Ximodo zanda gatadxí ladxidoʼno ndaaniʼ guidxilayú ra nuu stale guendanagana riʼ
CA DXI stinu riʼ huaxiéʼ si binni nga nabani nayecheʼ. Stale de laacabe nabézacabe lugar ra nabé raca guerra, ra nabé ridinde binni pur política, ra runinácabe binni de sti raza ne ra nuu stale terrorista. Xcaadxi lugar cadi nabani binni nayecheʼ purtiʼ nabé nuu gubaanaʼ, nuu stale tu rucaalú stobi, nabé ridinde binni ne cani runiné dxiiñaʼ o ne ca vecinu stiʼ. Peru cadi ngasi, ndaaniʼ stale familia lugar de nuyúbicaʼ ximodo ñuucaʼ nayecheʼ, nisi maʼ cadíndecaʼ guidubi dxi.
Pur guiráʼ ca cosa ca, stale tu cuyubi ximodo gatadxí ladxidóʼ, nga runi riuucaʼ ndaaniʼ ti religión, riécabe lade xiixa grupu para guiníʼ íquecabe o rúnicabe yoga. Xcaadxi na ziuu nayecheʼ pa cheʼ de vacación ne chigaze ra cadá nisa dxaa o chizacaʼ sti lugar. Peru neca rúnicabe guiráʼ nga rudiicabe cuenta qué rindaa diʼ guendanayecheʼ stícabe.
Yanna, tu laa zanda quixhedxí ladxidoʼno yaʼ. Biblia na Jiobá Dios nga zanda gúnini, purtiʼ laabe nga Dios ni «riguixhe dxí ladxidóʼ binni» (Romanos 15:33). Ne laaca cuzeeteni maʼ cadi candaa zabáninu nayecheʼ ora maʼ guni mandar Reinu stiʼ Dios lu Guidxilayú riʼ (Salmo 72:7; Mateo 6:9, 10). Cadi chupa chonna gubidxa si nga zabani binni zacá, casi raca ora runi ca gobiernu ca ti pactu para cadi tíndecaʼ. Zabee Jiobá Dios guiráʼ ni nuu ndaaniʼ ladxidóʼ binni ni rucaa laa tinde, nga runi qué zará guendariuudxi ni chigudii Jiobá binni. Guirútiruʼ qué ziuu dxi tinde lu sti guerra (Salmo 46:8, 9). ¡Oracaruʼ nga zabáninu nayecheʼ!
Guizáʼ riéchenu nga gánnanu xi chiguni Dios, peru, ñee cadi laaca ñuuláʼdxinu ñatadxí ladxidoʼno yanna la? Ñee zanda gatadxí ladxidoʼno ca dxi nagana riʼ la? Biblia na zanda. Lu carta ni gucuaa ra nuu ca Filipenses, capítulo 4, versículo 4 dede 13, cayabi laanu xi zanda quixhedxí ladxidoʼno. Cayuni invitardu lii gúʼndaluʼ lu Biblia stiluʼ ca diidxaʼ bicaa apóstol Pablu riʼ.
Riguixhedxí Dios ladxidóʼ binni
Lu versículo 7 ca ridúʼndanu sicaríʼ: «Zaguixhe dxí [Dios] ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu, purti nuu né tu Cristu Jesús tobi si». Cumu Dios si nga runi ni la? nga runi qué zanda diʼ quixhedxí binni ladxidóʼ pur cani guni laasi, casi guiníʼ ique o guchaa modo laa. Laaca riguixhedxí ni xquendabiaaninu. Ora riguixhedxí Dios ladxidoʼno maʼ qué ridxíbinu ne maʼ qué riuʼnu xizaa pur ni guizaacanu, purtiʼ stale biaje cadi naróʼbapeʼ ca guendanagana nápanu casi modo riníʼ íquenu o cadi jneza modo rúʼyanu xiixa cosa. Dede ora nabé nagana rúʼyanu ca cosa ca, zaguixhedxí Jiobá ladxidoʼno purtiʼ runi crenu ni maʼ guniʼbe lu Biblia chigúnibe, maʼ cadi candaa zabeebe guirá guendanagana nápanu.
Nánnanu Dios si nga zanda quixhedxí ladxidoʼno, purtiʼ «gasti ni nagana para [laabe]» (Marcos 10:27). Pa nápanu fe ne guni crenu de guidubi ladxidoʼno zanda gacanebe laanu la? qué ziúʼpenu xizaa. Quíxhenu ejemplu stiʼ ti xcuidihuiiniʼ ni biniti ndaaniʼ ti tienda roʼ. Cumu nánnabe zuyubi jñaabe laabe ne zaguiidxi laabe ora guidxela laabe la? nga runi qué riuupebe xizaa, ne nánnabe ziuucabe tobi si sti biaje. Zacaca nga laanu, qué ziúʼdinu xizaa purtiʼ nánnanu nadxii Jiobá laanu ne zapa laanu.
