Cani bisiidiʼ Jesús

Dxi «iluxe guidxilayú»

Xi «guidxilayú» nga chiguiluxe yaʼ

Ti biaje gunabadiidxaʼ ca discípulo stiʼ Jesús laa sicaríʼ: «Xi seña ihuinni dxi mayaca gueedu ne iluxe guidx[i]layú riʼ» (Mateo 24:3). Ora bicabi Jesús laacabe qué niníʼ diʼ zanitilú Guidxilayú ra nabáninu riʼ. Laabe maca bizeetebe zanitilú guidxilayú malu ni nuu lu náʼ Binidxabaʼ, laani nga guiráʼ ca políticu, ca binni ni cadi jneza runi negocio ne ca religión ni cadi dxandíʼ (Mateo 13:22, 40, 49). Ngue runi ora guniʼbe: «Dxi que ru nga iluxe guidxilayú riʼ» la? caniʼbe zanitilú guiráʼ cosa malu ni cayaca ndaaniʼ ni (Mateo 24:14).

Ximodo chigácani

Jesús bidii cuenta galán nga gánnanu zanitilú guiráʼ cosa malu ni cayaca yanna, ngue runi guniʼbe: «Ne zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ». Ne sicaríʼ guniʼbe chigácani: «Nabé naná zaca ni ca dxi que. Qué huayuu dxi gaca ni naná biaʼ qué, dede dxi bizáʼ Dios guidxilayú, ne ma qué ziuu ru dxi aca ni sti tiru. Pa qué ucueeza dxí Dios lú ni la? irá xixé binni zati» (Mateo 24:14, 21, 22).

Ñee ziuu tu zalá la?

Ca binni si ni cadi nadxii Jiobá ne Jesús ne qué ruzuubacaʼ stiidxaʼ Dios nga cani zanitilú. Cristu guníʼ: «Ne dxi ibigueta Hombre Biseenda Dios la? zaca ni casi dxi bibani Noé. Purti [...] ante gaca fisiu que la? [...] caʼru guiene ca xi chi gaca dede ora beeda nisa que, ziné irá caʼ» (Mateo 24:36-39). Jesús guníʼ nuu stale binni lu neza xilaga ni ziné lu guendaguti, peru laaca bizeetebe de ti neza nabéʼ ni ziné lu «enda nabani» (Mateo 7:13, 14).

Padxí gácani

Ora gunabadiidxacabe Jesús xi guiráʼ cosa nga zahuinni ora mayaca gueeda ne dxi «iluxe guidx[i]layú riʼ» la? laa bicabi: «Purti zucaa lú ti gobiernu sti gobiernu ne zucaa lú ti guidxi sti guidxi, [...] zaca gubiña ne xu [...]. Ne ora ma bidale enda ruchee ndaani guidxilayú la? casi irá binni zusaana de ganaxhii saa» (Mateo 24:3-12). Nga runi, galán nga gánnanu mayaca guiree guiráʼ ca cosa malu cayaca yanna riʼ, ne maʼ chigueedané Dios ti gobiernu ni zacané ca binni ni ruzuubaʼ diidxaʼ guibánicaʼ nayecheʼ. Jesús guníʼ: «Ora guʼya tu gaca irá nga, ma nanna tu ma bidxiña dxi guni mandar Dios» (Lucas 21:31).

Xi naquiiñeʼ gúninu para guilanu

Dios «bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16). Peru para guni crenu o gápanu fe Dios ne Xiiñiʼ la? caquiiñeʼ gunibiáʼ chaahuinu laacabe. Nga runi guníʼ Jesús: «Ne zacaa cabe enda nabani ca ra gunibiáʼ cabe lii ne ra gunibiáʼ cabe Jesucristu ni biseenda luʼ. Lii nga tobi lucha Dios ni dxandíʼ» (Juan 17:3).

Nga runi, cadi naquiiñeʼ gudiʼnu lugar gucueeza ca guendanagana ca laanu de guizíʼdinu de Dios ne gusihuínninu dxandíʼ nadxiinu laabe. Jesús guníʼ: «Laguuya gá laatu cadi [...] nisi icá ique tu ni ricá ique binni ni qué runibiáʼ Dios. Pacaa zaguidxi ladxidóʼ to, ne nin ganna tu mala zanaaze dxi que laatu. Purti ziaba ni luguiá irá binni». Pa gúninu ni na ca diidxaʼ ca zanda guilanu «de irá ni chi gaca» (Lucas 21:34-36).

Pa riuuláʼdxiluʼ gánnaluʼ jma de laani la? biiyaʼ capítulo 9 stiʼ libru Xipeʼ ndiʼ cusiidiʼ Biblia,a ra na «Ñee nabáninu lu ca “últimu dxi” la?».

[Ni cá ñee yaza]