Laatu ca hombre, laguni ni na espíritu santu ne laguyubi ximodo gacanetu
«Tu uyubi ni na Espíritu Santu la? zudii Espíritu Santu laa enda nabani ni qué zaluxe.» (GÁL. 6:8)
1, 2. Ximodo cayaca ni na ca diidxaʼ ni zeeda lu Mateo 9:37, 38, ne xi caquiiñeʼ ndaaniʼ ca neza binni ridagulisaa ca.
NABÁNINU lu ti tiempu ra cayaca ti dxiiñaʼ ni qué ziuu dxi guiaandaʼ. Ne Jesús maca guníʼ zácani, sicaríʼ guniʼbe: «Ma stale binni cabeza si ucaa diaga stiidxa Dios. Tu güi ni nga huaxiéʼ. Yanna lainaba lu Dios useenda stale tu guni dxiiña ca, ti laabe nga xpixuaana ni» (Mat. 9:37, 38). Ca dxi riʼ, cacabi Jiobá ca oración stinu casi qué huayuu dxi gúnibe ni. Lu iza dxiiñaʼ 2009 guyuu 2,031 neza binni ridagulisaa, ne laacani rizaa 105,298 lu guidubi naca Guidxilayú. Ne guiráʼ dxi riuunisa biaʼ 757 binni.
2 Cumu cadale ca xpinni Dios la? caquiiñeruʼ jma hombre ni nanna gapa ne gusiidiʼ ca dendxuʼ stibe (Efe. 4:11). Ra zidiʼdiʼ ca iza ca, Jiobá maʼ bidii caadxi dxiiñaʼ ca hombre ni zanda guni ni para gudii ni caquiiñeʼ ca dendxuʼ ca, ne nánnanu qué zusaanabe de guyúbibe tu gapa laacaʼ. Miqueas 5:5 na lu ca últimu dxi riʼ ziuu «gadxe pastor» ne «xhono xaíque» ndaaniʼ xquidxi Dios, o qué ziaadxaʼ hombre ni napa ca guenda ni caquiiñeʼ para sanírucaʼ ndaaniʼ xquidxi Dios.
3. Ximodo nga rusihuinni binni nabani modo ruluíʼ espíritu santu stiʼ Dios laa.
3 Ñee nácaluʼ ti hombre ni maʼ guyuunisa la? Pa zacá ni, xi zanda gacané lii para chuuláʼdxiluʼ gápaluʼ jma dxiiñaʼ ndaaniʼ xquidxi Jiobá. Ni zacané lii nga guibániluʼ modo guluíʼ espíritu santu stiʼ Dios lii (Gál. 6:8). Hombre ni maʼ guyuunisa ca cadi naquiiñeʼ «uyubi guni ni na ique», ne para cadi gúnibe nga naquiiñeʼ gucaanabe ca luju ni rapa binni yanna ne cani riuulaʼdxiʼ binni quite o guʼyaʼ ti gúnibe biaʼ gándatiʼ lu xhiiñaʼ Jiobá. Nécapeʼ guiráʼ ca xpinni Cristu nga naquiiñeʼ guni ni na espíritu ca, peru ca hombre nga jma naquiiñeʼ gúnicaʼ stipa pur gúnicaʼ ni na ni ne zacá zanda gúnicabe xcaadxi dxiiñaʼ ndaaniʼ xquidxi Dios. Cumu caquiiñeʼ chuʼ jma siervu ministerial ne binnigola ndaaniʼ xquidxi Dios la? tema riʼ gucuani para ca hombre. Nga runi, bicheʼ, rinábadu lii guʼndaʼ chaahuiluʼ tema riʼ ne guni orarluʼ ora gúʼndaluʼ ni.
Bisihuinni nápaluʼ gana gúniluʼ ti dxiiñaʼ galán
4, 5. 1) Xi dxiiñaʼ naquiiñeʼ quixhe ique ca hombre ni maʼ guyuunisa ca ugaandacaʼ. 2) Ximodo rusihuinni tuuxa racalaʼdxiʼ guicaa xiixa dxiiñaʼ ndaaniʼ xquidxi Dios.
