Xiñee naquiiñeʼ chindanu tempranu

CADI guiráʼ diʼ biaje nga zanda chindá binni tempranu ra rapa gana. Nuu tiru naquiiñeʼ saʼ binni zitu para chindá ra zeʼ. O purtiʼ nuu stale carru lu carretera ne purtiʼ nuu biaje nabé napa binni stale ni guni. Neca zacá, nabé risaca nga chindá binni tempranu. Ca binni ni riuu tempranu ra runi dxiiñaʼ, ruuyacabe laacaʼ casi binni ni zúnicaʼ dxiiñaʼ ni gudiicabe laacaʼ ne casi binni ni nanna guni dxiiñaʼ. Peru ca binni ni riuu maʼ huadxí la? qué racanecaʼ para guni xcaadxi binni dxiiñaʼ jneza, ne laaca pur nga qué raca cani rúnicabe jneza ne maʼ cadi galán modo runi tendércabe binni. Casi ca baʼduscuela ni maʼ huadxí rindá, runíticaʼ clase sticaʼ, ne pur nga jma nanene riziidicaʼ. Ne pa chindá tuuxa maʼ huadxí ra nuu doctor o ra nuu ti dentista la? maʼ qué zanda diʼ guni tender doctor ca laa galán.

Peru nuu guidxi cadi biaa diʼ binni chindá tempranu ra cheʼ, ne zándaca guicá modo riníʼ ique ca binni ca laanu. Pa nácanu ti binni ni maʼ biaa chindá maʼ huadxí la? naquiiñeʼ quixhe íquenu guchaʼnu. Ni zacané laanu guchaʼnu nga guiénenu pabiáʼ risaca nga chindanu tempranu. Xiñee naquiiñeʼ gúninu stipa pur chindanu tempranu yaʼ. Ximodo zanda gúninu ni. Xi zabeendunu pa quixhe íquenu chindanu tempranu.

Jiobá runi cani maʼ guníʼ dxi maʼ gudixhe gácacani

Ti razón jma risaca ni nápanu para chindanu tempranu paxaraa nga, purtiʼ racaláʼdxinu chinándanu ejemplu stiʼ Dios (Efe. 5:1). Ejemplu stibe nga jma risaca chinándanu, purtiʼ laabe rúnibe ca cosa ca órapeʼ maʼ guniʼbe gácacani. Ne rinándabe tiempu gudíxhebe para gúnibe cani maʼ gudixhe íquebe. Casi dxi guniʼbe zusábabe ti Nisaguié naroʼbaʼ para gunitilube ca binni malu que, gúdxibe Noé: «Bizáʼ ti arca para lii ne biquiiñeʼ yaga ni napa tini». Ne ora bizaa tiempu gudíxhebe que gúdxibe laa chuʼ ndaaniʼ ni, ne laaca gúdxibe laa: «De raríʼ xcadxe si gubidxa zusabaʼ nisaguié lu guidxilayú riʼ cuarenta dxi ne cuarenta gueelaʼ; ne zuxhiayaʼ guiráʼ cosa ni bizayaʼ ni nuu lu guidxilayú riʼ». Ne zaqué gúcani dxipeʼ gudíxhebe: «Dxi bizaa gadxe gubidxa que biaba Nisaguié naroʼbaʼ que lu guidxilayú» (Gén. 6:14; 7:4, 10). Guníʼ ique si xi nizaaca pa qué ñuu Noé ne familia stiʼ ndaaniʼ arca que. Casi maʼ bidúʼyanu ca, gupa xidé guyuucabe ndaaniʼ ni dxi gudixhe Dios chúʼcabe que, zaqué bisihuínnicabe nácacabe casi Dios ni cayúnicabe ni na.

Gudiʼdiʼ si biaʼ tapa gayuaa iza, gudxi Jiobá Abrahán zapa ti xiiñiʼ ne de xiiñibe que nga gueeda ni za de gunaa que (Gén. 17:15-17). Padxí gálebe yaʼ. Jiobá gudxi laabe: «Lu sti iza ca, laaca ca dxi riʼ». Guca ni guniʼbe que la? Biblia na: «Guca xiiñiʼ Sara ne gúpabe ti xiiñiʼ Abrahán dxi maʼ huaniisi [ni biree lá Isaac], biaʼsi tiempu maca guníʼ Dios que» (Gén. 17:21; 21:2).