Stale xpinni Cristu riguixhedxí Dios ladxidoʼcaʼ dede ora huayápacaʼ guendanagana naroʼbaʼ. Zacá nga bizaacaʼ ti gunaa ni gudiʼdiʼ xiiñiʼ láʼ Nadine. Laabe guniʼbe: «Raca nagana para naa guinieeʼ xi runeʼ sentir, ne rusihuinneʼ casi ora gastiʼ qué ñaca. Peru qué gánnacabe pabiáʼ nga naná para naa guti xiiñeʼ. Guiráʼ dxi rinieniáʼ Jiobá de guidubi ladxiduáʼ ne rinabaʼ laabe gacanebe naa. Ora riníʼ iqueʼ maʼ qué zándaruʼ guneʼ huantar, ruuyaʼ modo ricábibe naa, ne riguixhedxí nga ladxiduáʼ».
Rapa Dios ladxidoʼno ne xquendabiaaninu
Guidúʼndanu xiná Filipenses 4:7 sti biaje. Racá na zaguixhedxí Dios ladxidoʼno ne xquendabiaaninu. Modo riguixhedxí Dios ladxidoʼno zeeda gácani casi tuuxa ni cayapa laanu, ti cadi chúʼpenu xizaa pur gápanu stale cosa risaca ni cadi caquiiñenu. Guidúʼyanu ti ejemplu.
Ca dxi stinu riʼ stale binni ruyubi gapa bueltu, purtiʼ riníʼ íquecaʼ zacá zabánicaʼ nayecheʼ. Nga runi, stale de laacaʼ riquiiñecaʼ ti ndaa bueltu nápacaʼ para guzulucaʼ ti negocio. Ñee jma nayecheʼ riuucabe ora gúnicabe ni la? Cadi guiráʼ diʼ biaje, purtiʼ stale de laacabe jma riuucabe xizaa ora quiba lu ca cosa ca ne ora huaxiéʼ gutoocabe. Neca qué riníʼ Biblia malu nga iquiiñenu xpuéltunu para gúninu ti negocio, peru caguixhenani laanu sicaríʼ: «Tuuxa ni riuulaʼdxiʼ gapa plata la? qué zadxá neca gapa stale plata, ne tuuxa ni riuulaʼdxiʼ gapa stale cosa risaca la? laaca qué zadxá neca ñapa jma. Laaca qué risaca nga. Nanixe nga rasi binni runi dxiiñaʼ, gastiʼ naca pa huaxiéʼ ni gó o pa stale; peru ti binni ricu qué randa rasi pur guiráʼ ni napa» (Eclesiastés 5:10, 12).
Filipenses 4:7 na zaguixhedxí Dios ladxidoʼno pur «Cristu Jesús». Ximodo zanda quixhedxí Dios ladxidoʼno pur Cristu yaʼ. Risaca nga dxiiñaʼ cayuni Jesús para gaca cani maʼ gudixhe ique Dios guni. Gútibe pur laanu para guixá donda stinu ne cadi gátinu (Juan 3:16). Ne yanna maʼ nácabe Rey lu Reinu stiʼ Dios. Ora guiénenu cani maʼ bizéʼtenu ca nga ratadxí ladxidoʼno ne riuudxí xquendabiaaninu. Ximodo raca nga yaʼ.
Riéchenu nga gánnanu guti Jesús pur guiranu, ne pur nga zanda guinábanu Dios gutiidilaʼdxiʼ ca donda stinu pa maʼ guca arrepentirnu de guidubi ladxidoʼno (Hechos 3:19). Cumu nánnanu dede ora maʼ guni mandar Jesús ndaaniʼ Guidxilayú riʼ nga zabáninu jma nayecheʼ la? cadi nabáninu casi stale binni ni ricá ique gapa guiráʼ ni chuulaʼdxiʼ (1 Timoteo 6:19). Neca nánnanu guiráʼ nga záparunu guendanagana, peru ratadxí ladxidoʼno purtiʼ nánnanu mayaca guiree cani.
