Ni runi cré binni 2: Raca castigar binni malu ndaaniʼ ti infiernu
Ximodo biasastí ni. «Lade guiráʼ ni bisiidiʼ ca filósofo griegu ni guyuu dxiqué, cani bisiidiʼ Platón que nga cani jma bicaa binni guni cré nuu ti infiernu.» (Historia de los infiernos, ni bicaa Georges Minois, yaza 64.)
«Gudiʼdiʼ si cincuenta iza stiʼ siglu II d.J., caadxi de ca xpinni Cristu ni nanna de filosofía stiʼ ca griegu que, guníʼ íquecaʼ zanda iquiiñecaʼ ni rusiidiʼ ca filósofo que para gusiénecaʼ ni runi crecaʼ [...]. Filosofía ni jma guyuuláʼdxicabe nga ni bisiidiʼ Platón.» (The New Encyclopædia Britannica, 1988.)
«Yuʼduʼ (Religión católica) rusiidiʼ nuu ti infiernu ni qué zanitilú. Alma stiʼ ca binni ni cucheené ley stiʼ Dios, neca nánnacaʼ cadi jneza ni cayúnicaʼ la? cásipeʼ gáticaʼ maca zecaʼ infiernu. Ne raca castigárcabe ndaaniʼ infiernu, “ra cacá guí dxi ne gueelaʼ” [...]. Castigu ni jma naroʼbaʼ nuu ndaaniʼ infiernu nga chuʼ binni zitu de Dios.» (Catecismo de la Iglesia Católica, guionna edición, yaza 242.)
Xi rusiidiʼ Biblia. «Cani nabani nánnacaʼ záticaʼ; peru cani maʼ guti la? laacabe qué liica gánnacabe gastiʼ, [...] purtiʼ gastiʼ dxiiñaʼ, nin guendariníʼ ique, nin guendananna, nin guendanuuxpiaaniʼ, ndaaniʼ Seol ra cheluʼ ca.» (Eclesiastés 9:5, 10.)
Seol ca nga ti diidxaʼ hebreu ne riniʼni «ra nuu ca gueʼtuʼ ca», ne nuu Biblia rutiixhi diidxaʼ riʼ casi «infiernu». Xi rusiidiʼ textu riʼ laanu de modo nuu ca gueʼtuʼ ca yaʼ. Ñee cayacanácabe ndaaniʼ Seol para quíxecabe guiráʼ pecadu stícabe la? Coʼ, purtiʼ versículo riʼ na «qué liica gánnacabe gastiʼ». Nga runi, qué runi sentir diʼ ca gueʼtuʼ ca gastiʼ ne qué racanácabe. Nga racané laanu guiénenu xiñee gunabaʼ Job gapa Dios laabe «ndaaniʼ infiernu» dxi cayuniná ti guendahuará malu laabe (Job 14:13, Biblia Americana San Jerónimo). Ñee ninábabe ñebe ndaaniʼ infiernu pa ñácani ti lugar ra cayaca castigar ca alma ca dxi ne gueelaʼ la? Coʼ xa. Ora maʼ caníʼ Biblia de infiernu (o Seol) la? caniʼni de ra rigaachiʼ guiráʼ binni ora maʼ guti, zeeda gácani casi ti lugar ra qué zanda gúnicabe gastiʼ.
Jneza nga guiénenu diidxaʼ infiernu ca modo maʼ bizéʼtenu ca, purtiʼ zacá rusiene Stiidxaʼ Dios ni. Yanna, pa nadxii Dios binni, xi pecadu jma naroʼbaʼ ndiʼ ñuni tuuxa para guni castigar Dios laa gayuaa de iza yaʼ (1 Juan 4:8). Yanna, pa cadi dxandíʼ nga nuu ti infiernu ra cayaca castigar binni, ñee rié binni guibáʼ ora gati la?
Biindaʼ ca versículo riʼ: Salmo 146:3, 4; Hechos 2:25-27; Romanos 6:7, 23.
NI DXANDÍʼ:
Qué runi castigar Dios binni ndaaniʼ ti infiernu.
[Paraa gucuaacabe dibuju o foto ni zeeda lu yaza 5]
Barrators—Giampolo/The Doré Illustrations For Danteʼs Divine Comedy/Dover Publications Inc.