Ñee nannuʼ ni la?

Xi guca ne guiña stiʼ pactu que

Para ca israelita beeda gaca guiña que casi ti seña ni bisihuinni nuu Dios ra nuucabe (Éxodo 25:22). Guiña riʼ guca ni de yaga ne bichéndacabe ni oro, ndaaniʼ ni guyuu guiropaʼ guié ra gucuá ca ley ni bidii Dios Moisés. Dxi guleza ca israelita que lu desiertu gúpacaʼ ni ndaaniʼ tobi de ca cuartu stiʼ tabernáculo que, lugar ni biree lá Santísimo (Éxodo 26:33). Peru despué guluucabe guiña que ndaaniʼ Santísimo ni guyuu ndaaniʼ yuʼduʼ bicuí Salomón (1 Reyes 6:19).

Últimu biaje rieeteʼ de guiña riʼ nga lu 2 Crónicas 35:3, dxi biʼniʼ mandar rey Josías guibiguetaʼ ni ndaaniʼ yuʼduʼ que lu iza 642 ante gueeda Jesús. Peru, xiñee guleecabe ni yaʼ. Zándaca Manasés, tobi de ca rey ni bidxiideche Dios, ni gurí ante de Josías que nga gulee ni ndaaniʼ yuʼduʼ. Ruluíʼ si gulee rey que ni para guluu ti bidóʼ stiʼ ca binni ni qué runi adorar Dios. O zándaca guleecabe guiña riʼ para cadi gácani gastiʼ dxi biʼniʼ mandar Josías gaca chaahuiʼ yuʼduʼ que (2 Crónicas 33:1, 2, 7; 34:1, 8-11). Biblia qué ruzeeteʼ diʼ xi guca ne guiña que despué. Ne cadi liica zeedani lade ca cosa ni gucuaa ca babilonio ndaaniʼ yuʼduʼ dxi binitilucaʼ Jerusalén lu iza 607 ante gueeda Jesús (2 Reyes 25:13-17).

Maʼ qué ruzeeteʼ diʼ Biblia pa bidxiguétacabe guiña que ndaaniʼ Santísimo stiʼ yuʼduʼ que ora biʼniʼ mandar Zorobabel gaca chaahuiʼ ni, ne laaca qué rieeteʼ diʼ pa bíʼnicabe stobi lugar stini (Esdras 1:7-11).

Tuu nga ca binni ni rieeteʼ lu Biblia lacaʼ Jacobo

Cumu tapa binni nga ruzeeteʼ Biblia lacaʼ zacá la? zándaca gaca nagana gánnanu tupeʼ nga laacabe.a Tobi de laacabe nga bixhoze apóstol Judas, ne maʼ qué rieeteruʼ gastiʼ de hombre ca (cadi laadibe nga Judas Iscariote) (Lucas 6:16; Hechos 1:13).

Laaca nuu apóstol Jacobo, xiiñiʼ Zebedeu ne biʼchiʼ apóstol Juan (Mateo 10:2). Zándaca Salomé nga jñaabe, benda María jñaa Jesús (zanda gúʼndaluʼ Mateo 27:55, 56 ne Marcos 15:40, 41 ne Juan 19:25). Pa zacá ni la? laaca xprimu Jesús nga Jacobo cuzéʼtenu riʼ. Laabe ne bíʼchibe biʼninécabe Pedru ne Andrés guuzeʼ benda (Marcos 1:16-19; Lucas 5:7-10).

Laaca nuu sti apóstol lá Jacobo, xiiñiʼ Alfeu (Marcos 3:16-18). Lu Marcos 15:40 rieeteʼ labe casi «Jacobo huiini», ne zándaca gúdxicabe ni laabe purtiʼ nachúcube o purtiʼ jma nahuiinibe que sti apóstol lá Jacobo que.

Últimu rieeteʼ de ti biʼchiʼ Jesús neza jñaa, xiiñiʼ José ne María (Marcos 6:3; Gálatas 1:19). Jacobo riʼ qué ñaca diʼ xpinni Cristu dxi bicheeche Jesús diidxaʼ (Mateo 12:46-50; Juan 7:5). Peru lu Pentecostés stiʼ iza 33 despué de Jesús que, na Biblia cayuni orárnebe jñaabe ne ca bíʼchibe ne ca apóstol lu guiropa pisu stiʼ ti yoo nuu Jerusalén (Hechos 1:13, 14). Despué beeda gácabe tobi de ca hombre ni jma biʼniʼ dxiiñaʼ lade ca binni ridagulisaa ni guyuu Jerusalén ne bicaabe ti libru zeeda lu Biblia ni biree lá Santiagu (Hechos 12:17; Santiago 1:1).

[Cani cá ñee yaza]