4 Nin ti hombre qué zanda gaca ti binnigola sin qué guni dxiiñaʼ para ugaanda ni. Naquiiñeʼ gúnibe stipa pur ugaandabe dxiiñaʼ galán ca (1 Tim. 3:1). Ne laaca naquiiñeʼ guizaaláʼdxibe gacanebe ca xpinni Cristu (biindaʼ Isaías 32:1, 2). Cadi guyúbibe xiixa para laasibe, sínuque gacanebe ca binni ridagulisaa de guidubi ladxidoʼbe.
5 Tu napa gana gaca binnigola lade ca binni ridagulisaa o siervu ministerial la? naquiiñeʼ guni cani rinabaʼ Biblia para guicaa dxiiñaʼ ca (1 Tim. 3:1-10, 12, 13; Tito 1:5-9). Guiráʼ hombre ni maʼ guyuunisa naquiiñeʼ guinabadiidxaʼ laca laa: «Ñee qué rusaanaʼ de gucheecheʼ diidxaʼ ne de gacaniáʼ xcaadxi xpinni Cristu guni zacaca la? Ñee rizaaladxeʼ pur chuʼ xcaadxi binni galán ne ruyubeʼ uguaaʼ gana laacabe la? Ñee runibiáʼcabe naa casi ti binni ni ruundaʼ Stiidxaʼ Dios la? Ñee runeʼ stipa pur guicabeʼ jma jneza ra ridagulisaanu la? Ñee runeʼ ca dxiiñaʼ ni gudii ca binnigola naa ne stale gana la?» (2 Tim. 4:5). Dxandipeʼ nga caquiiñeʼ guiníʼ ique guiráʼ hombre cani gunabadiidxanu ca.
6. Xi caquiiñeʼ guni ca hombre para guicaacaʼ jma dxiiñaʼ ndaaniʼ xquidxi Dios.
6 Xi sti cosa zacané ca xpinni Cristu para ganda gúnicaʼ xiixa dxiiñaʼ lade ca binni ridagulisaa yaʼ. Pablu guníʼ: «Qué gapa enda nandxóʼ [stiʼ Dios] paraa iluxe, ne rinaba laabe udii Espíritu [santu] laatu de lú ni» (Efe. 3:16). Guirutiʼ naquiiñeʼ guiníʼ ique gaca siervu ministerial o binnigola para cuícabe laa gapa ti puestu jma risaca, sínuque naquiiñeʼ gúʼyabe ni casi ti dxiiñaʼ ni zanda ugaanda ca binni ni caniisi lu stiidxaʼ Dios. Yanna, xi naquiiñeʼ guni ca hombre ca para guiniisi fe sticaʼ yaʼ. Cadi gusaana de sacaʼ «modo rusiidi Espíritu Santu» ne gápacaʼ ca guenda stini (Gál. 5:16, 22, 23). Ora gusihuínnicabe ca guenda ni caquiiñeʼ ne chinándacabe ca conseju ni guicaacabe zacaneni guʼyaʼ binni «ze dxi ziyene[cabe] jma» (1 Tim. 4:15).
Laguni guiráʼ ni rinabaʼ Jiobá laatu neca gácani nagana
7. Xi guiráʼ naquiiñeʼ guni binni para gacané ca xpinni Cristu.
7 Stale dxiiñaʼ nga riquiiñeʼ para gacanenu ca xpinni Cristu, nga runi, ca hombre ni naca binnigola lade ca binni ridagulisaa naquiiñeʼ gúnicaʼ guiráʼ ni rinabaʼ Jiobá laacaʼ neca gácani nagana. Cumu dxandíʼ rapa ca binnigola ca xpinni Cristu la? riuucabe xizaa pur ca guendanagana rápacaʼ. Xi biʼniʼ sentir apóstol Pablu ora yeganna ca xpinni Cristu para uguu gana laacabe yaʼ. Guidúʼyanu xi gúdxibe ca xpinni Cristu de Corinto: «Nabé nagana uca ni para naa, dede ucaná ladxiduáʼ ne biete nisa lua ora cucaa guiʼchi que lú tu, peru bine ni, cadi para gune naʼya laatu, sínuque para ganna tu pabiáʼ nadxiee laatu» (2 Cor. 2:4). Rihuinni dxíchica de guidubi ladxidóʼ Pablu biʼniʼ xhiiñaʼ.
