Ni runi cré binni 4: Naca Dios ti Trinidad

Ximodo biasastí ni. «Zándaca ni runi crécabe casi Trinidad ca, gudixhe binni ni ra maʼ ziluxe siglu IV. Ne zanda guininu zacá nga gúcani [...]. Ni runi cré stale binni ora riníʼ nuu “chonna Binni, peru ti Dios si” la? bizulú biʼniʼ crécabe ni ra maʼ ziluxe siglu IV. Ca xpinni Cristu ni bibani ante de siglu ca, qué ñuni crédicaʼ Trinidad, nga runi qué ñuni adorarcaʼ ni.» (New Catholic Encyclopedia, 1967.)

«Lu Concilio de Nicea ni guca 20 stiʼ mayo iza 325 que la? Constantino nga bizulú guníʼ lu junta que ne laca laa nga gudixhe pora guiníʼ cada tobi de cani nuu raqué. Laca laabe nga guniʼbe [...] “tobi si nga Dios ne Xiiñiʼ”, ne ni guniʼbe ca nga biquiiñeʼ para gusiidicabe tobi si nga Cristu ne Dios, ne zaqué nga gudíxhecabe guni cré binni ni. [...] Cumu bidxibi ca obispo nuu raqué emperador que la? biʼniʼ firmarcaʼ ni guniʼbe que, neca stale de laacaʼ qué ñuuláʼdxicaʼ ni, chupa si de cani nuu raqué nga qué niná ñuni firmar ni.» (Encyclopædia Britannica, 1970.)

Xi rusiidiʼ Biblia. «Dxá ladxidóʼ Esteban de Espíritu Santu biiya dxí ibáʼ. Biiya enda nandxóʼ sti Dios ne biiya zuhuaa Jesús cueʼ Dios. Para na: Cayuuya zuxele ibáʼ ne zuhuaa Hombre Biseenda Dios cueʼ Dios.» (Hechos 7:55, 56.)

Racá ridúʼyanu bidxá ladxidóʼ Esteban de espíritu santu stiʼ Dios, o stipa stiʼ Dios, ne biiyabe «zuhuaa Jesús cueʼ Dios». Xi rusiidiʼ nga laanu yaʼ. Rusiidini laanu qué ñaca diʼ Jesús Dios despué de biasa lade gueʼtuʼ ne ora bibiguetaʼ guibáʼ; laabe nácabe ti espíritu gadxé de Bixhózebe. Relatu ca cadi caníʼ diʼ nuu sti binni aparte de Jesús cueʼ Dios. Maʼ xadxí nga de racalaʼdxiʼ stale binni guidxela caadxi versículo lu Biblia para gusihuinni naca Dios ti Trinidad; neca zacá, sicaríʼ guníʼ ti sacerdote: «Gastiʼ nin ti textu lu Stiidxaʼ Dios ni gucuá lu diidxaʼ griegu ni cuzeeteʼ chonna binni nga Dios» (À lʼaube du christianisme: la naissance des dogmes [Dxi bizulú guyuu ca xpinni Cristu: ra biasastí ni runi crécabe], ni bicaa Marie-Émile Boismard).

Gudixhe Constantino guni cré ca binni ni bibani lu siglu IV que naca Dios ti Trinidad para gusaana de tíndecaʼ pur cani runi crecaʼ. Peru, dxi maʼ guníʼcabe zacá ni la? bicaani binni guiníʼ ique sti cosa: Ñee «Jñaa Dios» nga María, gunaa ni guca jñaa Jesús que la?

Biindaʼ ca versículo riʼ: Mateo 26:39; Juan 14:28; 1 Corintios 15:27, 28; Colosenses 1:15, 16.

NI DXANDÍʼ:

Ra ziluxe siglu IV que nga gudíxhecabe guni cré binni naca Dios ti Trinidad.

[Paraa gucuaacabe dibuju o foto ni zeeda lu yaza 7]

Museu Bardini (Florencia)