guiráʼ binni guidxilayú. Jesús nga ni biquiiñeʼ Dios para gutiidilaʼdxiʼ stonda cani guzuubaʼ stiidxaʼ (Rom. 5:12, 18). Ne zacá nga bilabe laanu para cadi chuʼ dxi gátinu (Heb. 9:11, 12). Ne lapeʼ Jesús ca riniʼni «Jiobá nga ni Rulá binni». Cristu nga Ni Rulá laanu, ne cadi ruxhiásibe stóndanu pur cani ni bíninu dxiqué, sínuque laaca pur ni bíʼnibe ca zanda guibáninu jma galán despué. Ra gulee Jesús laanu de lu naʼ guendaruchee la? bilabe laanu para cadi gusabanáʼ Dios laanu ne racaneni laanu chuʼnu gaxha de Dios (Mat. 1:21).
18 Ora maʼ gulee Jesús laanu de lu naʼ donda ni bisaanané Adán laanu ca la? maʼ qué zaca huaranu ne maʼ qué zátinu. Para guxuíʼlunu xi zuni sentirnu ora guedandá dxi guni Dios nga la? guiníʼ íquenu ni bizaaca ora guyé Jesús ralidxi ti hombre láʼ Jairo, hombre ca casi guti ti dxaapahuiiniʼ stiʼ ni napa doce iza. Jesús gudxi Jairo: «Cadi idxibi luʼ. Bini cre, ne [zabani] xiiñi luʼ» (Luc. 8:41, 42, 49, 50). Ne bisibani Jesús dxaapahuiiniʼ que casi guniʼbe que. Ñee ruxuíʼluluʼ pabiáʼ biecheʼ bixhózebe ne jñaabe la? Yanna, bixuiʼlú pabiáʼ nayecheʼ zuni sentirnu ora guidúʼyanu gunadiaga «irá cani nuu ndaani baʼ» stidxi Jesús ne guibánicaʼ sti biaje (Juan 5:28, 29). Rihuinni dxíchica Jesús nga ni rulá laanu (biindaʼ Hechos 5:31; Tito 1:4; Apo. 7:10).
19, 20. 1) Xi ribeendunu ora guiníʼ íquenu dxiiñaʼ ni cayuni Jesús, Moisés ni jma risaca ca. 2) Xi chiguieeteʼ lu sti tema ca.
19 Laanu zanda gacanenu binni gulá Jesús laacaʼ; nga runi rucheechenu diidxaʼ ne rusíʼdinu laacabe de Dios (Isa. 61:1-3). Guiníʼ íquenu dxiiñaʼ ni cayuni Jesús, Moisés ni jma risaca para gaca ni naguixhe ique Dios guni; zacá jma zuni crenu zulabe laanu ora gunitilube guidxilayú malu riʼ (Mat. 25:31-34, 41, 46; Apo. 7:9, 14).
20 Jma naroʼbaʼ cani biʼniʼ Jesús, ne Moisés qué ñanda diʼ ñuni cani; nga runi, Jesús nga Moisés ni jma risaca. Pur ca diidxaʼ riguixhená ni guníʼ Jesús ne zaqueca pur dxiiñaʼ ni bíʼnibe ora biquiiñeʼ Dios laabe que zacaa binni stale ndaayaʼ, zalacaʼ ne zabánicaʼ sin gáticaʼ. Peru, nuu xcaadxi xpinni Dios de dxiqué ni zanda gusiidicaʼ laanu stale cosa de Jesús. Sti tema ca zusiene xiñee zanda guininu Jesús nga David ni jma risaca ne Salomón ni jma risaca.
Ñee zanda gusiéneluʼ ni la?
Xiñee zanda guininu Jesús nga...
• ... ti ni riguixhená jma risaca que Moisés.
• ... tobi ni riquiiñeʼ Dios ni jma risaca que Moisés.
• ... tobi ni rulá jma risaca que Moisés.
[Cuadro ne dibuju/foto ni zeeda lu yaza 26]
XCAADXI COSA NI RUSIHUINNI ZANDA GUCHAAGANU Moisés ne Jesús
◻ Bisaanacabe dxiiñaʼ risaca stícabe para gúnicabe ni na Jiobá ne gacanécabe xquidxi (2 Cor. 8:9; Fili. 2:5-8; Heb. 11:24-26)
◻ Gúcacabe «cristu» purtiʼ gulí Jiobá laacabe (Mar. 14:61, 62; Juan 4:25, 26; Heb. 11:26)
◻ Guníʼcabe Jiobá biseendaʼ laacabe (Éxo. 3:13-16; Juan 5:43; 17:4, 6, 26)
◻ Gúcacabe binni nadóʼ (Núm. 12:3; Mat. 11:28-30)
◻ Biquiiñeʼ Jiobá laacabe para biyaanaʼ stale binni (Éxo. 16:12; Juan 6:48-51)
◻ Gúcacabe juez ne gudíxhecabe ley para binni (Éxo. 18:13; Mal. 4:4; Juan 5:22, 23; 15:10)
◻ Gúpacabe lidxi Dios (Núm. 12:7; Heb. 3:2-6)
◻ Gúcacabe testigu stiʼ Jiobá ni qué nusaana de ñuni ni jneza (Heb. 11:24-29; 12:1, NM; Rev. 1:5, NM)
◻ Qué niná Jiobá nidxela binni xcuérpucabe gutisícabe (Deu. 34:5, 6; Luc. 24:1-3; Hech. 2:31; 1 Cor. 15:50; Jud. 9)