8, 9. Bizeeteʼ lá chupa chonna binni ni biʼniʼ stipa para gucané ca xpinni Dios de dxiqué.
8 Ca binni ni huabí Dios para gacanecaʼ xquídxibe, nabé runibiáʼ binni laacaʼ purtiʼ rúnicaʼ guiráʼ ni rabi Dios laacaʼ neca gácani nagana. Casi Noé qué ñuu dxi ñabi binnilidxi: «Lagabi naa ora maʼ bilúxetu arca ca ti chiguuyaʼ laatu». Moisés laaca qué ñabi diʼ ca israelita ni nabeza Egipto que: «Laguuyaʼ ximodo chindatu guriá nisadóʼ Xiñáʼ ca ne raqué guidúʼyanu». Ne Josué qué liica niníʼ: «Laucaa ridxi naa ora maʼ biaba ca lindaa stiʼ Jericó». Zaqueca Isaías, laaca qué nuluiʼná sti xpinni Cristu ne niníʼ: «¡Racá nuube! Biseendaʼ laabe» (Isa. 6:8).
9 Ejemplu stiʼ Cristu nga ni jma galán nápanu, purtiʼ laa biʼniʼ guiráʼ ni na espíritu santu ne guná beeda gati pur binni guidxilayú (Juan 3:16). Ñee cadi naquiiñeʼ gusihuínninu lu xquendanabáninu rudiʼnu xquíxepeʼ pur gunnaxhii Cristu laanu ne pur guná beeda gati pur laanu la? Ti Testigu ni maʼ xadxí de naca binnigola guníʼ ximodo ruuyaʼ ca xpinni Cristu, laabe guniʼbe: «Jesús gudxi Pedru: “Gupa ca dendxuhuiiniʼ stinneʼ”, ca diidxaʼ ca nabé runiibi cani ladxiduáʼ. Lu ca iza ni maʼ gudiʼdiʼ ca maʼ biiyaʼ nabé riuu binni gana ora gabi tuuxa laa diidxaʼ sicarú o gácacabe nachaʼhuiʼ ne laa. Ne ni nabé riuuladxeʼ guneʼ nga chigannaʼ ca xpinni Cristu para uguaaʼ gana laacaʼ» (Juan 21:16).
10. Xi rucaa ti hombre gacané ca xpinni Cristu cásica biʼniʼ Jesús.
10 Ti hombre ni maʼ guyuunisa naquiiñeʼ gacané ca xpinni Cristu cásica biʼniʼ Jesús, purtiʼ laa guníʼ: «Latáʼ ra nuaaʼ, zaziilaʼdxi ladxidóʼ to» (Mat. 11:28). Pa cá íquebe gápabe ca dendxuʼ ca la? zúnibe ni pur fe ni nápabe Dios ne purtiʼ nadxiibe laacaʼ. Qué zuuyabe ni casi ti dxiiñaʼ nabé naná. Peru, pa nuu tuuxa qué riuulaʼdxiʼ gacané ndaaniʼ neza binni ridagulisaa yaʼ. Ñee nuu xiixa ni zanda gacané laabe chuuláʼdxibe gacanebe la?
Bisiaa lii chuuláʼdxiluʼ gacaneluʼ
11. Xi zanda uguu gana laanu ti chuuláʼdxinu gacanenu xcaadxi binni.
11 Ñee runi sentirluʼ qué zanda gúniluʼ xcaadxi dxiiñaʼ ndaaniʼ xquidxi Dios la? Pa zacá runi sentirluʼ, gunabaʼ Dios gudii lii espíritu santu stiʼ lii para cadi guidxíbiluʼ (Luc. 11:13). Dxandíʼ, Jiobá nga racané laanu chuuláʼdxinu guiniisinu lu stiidxaʼ, ne riquiiñebe espíritu santu stibe para gacané laanu ne uguu gana laanu para gúninu xhiiñabe (Fili. 2:13; 4:13). Nga runi, naquiiñeʼ guinábanu laabe uguube gana laanu ti chuuláʼdxinu gacanenu xcaadxi binni (biindaʼ Salmo 25:4, 5).