Lu Biblia rieeteʼ stale ejemplu ni rusihuinni biʼniʼ Dios cani guníʼ tiempu ni gudixhe gácacani (Jer. 25:11-13; Dan. 4:20-25; 9:25). Nga runi, galán nga gusihuínninu cabézanu dxi guni juzgar Jiobá binni, purtiʼ nga nga canabaʼ Stiidxaʼ Dios laanu gúninu. Nécapeʼ para binni ruluíʼ candaaruni, peru Biblia cayabi laanu «qué zandaani» (Hab. 2:3).

Naquiiñeʼ chindanu tempranu para guni adorarnu Dios

Dxiqué para gaca «ca saa stiʼ Jiobá ni maca nexheʼ padxí gaca» la? ca hombre stiʼ guidxi Israel que naquiiñeʼ chúʼcabe dede ante lugar ra chigácani que (Lev. 23:2, 4). Ne gudixhe Dios pora guzaaquicabe caadxi de ca maniʼ que para laa (Éxo. 29:38, 39; Lev. 23:37, 38). Ñee qué rusihuinni ndiʼ racalaʼdxiʼ Jiobá chindanu ora nexheʼ guni adorarnu laa la?

Lu primé siglu que, bisiene apóstol Pablu ca xpinni Cristu de Corinto ximodo naquiiñeʼ gúnicabe ca guendaridagulisaa que. Lade cani guniʼbe que zeeda ca diidxaʼ riʼ: «Peru ni rabe siaʼ laatu nga quixhe chaahui tu modo guni tu ca [guendaridagulisaa] stitu ti gaca cani jneza» (1 Cor. 14:40). Casi modo na ca diidxaʼ ni maʼ bidúʼyanu ca, ca guendaridagulisaa ca naquiiñeʼ guzulúcani ora nexheʼ gácacani. Jiobá qué huachaa diʼ modo riníʼ ique purtiʼ rusisácarube guni binni ca cosa ca ora nexheʼ gácacani (Mal. 3:6). Yanna, xi caquiiñeʼ gúninu para chindanu tempranu ra Yoo stiʼ Reinu yaʼ.

Xi caquiiñeʼ gúninu para chindanu tempranu

Ti cosa ni zacané binni nga guʼyaʼ dede ante xi naquiiñeʼ guni (Pro. 21:5). Guníʼ ique biaananeluʼ tuuxa gúʼyaluʼ laa paxaraa. Ñee cadi jma jneza nga guireeluʼ tempranu la? Jma jneza guireʼnu chupa chonna minutu ante, purtiʼ nuu tiru málasi rizaaca xiixa cosa ni cadi cabézanu (Ecl. 9:11). José, ti hombrehuiiniʼ xpinni Cristu ni nabé rindá tempranu ra cheʼ guníʼ sicaríʼ: «Ti cosa ni racané naa para chuaaʼ tempranu nga guiníʼ iqueʼ pabiáʼ tiempu zandaa para chindayaʼ ra ziaaʼ».a

Yanna xi runi caadxi binni para ganda gúnicaʼ zacá yaʼ. Rúnicabe stipa para guireecabe tempranu de ra rúnicabe dxiiñaʼ para chindácabe tempranu ra ridagulisaacabe. Ngapeʼ nga ni biʼniʼ ti xpinni Cristu de Etiopía ora gunna zindá cuarenta y cinco minutu despué de guzulú ca guendaridagulisaa ca purtiʼ maʼ chiguchaacabe laa de turnu ra dxiiñaʼ stiʼ. Gunábabe tobi de ca ni runinebe dxiiñaʼ chindee laabe tempranu dxi rápabe guendaridagulisaa, ne gúdxibe laa zúnibe ti turnu de gadxe hora extra stiʼ.

Nabé nagana para cani napa xiiñiʼ chindacaʼ tempranu ra ridagulisaacaʼ. Stale biaje jñaa binni nga ruzuchaahuiʼ ca xiiñiʼ, peru zanda gacané xcaadxi binnilídxibe laabe ne naquiiñeʼ gúnicabe ni. Esperanza, ti gunaa Testigu de Méjicu stubi cusiniisi xhono xiiñiʼ, primé xiiñibe ca napa 23 iza ne últimu ca napa 5 iza, laabe guniʼbe ximodo rúnibe para chindabe tempranu: «Ca xiiñeʼ dxaapaʼ racanecaʼ naa para guzuchaahuiʼ ca xiiñeʼ ni jma nahuiiniʼ. Nga racané naa guiluxeʼ ca dxiiñaʼ runeʼ ndaaniʼ lidxeʼ tempranu ne gudii tiempu naa guzuchaahueʼ para guireʼdu ora naguíxhedu». Pa guidúʼyanu la? familia riʼ naguíxhecaʼ ti hora para guireecaʼ de ralídxicaʼ ne guirácabe racanésaacabe para guireecabe tempranu.