Ximodo zanda quixhedxí Dios ladxidoʼno
Lu Filipenses 4:4, 5, Biblia cayabi laanu ximodo zanda ugaandanu ni: «Laguieche irá dxi purti xpinni Señor laatu. Ne sti tiru rabe laatu, laguiecheʼ. Lagaca nachaʼhui dede izaabi stiidxa tu. Ma zeda dxiña dxi gueeda Señor». Pablu bicaa ca diidxaʼ riʼ dxi biseguyoocabe laa Roma neca qué gapa donda (Filipenses 1:13). Lugar de ñuube triste pur ni cadíʼdibe laga guluube gana ca xpinni Cristu ne guniʼbe: «Laguieche irá dxi purti xpinni Señor laatu», ne nánnanu zaqueca nga guyuube. Zacá bisihuínnibe guyuube nayecheʼ purtiʼ nuube gaxha de Dios, neca cadíʼdibe lu guendanagana. Ngaca nga laanu, intiica guendanagana gápanu zanda chuʼnu nayecheʼ ra gúninu xhiiñaʼ Dios. Ximodo yaʼ. Ra gúninu stipa pur gunibiáʼ chaahuinu Jiobá ne gúninu ni na. Zacá zabáninu nayecheʼ ne zatadxí ladxidoʼno.
Laaca gudxi Pablu ca xpinni Cristu gácacaʼ nachaʼhuiʼ. Nga rusihuinni cadi galán diʼ guicá íquenu gúninu jma de ni qué zanda gúninu. Riquiiñeʼ guietenaláʼdxinu binni ruchee laanu ne qué zanda gúninu guiráʼ cosa jneza. Nga runi, cadi galán gúninu stale cosa dede cuee xcaandanu purtiʼ si racaláʼdxinu gácanu tuuxa ni risaca. Laaca qué zabézanu cadi liica guchee ca binni ridxaaganu, ne qué zadxiichinu ora chuʼ tu gucheené laanu. Diidxaʼ «nachaʼhuiʼ» ca lu griegu riniʼni «gudii binni lugar gabi stobi laa xi zanda guni». Pa gácanu binni riuu razón ne guicaanu stiidxaʼ sti binni dede ora chigúninu xiixa cosa stinu la? qué zadindenenu guirutiʼ, zatadxí ladxidoʼno ne zacanenu binni.
Ra ziluxe versículo 5 ca na sicaríʼ: «Ma zeda dxiña dxi gueeda Señor». Zándaca ruluíʼ huaxiéʼ ridxaaga ca diidxaʼ ca ne ni caninu, peru cadi zacá diʼ ni. Primé la? cayábini laanu mayaca guedandá dxi gunitilú Dios guidxilayú malu riʼ ne gueedanebe Reinu stibe lu Guidxilayú. Ne guiropa la? riéchenu gánnanu nuu Dios gaxha de guiráʼ cani guyubi laa (Hechos 17:27; Santiago 4:8). Pa chinándanu conseju stiʼ Pablu riʼ zacaneni laanu chuʼnu nayecheʼ ne gácanu binni riuu razón. Ne casi na versículo 6, qué ziúʼpenu xizaa pur ca guendanagana nápanu yanna ne pur ca cosa ni chiguizaaca.
Ora ridúʼndanu ca versículo 6 ne 7 ca rudiʼnu cuenta riguixhedxí Dios ladxidoʼno ora runi orarnu laa. Stale binni na runi orar para si gatadxí ladxidóʼ. Peru Biblia na runi orarnu para guinínenu Dios. Zeeda gácani casi ora riniʼné ti baʼduhuiiniʼ bixhoze, purtiʼ rabi laabe guiráʼ ni rusiecheʼ laa ne ni riguu laa triste. ¡Ratadxí ladxidoʼno gánnanu zanda gábinu Jiobá guiráʼ ni caquiiñenu! Nga runi, zanda gábinu laabe guiráʼ ni nuu ndaaniʼ ladxidoʼno.
Versículo 8 ca racané laanu guiníʼ íquenu lu ca cosa risaca. Peru cadi ngasi, versículo 9 na naquiiñeʼ gúninu ni na ca conseju rudii Biblia. Zacá zatadxí ladxidoʼno purtiʼ qué zuchiiñaʼ xquendabiaaninu laanu.
Guiranu zanda quixhedxí Jiobá ladxidoʼno, pa guyúbinu laabe ne gúninu ni nabe. Peru primeru naquiiñeʼ gunibiaʼnu laabe, ne zanda gúninu ni ora guidúʼndanu Stiidxabe. Ne neca nuu tiru zácani nagana para laanu la? rusisaca Dios guiráʼ stipa gúninu. Pa gúninu zacá «zaguixhedxí Dios» ladxidoʼno (Filipenses 4:9).
[Ni caníʼ yaza 10]
«Zaguixhe dxí [Dios] ladxidóʼ [no].»
[Ni caníʼ yaza 12]
¡Nabé ratadxí ladxidoʼno purtiʼ nánnanu zanda gábinu Dios guiráʼ ni caquiiñenu!