12. Ximodo zanda gapa binni guendabiaaniʼ para guni xiixa dxiiñaʼ ndaaniʼ xquidxi Dios.
12 Nuu hombre ni maʼ guyuunisa ridxibi guicaa dxiiñaʼ ca purtiʼ para laa stale nga ni caquiiñeʼ ca xpinni Cristu ne nagana cani. O zándaca riníʼ ique huaxiéʼ nanna ximodo raca dxiiñaʼ ni guicaa. Pa zacá ni, cadi naquiiñeʼ gusaanabe de gúʼndabe Stiidxaʼ Dios ne ca libru ne revista ni nápabe para gánnabe ximodo naquiiñeʼ gúnibe dxiiñaʼ ca. Galán guinabadiidxabe laca laabe: «Ñee maʼ gudixheʼ ti hora para guundaʼ Stiidxaʼ Dios guiráʼ dxi ne rinabaʼ laabe lu ca oración stinneʼ gudiibe naa guendabiaaniʼ la?». Biáʼsipeʼ nga ca diidxaʼ guníʼ discípulo Santiagu: «Pa nuu tuuxa de laatu caʼru guiene chaahui xi naquiiñe guni la? inaba lu Dios usiene laa ne zusiene Dios laa. Purti tutiica inabaʼ, rudii Dios ni laa de idubi ladxidóʼ sin tinde né laa» (Sant. 1:5). Ñee runi creluʼ ni na ca diidxaʼ ca de guidubi ladxidoʼloʼ la? Cadi guiaandaʼ laanu, dxi biʼniʼ orar Salomón Dios gucuaa guendabiaaniʼ ne guendariene ne ngue gucané laa guiene gunáʼ nga ni jneza ne gunáʼ nga ni cadi jneza ora biʼniʼ juzgar binni (1 Rey. 3:7-14). Zándaca qué zudii Jiobá laanu guiráʼ ni gucuaa Salomón. Peru zanda guni crenu zudii Jiobá guendabiaaniʼ guiráʼ cani gudiibe dxiiñaʼ de gapa ca dendxuʼ stibe (Pro. 2:6).
13, 14. 1) Xi biʼniʼ Pablu pur guendarannaxhii ni gupa Cristu laa. 2) Xi naquiiñeʼ gúninu pur guendarannaxhii ni napa Cristu laanu.
13 Sti cosa ni zacané laanu chuuláʼdxinu gacanenu nga, guiníʼ ique chaahuinu guiráʼ ni huayuni Jiobá ne Xiiñiʼ pur laanu. Guidúʼyanu xiná ca diidxaʼ ni zeeda lu 2 Corintios 5:14, 15 (biindaʼ ni). Xiñee zanda guininu «intiica guni [nu], runi [nu] ni purti nadxii [...] Cristu» laanu yaʼ. Purtiʼ bisihuinni Jesús nabé nadxii laanu ora bizuubaʼ stiidxaʼ Bixhoze ne guti pur laanu, ne nga rucaa laanu gudiʼnu xquíxepeʼ laabe de guidubi ladxidoʼno ne gannaxhiinu laabe. Casi Pablu, biʼniʼ ni na Cristu purtiʼ nabé gunnaxhii Cristu laabe ne pur ngue maʼ qué ñúnibe puru si ni riuuláʼdxibe, ne bicaani laabe gúnibe xhiiñaʼ Jiobá ne gacanebe binni, gucanebe ca binni ni nuu ndaaniʼ neza binni ridagulisaa zaqueca gucanebe cani cadi nuu ndaaniʼ ni.
