Diidxaʼ galán ni cabiʼxhiʼ lu 500 diidxaʼ
DXI gudindesaa ca binni de guidxi Ruanda, gupa xidé bixooñeʼ ti grupu huiiniʼ de binni ni runi traducir de guidxi que, ne guyecaʼ ti lugar ra zanda guilacaʼ. Ora bixooñecabe de lugar que bisaanacabe guiráʼ ni nápacabe. Peru gunda bireenécabe ca computadora portátil stícabe. Xiñee zinécabe ca computadora que yaʼ. Purtiʼ ne laacani nga zándaruʼ gutiixhicabe ca libru ne revista ni rusiene de Biblia lu diidxaʼ Kiniaruanda.
Ti baʼdudxaapaʼ ni nabeza ndaaniʼ ti guidxi ni nuu ladu gueteʼ stiʼ Asia, cayuni dxiiñaʼ lu computadora stiʼ neca guizáʼ maʼ huaxhinni ngue. Cumu maʼ bidxágabe, nandáʼ raqué ne guiráʼ ora cayé biaaniʼ la? nanene cayúnibe dxiiñaʼ stibe. Peru, neca zaqué, cadi cayaanadxibe. Xiñee yaʼ. Para ganda guilúxebe dxiiñaʼ stibe ti ganda gaca imprimir cani dxi nexheʼ gaca cani.
Ca binni ni maʼ bizéʼtenu ca nuucabe lade ti grupu de biaʼ 2,300 binni ni nabé runi dxiiñaʼ sin guiaxa, ne cayúnicabe dxiiñaʼ ca lu 190 guidxi nuu lu guidubi naca Guidxilayú. Ca hombre ne ca gunaa riʼ nápacaʼ dede 20 hasta 90 iza. Cumu nabé riguixhedxí ca diidxaʼ zeeda lu Biblia ca ladxidóʼ stale binni la? nga runi cayúnicabe dxiiñaʼ riʼ ne stale gana, para ganda guʼndaʼ binni ca guiʼchiʼ ca lu 500 diidxaʼ (Apocalipsis 7:9).
Binni ni riníʼ gadxé gadxé diidxaʼ
Lu ca últimu iza ni maʼ gudiʼdiʼ ca, jma maʼ stale guiʼchiʼ nga cayuni traducir ca testigu stiʼ Jiobá. Para lu iza 1985 que, revista Torre stiʼ ni rapa rireeni lu 23 diidxaʼ, maʼ stale diidxaʼ ngue para iza que. Yanna riʼ maʼ rireeni lu 176 diidxaʼ, zacá randa ruundaʼ binni laaca revista queca lu guidubi naca Guidxilayú.
Lade guiráʼ ca diidxaʼ riʼ, biaʼ lu cincuenta si de laacani nga riree revista Torre stiʼ ni rapa gatigá. Xiñee yaʼ. Purtiʼ stale de ca empresa ni rutoo libru, huaxiéʼ runi ganarcaʼ ora gúnicaʼ xiixa lu ca diidxaʼ ca. Peru cadi zacá diʼ runi ca testigu stiʼ Jiobá. Laacabe racaláʼdxicabe guʼndaʼ guiráʼ binni ni nuu lu guidubi Guidxilayú Stiidxaʼ Dios. Bueltu ni rudiicabe biaʼ náʼ ladxidóʼcabe riquiiñeʼ cani para gaca libru ne revista ni cusiene ni cá lu Biblia, ne rindácani ra nuu guiráʼ binni ni racalaʼdxiʼ guiziidiʼ (2 Corintios 8:14).
Peru, ñee huabeendúcabe xiixa ne guiráʼ dxiiñaʼ ni cayúnicabe riʼ la? Huabeendúcabe pue. Guizáʼ riecheʼ binni guiziidiʼ ni cá lu Biblia lu diidxaʼ gulené, zacá rusihuinni ejemplu riʼ ni. Cadi xadxí diʼ de gucuaa ti gunaa Libru stinneʼ de ca historia stiʼ Biblia lu diidxaʼ mískito,a diidxaʼ riʼ riníʼ 200,000 binni de Nicaragua ni, ne cadi xadxí de bizulú caree libru ne revista lu diidxaʼ ca. Ra nuu gunaa riʼ nuu ti pastor stiʼ ti yuʼduʼ, laa gucalaʼdxiʼ ñaanané libru que. Peru qué niná diʼ gunaa que nudiini laabe ¡neca guníʼ pastor que zudii laabe 20 kilu de biidxiʼ café pur laani!
Lu ca últimu chii iza ni maʼ gudiʼdiʼ ca, maʼ guca traducir stale guiʼchiʼ ni cusiene de Biblia lu jma de quince diidxaʼ ni riníʼcabe Méjicu, casi maya, náhuatl ne tsotsil. Pur nga maʼ bidale ca neza binni ridagulisaa lu ca diidxaʼ ca ne lu diidxaʼ seña guidxi riʼ. Dxiqué guyuu 72, yanna maʼ nuu 1,200. Rihuínnicaʼ Dios nga cayacané ca Testigu stiʼ para ganda chindá ca diidxaʼ riʼ ndaaniʼ ladxidóʼ guiráʼ binni (1 Corintios 3:5-7).
Ti Biblia ni nuu lu 80 diidxaʼ
Ca dxi stinu riʼ, ca Testigu runi imprimircaʼ guidubi o ti ndaa si de Traducción del Nuevo Mundo de las Santas Escrituras, lu 80 diidxaʼ. Xi riníʼ binni de dxiiñaʼ ni cayaca riʼ yaʼ. Sicaríʼ guníʼ ti Testigu de Sudáfrica de Biblia ni biree lu diidxaʼ tsuana: «¡Guizáʼ riquiiñeʼ ni! Cumu cadi neni diidxaʼ nagana la? nabé riuuladxeʼ guundaʼ ni. Nannaʼ dxiicheʼ jma zacaneni naa para gannaxhieeʼ Stiidxaʼ Dios». Ti hombre de Mozambique bicaa: «Gúpadu xcaadxi guiʼchiʼ lu diidxaʼ tsonga, peru caquiiñedu ti Biblia. Cumu qué gápadu Biblia la? beeda gácani para laadu casi ora nixidxi si rayu ne niree biaaniʼ, peru qué ñaba nisaguié. Yanna, ne Traducción del Nuevo Mundo riʼ, casi ora maʼ ñaba nisaguié cabézadu que».
Cani cutiixhi ca diidxaʼ galán ni zeeda lu Biblia ne cani cusiidicani binni, cayúnicaʼ ni na caadxi diidxaʼ ni maʼ xadxí de gucuá. Jesús peʼ nga guníʼ ca diidxaʼ riʼ: «Zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ» (Mateo 24:14).
[Ni cá ñee yaza]
a Ni biʼniʼ ca testigu stiʼ Jiobá.
[Gráfica ni zeeda lu yaza 15]
TRADUCCIÓN DEL XCAADXI NUEVO MUNDO GUIʼCHIʼ
Guidubi ni o ti ndaa si
80 2010 500 2010
36 2000
13 1990 200 1990
190 1980
7 1970 165 1970
125 1960
1 1950 88 1950
PANDA DIIDXAʼ
[Dibuju/foto ni zeeda lu yaza 15]
Nuu biaʼ 2,300 binni ni rutiixhi libru ne revista lu 500 diidxaʼ sin guiáxacaʼ
BENÍN
ESLOVENIA
ETIOPÍA
GRAN BRETAÑA