Bidxiña Dios
Nabé rusisaca Jiobá ca binni nadóʼ ne cani qué rudxiibaʼ laca laa
STALE de ca binni ni ricá ique gaca tuuxa ndaaniʼ guidxilayú riʼ qué ridxacaʼ ne ni nápacaʼ, ruyúbicaʼ modo gácacaʼ primé ne rudxiibacaʼ laca laacaʼ. Peru, ñee zanda guidxíñanu Jiobá Dios pa gácanu zacá la? Coʼ, purtiʼ ribézabe gaca ca binni ni runi adorar laabe nadóʼ ne nachaʼhuiʼ. Guidúʼyanu ximodo rihuinni zacá ni lu capítulo 12 stiʼ Números. Historia ca bizaaca ni lu desiertu stiʼ Sinaí, cadi xadxí de biree guidxi Israel de Egipto.
Relatu ca na bizulú Míriam ne Aarón caniʼcaʼ mal de Moisés, bizáʼnacabe ne bíʼchicabe ni jma nahuiiniʼ (versículo 1). Biblia cadi cuzeeteʼ diʼ guniʼnécabe Moisés, sínuque guníʼcabe mal de Moisés lade ca binni guidxi que. Zándaca Míriam nga bizulú ni, purtiʼ laa nga ruzeeteʼ Biblia primé. Ruluíʼ bizulú guniʼbe mal de Moisés purtiʼ bichaganáʼ ti gunaa cusita. Ñee cadxiichi Míriam pur ngue la? Ñee cadxíbibe gueeda gaca gunaa de sti guidxi que tuuxa jma risaca que laabe la?
Laaca guyuu xcaadxi razón pur laani, purtiʼ Míriam ne Aarón guniʼcaʼ: «Ñee Moisés si nga riniʼné Jiobá la? Ñee cadi laaca riníʼnebe laadu la?» (versículo 2). Pur ca diidxaʼ riʼ rudiʼnu cuenta rápacabe gana guni mandárcabe ne guʼyaʼ guidxi que laacabe casi tuuxa ni risaca.
Moisés biʼniʼ huantar guiráʼ ni caníʼcabe que sin nidxiichi, nga rusihuinni jneza ruzeeteʼ Biblia «gúcabe jma nadóʼ lade guiráʼ ca hombre ni guyuu lu guidxilayú» (versículo 3).a Moisés qué niníʼ diʼ laa ngue riquiiñeʼ Dios para guiniʼné laacabe, purtiʼ cucaadiaga Jiobá guiráʼ ni caníʼcabe que ne laabe guni chaahuibe ni cayaca que.
Dios biiyaʼ casi ora laa ngue cayábicabe guiráʼ ni caníʼcabe que. Ne nánnacabe Jiobá ngue bisaana Moisés para guiníʼ pur laa. Ngue runi, ora gudindenebe laacaʼ bisietenaláʼdxibe laacaʼ ximodo riníʼnebe Moisés: «Naapiaʼ nga rinieniáʼ laabe». Óraque gunabadiidxabe laacaʼ: «Xiñee qué nidxíbitu [...] ora guniʼtu mal de Moisés pue» (versículo 8). Ngue runi, ora caníʼcabe mal de Moisés que la? de Dios ngue caníʼcabe. Bidxiichi Dios pur qué ñuni respetárcabe laa ne bisabanáʼ laacabe.
Guca huará Míriam de lepra, purtiʼ ruluíʼ laa ngue bizulú guníʼ. Oraqueca gunabaʼ Aarón Moisés biʼchiʼ guiniʼné Dios para guiaandaʼ Míriam. Bixuiʼlú si nga, yanna maʼ lu náʼ Moisés nuu pa guianda Míriam, hombre ni gúdxicabe guiráʼ ca diidxaʼ que. Xi bíʼnibe yaʼ. Raríʼ nga primé biaje cuzeeteʼ relatu ca xi biʼniʼ Moisés, ra bisihuínnibe pabiáʼ nadoʼbe, qué rudxiibabe laca laabe ne qué ridxiichibe nagueenda, gunábabe Jiobá gusianda Míriam. Neca bianda Míriam, guca feu para laa ora gulee ca binni que laa gadxe gubidxa de ndaaniʼ guidxi que.
Historia riʼ rusihuinni xii nga ca guenda ni riuulaʼdxiʼ Jiobá gapa binni, ne gunáʼ nga cani qué riuuláʼdxibe. Pa racaláʼdxinu chuʼnu gaxha de laabe la? qué riquiiñeʼ diʼ guyúbinu modo gácanu primé, cadi gudxíʼbanu laca laanu ne cadi guicá íquenu gusisaca binni laanu. Bietenalaʼdxiʼ, rusisaca Jiobá ca binni nadóʼ ne cani qué rudxiibaʼ laca laa. Ne maʼ guniʼbe xi nuu para laacaʼ: «Cani nadóʼ zacaacabe guidxilayú, ne zadxélacabe guendanayecheʼ purtiʼ ziuu stale guendariuudxi» (Salmo 37:11; Santiago 4:6).
[Cani cá ñee yaza]
a Ti binni nadóʼ la? cadi nga diʼ nga tuuxa ni ridxibi, sínuque tuuxa ni nanna guni huantar ora gúnicabe laa xiixa ni cadi jneza ne qué riníʼ ique guquixe ni gúnicabe laa.