14 Ora guiníʼ íquenu pabiáʼ nadxii Cristu binni la? rudiʼnu xquíxepeʼ laabe de guidubi ladxidoʼno. Laanu nánnanu cadi jneza diʼ nga guyúbinu gúninu ni na íquenu o guicá íquenu ugaandanu stale cosa puru para laasinu o guibáninu para gúninu cani riuuláʼdxisinu. Nga runi, riguixhe chaahuinu tiempu stinu para gúninu dxiiñaʼ ni maʼ bidii Jiobá laanu primé lu xquendanabáninu. Ne cumu nadxiinu ca xpinni Cristu la? nga runi racaláʼdxinu gácanu casi esclavu stícabe (biindaʼ Gálatas 5:13). Pa ridúʼyanu laanu casi esclavu stícabe ni qué rudxiibaʼ laca laa la? zuni respetarnu laacabe ne qué ziuu ora guininu mal de laacabe purtiʼ Binidxabaʼ nga runi zacá (Apo. 12:10).
Laaca naquiiñeʼ gacané binnilidxi hombre ca
15, 16. Xi naquiiñeʼ guni familia stiʼ ti hombre para gaca siervu ministerial o binnigola yaʼ.
15 Ora ruuyacabe pa runi ti xpinni Cristu ni maʼ bichaganáʼ guiráʼ ni caquiiñeʼ para gaca siervu ministerial o binnigola la? naquiiñeʼ gúʼyacabe pa jneza modo runi xheelabe ne ca xiiñibe dxiiñaʼ. Pa naguidxi nuucabe ndaaniʼ xquidxi Dios ne pa galán ruuyaʼ xcaadxi binni ni rúnicabe la? zusihuinni nga pa zacaa hombre ca xiixa dxiiñaʼ o pa coʼ. Ni maʼ guninu ca rusihuinni naquiiñeʼ gacané familia stibe laabe para ugaandabe ni naguixhe íquebe ndaaniʼ neza binni ridagulisaa, casi gácabe siervu ministerial o binnigola (biindaʼ 1 Timoteo 3:4, 5, 12).
16 Jiobá riuulaʼdxiʼ gacané binnilidxi hombre ca laa (Efe. 3:14, 15). Primé la? ca xaíque ca naquiiñeʼ gúnicaʼ xhiiñacaʼ ndaaniʼ neza binni ridagulisaa ne gácacaʼ «tobi ni nanna guni mandar ndaani lidxi». Ca binnigola ne ca siervu ministerial naquiiñeʼ gúʼndanecaʼ xheelacaʼ ne xiiñicaʼ Stiidxaʼ Dios guiráʼ semana. Ne cadi ngasi nga naquiiñeʼ gúnibe, sínuque laaca naquiiñeʼ chigucheechenebe laacaʼ stiidxaʼ Dios. Laaca naquiiñeʼ gacanecaʼ laabe ora quixhe íquebe gúnibe xiixa.
Ñee zabiguetaʼ gápaluʼ dxiiñaʼ ni gúpaluʼ ndaaniʼ xquidxi Dios dxiqué la?
17, 18. 1) Xi naquiiñeʼ guni ti xpinni Cristu ni bisaana de guni xiixa dxiiñaʼ ndaaniʼ neza binni ridagulisaa. 2) Ximodo naquiiñeʼ guiníʼ ique ti xpinni Cristu ni bisaana de gaca siervu ministerial o binnigola.
17 Zándaca dxiqué gúcaluʼ siervu ministerial o binnigola, peru yanna maʼ bisaanaluʼ ni. Cadi caníʼ diʼ nga maʼ cadi nadxiiluʼ Jiobá, ne laaca naquiiñeʼ gannuʼ nadxiibe lii (1 Ped. 5:6, 7). Ne zándaca bidiicabe lii caadxi conseju para guchaaluʼ xiixa lu xquendanabániluʼ. Pa zacá ni, naquiiñeʼ guiniʼluʼ bicheeluʼ ne gudiiluʼ lugar gacané Jiobá lii para guni chaahuiluʼ cani qué ñúniluʼ jneza. Cadi guidaaluʼ xiana. Guca binni nuu xpiaaniʼ ne guníʼ ique ziuu dxi guibiguetaʼ gápaluʼ dxiiñaʼ ca sti biaje. Ti xpinni Cristu bisiene xi biʼniʼ dxi bisaana de guca binnigola despué de stale iza de cayuni dxiiñaʼ ca: «Gudixheʼ iqueʼ cadi gusaanaʼ de chaa ca guendaridagulisaa ca, gucheecheʼ diidxaʼ ne guundaʼ Biblia cásica bineʼ ni dxi gucaʼ binnigola, ne gunda bineʼ cani gudixheʼ iqueʼ guneʼ que. Qué nireeʼ gana, purtiʼ neca guníʼ iqueʼ zabiguetaʼ gacaʼ binnigola lu ti iza o chupa iza la? gulezaʼ gadxe iza para gúcani sti biaje. Ti cosa ni nabé gucané naa ca iza que nga cani gudxi xcaadxi xpinni Cristu naa ne guluucaʼ gana naa para cadi guidxagaʼ ne cadi gusaana de guneʼ stipa para ugaandaʼ ni gudixheʼ iqueʼ que».
