Ni rinabadiidxaʼ cani ruundaʼ

Pa Jiobá na cadi jneza guni adorar binni bidóʼ, xiñee qué nusabanabe Aarón ora biʼniʼ yuzehuiiniʼ de oro que yaʼ.

Casi ruzeeteʼ capítulo 32 stiʼ Éxodo, biʼniʼ Aarón ti yuzehuiiniʼ de oro ne ra bíʼnibe zaqué maʼ qué ninándabe ley ni na cadi guni adorárcabe bidóʼ (Éxo. 20:3-5). Pur ngue, «guizáʼ bidxiichiné Jiobá Aarón dede gucalaʼdxiʼ ñuuti laabe». Peru Moisés guníʼ pur biʼchiʼ (Deu. 9:19, 20). Ra biʼniʼ Moisés zaqué, ñee guca ni na ca diidxaʼ «oración ni guni hombre ni nachaʼhuiʼ, [...] nápani stale stipa» la? (Sant. 5:16, NM.) Guca ni nácani. Ne qué nusabanáʼ diʼ Jiobá Aarón pur ni gunabaʼ Moisés laa que. Peru ruluíʼ si gupa Jiobá xhupa razón para qué nusabanáʼ Aarón.

Primé razón ca nga purtiʼ qué nusaanabe Jiobá dede dxi bicheebe que. Dxi gudxi Jiobá Moisés cheʼ ra nuu faraón ne cuee xquidxi de Egipto, biseendabe Aarón chiné laa ne guiníʼ pur laa (Éxo. 4:10-16). Guirópacabe bíʼnicabe guiráʼ ni gudxi Jiobá laacabe, ne stale biaje guyécabe nezalú rey que, ne laa guca naduxhuʼ ne laacabe, qué niná ñene ne biʼniʼ guiráʼ ni gucalaʼdxiʼ. Ngue runi dxi biree Aarón de Egipto maca bisihuinni qué rusaana de guni ni na Jiobá (Éxo. 4:21).

Guiropa razón ni naquiiñeʼ gánnanu nga xi bicaa laabe gúnibe yuzehuiiniʼ de oro que. Guietenaláʼdxinu maʼ ziné Moisés cuarenta dxi lu dani Sinaí que. Ora «biiyaʼ guidxi que candaa Moisés ne qué guietegá de lu dani que» la? bicaacabe bíʼchibe guni ti bidóʼ ne laa biʼniʼ ni nácabe (Éxo. 32:1-6). Peru cani biʼniʼ Aarón despué que bisihuínnicani qué ñuuláʼdxibe ni cayuni ca binni que, ne bíʼnibe yuzehuiiniʼ de oro que purtiʼ bicaa ca binni que laabe gúnibe ni. Ora guníʼ Moisés guinitilú cani bidxiideche Jiobá que, guiráʼ ca xiiñiʼ Leví bisihuínnicaʼ nuucaʼ ladu stiʼ Jiobá ne ládecabe nuu Aarón. Guti ca binni ni gunabaʼ gaca bidóʼ que: biaʼsi chonna mil israelita (Éxo. 32:25-29).

Despué gudxi Moisés ca israelita que: «Laatu guizáʼ naroʼbaʼ pecadu ni bíʼnitu» (Éxo. 32:30). Ngue runi cadi Aarón si napa donda. Ne cadi laasibe guleendube ni galán pur bilaselaʼdxiʼ Jiobá laabe, sínuque ne guidxi que.

Despué de ni bizaaca que gudxi Jiobá Moisés guni Aarón xaíque stiʼ cani ruzaaquiʼ guʼxhuʼ, ne gúdxibe laa: «Napa xidé ugáculuʼ [laabe] lari ne ca lari risaca, ne gulí laabe ne biʼniʼ laabe nayá ti gúnibe xhiiñaʼ casi ti ni ruzaaquiʼ guʼxhuʼ» (Éxo. 40:12, 13). Bihuinni dxíchica bitiidilaʼdxiʼ Jiobá donda stiʼ Aarón, purtiʼ dede ndaaniʼ ladxidoʼbe bihuinni nácabe ti hombre ni racalaʼdxiʼ gaca adorar Jiobá jneza, ne cadi tobi ni runi adorar bidóʼ.