Cani zabeendunu ora chindanu tempranu ra ridagulisaanu

Pa guiénenu xi guiráʼ zabeendunu pur chindanu tempranu ra ridagulisaanu la? zucaani laanu gúninu stipa pur chindanu tempranu. Sandra, ti baʼdudxaapaʼ ni bisiaa laa chindá tempranu ra ridagulisaa, guníʼ sicaríʼ: «Ni jma riuuladxeʼ nga purtiʼ randa rudieeʼ nayaʼ ca xpinni Cristu, ne güeniáʼ laacaʼ diidxaʼ ne gunebiaʼyaʼ chaahueʼ laacaʼ». Nga rusiidiʼ laanu, pa gusiaʼnu laanu chindanu tempranu, zanda guizíʼdinu de ximodo huayuni huantar xcaadxi xpinni Cristu xiixa guendanagana ni huadíʼdicaʼ ne ximodo huayúnicaʼ para cadi gusaanacaʼ de gúnicaʼ xhiiñaʼ Jiobá. Ne laanu laaca zanda uguʼnu gana laacabe pa nuunu raqué ne güínenu laacabe diidxaʼ; purtiʼ zacá «[zacanésaanu] para ganaxhii nu jma, ne guni nu ni nachaʼhuiʼ» (Heb. 10:24, 25).

Diidxaʼ riuundaʼ ne oración ni ruzuluné ca guendaridagulisaa ca nabé risácacani ora runi adorarnu Jiobá (Sal. 149:1). Ora ridúʼndanu ca diidxaʼ riuundaʼ ca rusisácanu Jiobá, rietenaláʼdxinu ca guenda ni naquiiñeʼ gápanu ne rucaacani laanu gucheechenu diidxaʼ ne stale gana. Peru xi zanda guininu de oración ni raca ora ruzulú ca guendaridagulisaa ca yaʼ. Dxiqué la? gulee lá Jiobá yuʼduʼ stiʼ «lidxeʼ ra raca orar» (Isa. 56:7). Ca dxi stinu riʼ, tobi de ca razón ni nápanu para guidagulisaanu nga guni orarnu Dios. Lu oración ni raca ora ruzulú ca guendaridagulisaa ca, cadi rinabasícabe gacané Dios laanu ne guinábacabe espíritu stibe, sínuque rinábacabe laabe gacanebe laanu quixhedxinu xquendabiaaninu ne ladxidoʼno para ganda guizíʼdinu cani chiguieeteʼ raqué. Nga runi, gúninu stipa pur chindanu ante guiuundaʼ diidxaʼ riuundaʼ ne ante gaca oración.

Helen, ti baʼdudxaapaʼ ni napa 23 iza, bisiene xiñee rindá tempranu ra ridagulisaa, laabe guniʼbe: «Zacá nga rusihuinneʼ pabiáʼ nadxieeʼ Jiobá, purtiʼ laabe nga riguíxhebe xi guizíʼdinu lu ca guendaridagulisaa ca dede né ca diidxaʼ riuundaʼ ca ne oración ni raca ora ruzulú cani». Ñee cadi galán guiníʼ íquenu casi riníʼ íquebe ca la? ¡Galán pue! Nga runi, gúninu stipa pur guiaʼnu chindanu tempranu ora chigúninu intiica cosa ne jmaruʼ si ora chiguni adorarnu Dios.

[Cani cá ñee yaza]

[Dibuju/foto ni zeeda lu yaza 26]

Guyuu listu dede ante

[Dibuju/foto ni zeeda lu yaza 26]

Gulee ti tiempu huiiniʼ pa málasi guizaaca xiixa cosa ni cadi cabézaluʼ

[Dibuju/foto ni zeeda lu yaza 26]

Zabeenduluʼ ni galán pa chindaluʼ tempranu ra ridagulisaaluʼ