18 Pa zacaca nuuluʼ, cadi chuʼluʼ triste. Guníʼ ique ximodo caguu Jiobá ndaayaʼ ni rúniluʼ ora gucheecheluʼ diidxaʼ ne modo caguube ndaayaʼ binnilídxiluʼ. Gucané binnilídxiluʼ chuʼ jma gaxha de Dios, yeganna cani huará ne guluu gana cani maʼ huaxiéʼ napa stipa. Cadi gusaana de gucheecheluʼ diidxaʼ ne gusisácaluʼ Jiobá casi ti Testigu stibe (Sal. 145:1, 2; Isa. 43:10-12).a
Biiyaʼ chaahuiʼ pa zanda gacaneluʼ
19, 20. 1) Xi conseju cacaa ca hombre ni maʼ guyuunisa. 2) Xi chiguidúʼyanu lu sti tema ca.
19 Yanna riʼ, nabé caquiiñeʼ chuʼ tu gaca binnigola ne siervu ministerial. Nga runi, rinábadu laatu ca hombre ni maʼ guyuunisa ni cadi naca binnigola ne cani cadi naca siervu ministerial guʼyaʼ chaahuicaʼ pa zanda gacanecaʼ ne guinabadiidxacaʼ laca laacaʼ: «Xi cucueeza naa de gapaʼ xiixa dxiiñaʼ ndaaniʼ xquidxi Dios». Naquiiñeʼ guinábacabe gacané espíritu santu stiʼ Dios laacabe. Zacá zanda gánnacabe xipeʼ nga jma jneza gúnicabe.
20 Guiráʼ ca xpinni Cristu ni nuu ndaaniʼ neza binni ridagulisaa zabeenducaʼ ni galán pur stipa cayuni xcaadxi xpinni Cristu pur laacaʼ. Casi maʼ bidúʼyanu ca, cada gúninu xiixa ni galán sin cuézanu gudiicabe laanu xiixa pur laani la? riuʼnu nayecheʼ purtiʼ racanenu sti binni ne rusihuínninu cayúninu ni na espíritu santu. Yanna, naquiiñeʼ chuʼnu cuidadu laanu para cadi gúninu xiixa ni guniná espíritu santu. Lu sti tema ca zadúʼyanu xi naquiiñeʼ gúninu para cadi guizaaca nga.
[Cani cá ñee yaza]
a Biiyaʼ revista Torre stiʼ ni rapa 15 stiʼ agosto 2009, yaza 30 dede 32.
Xi nicábiluʼ
• Xi nánnanu zaca pur ni cá lu ca diidxaʼ riguixhená ni zeeda lu Miqueas 5:5.
• Xi guiráʼ naquiiñeʼ guni binni para gacané stobi neca gácani nagana para laa.
• Xi zanda gúninu para chuuláʼdxinu gacanenu ca xpinni Cristu.
• Pabiáʼ risaca ni guni familia stiʼ ti hombre para ganda gaca siervu ministerial o binnigola.
[Ca dibuju/foto ni zeeda lu yaza 25]
Ximodo rusihuinni tuuxa racalaʼdxiʼ guni xiixa dxiiñaʼ ndaaniʼ xquidxi Dios