ORACIÓN
2 Tu laa caquiiñeʼ guni orarnu
CA DXI stinu riʼ, stale binni runi cré zanda guni orar ra nuu tutiica purtiʼ riníʼ íquecaʼ rindá guiráʼ ca oración ca ra nuu Dios. Ca binni ni riníʼ zanda chuʼ ca religión ca juntu para guni adorarcaʼ Dios ne ca binni ni riníʼ jneza guiráʼ religión, nacaʼ biaʼsi nga modo riníʼ ique ca binni ni bizéʼtenu ca. Peru, ñee jneza ni runi crécabe ca la?
Stiidxaʼ Dios rusiene cadi guiráʼ diʼ ca oración runi binni nga rúnicabe ni Dios ni naquiiñeʼ guni orárcabe. Ca binni bibani dxi gucuá Biblia nabé biʼniʼ orarcaʼ bidóʼ. Peru stale biaje gudxi Dios xquidxi cadi gúnicaʼ casi biʼniʼ ca binni que. Salmo 115:4-6 caníʼ de ca bidóʼ ca sicaríʼ: «Nápacaʼ diágacaʼ peru qué randa runadiágacaʼ». Nayaguieʼ modo rusiene Stiidxaʼ Dios ni. Xi para guni orarnu ti Dios ni nánnanu qué zucaadiaga laanu.
Para gánnanu dxandíʼ ni caninu riʼ, galán guidúʼyanu tobi de ca relatu zeeda lu Biblia ni nabé rucaa binni guiníʼ ique. Laani cuzeeteni de Elías, ti ni riguixhená ni qué nucheené Dios. Hombre riʼ gunábabe cani ruzaaquiʼ guʼxhuʼ stiʼ Baal guluiʼcaʼ laabe pa dxandíʼ rucaadiaga dios sticaʼ ca oración ni rúnicaʼ. Laabe gúdxibe laacaʼ chiguni orarbe Dios stibe ne laacaʼ guni orarcaʼ Baal ne ni guicabi oración stícabe que zusihuinni laa nga Dios ni dxandíʼ. Ca hombre ni riguixhená stiʼ Baal que guniʼcaʼ zúnicaʼ ni na Elías ne bizulú biʼniʼ orarcaʼ. Ca binni que bindaacaʼ hora cayuni orarcaʼ peru «guirutiʼ tu nicabi ne guirutiʼ tu nucaadiaga laacabe» (1 Reyes 18:29). Peru, xi bizaaca né Elías yaʼ.
Cásipeʼ biluxe biʼniʼ orar Elías bisaba Dios gui de guibáʼ ne bizaaquiʼ ni ofrenda stibe. Xiñee bicabi Dios oración stiʼ Elías ne stiʼ ca binni que guirutiʼ tu nicabi yaʼ. Ca diidxaʼ ni zeeda lu 1 Reyes 18:36, 37 cusiene xiñee. Elías qué niquiiñeʼ stale diidxaʼ lu oración ni biʼniʼ, biquiiñebe biaʼ treinta diidxaʼ lu hebreu ni guníʼcabe dxiqué, luni guniʼbe chonna biaje lá Dios, ne lá Dios nga Jiobá.
Xiñee risaca ni biʼniʼ Elías ra biquiiñeʼ lá Dios. Cadi guiaandaʼ laanu Baal nga lá dios stiʼ ca cananeu que (lá ca riniʼni «xpixuaanaʼ») ne gadxé gadxé modo guníʼ binni labe. Peru lá Jiobá tobi si ni, purtiʼ laasibe nga labe zacá guibáʼ ne lu guidubi naca Guidxilayú. Laapebe guniʼbe: «Naa nga Jiobá. Nga nga laʼyaʼ; ne guirútiruʼ zudieeʼ guendanaróʼ stinneʼ» (Isaías 42:8).
Yanna, ñee zanda guininu yendá oración ni biʼniʼ Elías ne ni biʼniʼ cani riguixhená stiʼ Baal que ra nuu ti dios si la? Coʼ xa. Ca binni ni biʼniʼ adorar Baal que bíʼnicaʼ caadxi cosa ora runi adorarcaʼ laabe. Biiticaʼ binni para gudiicaʼ laabe ne gutanecaʼ ni cadi xheelacaʼ nezalube. Cani bíʼnicabe ca bisihuínnicani qué risácacabe nezalú dios que. Peru, modo runi adorárcabe Jiobá jma nayani ne qué rucaabe xquídxibe guni cosa dxabaʼ. Laanu nánnanu ca oración ni bíʼnicabe Jiobá qué nindácani ra nuu Baal. Zeeda gácani casi ora nuséʼndanu ti carta ra nuu ti xhamígunu ni nabé nápanu respetu ne nindani ra nuu sti binni ni runibiáʼcabe laa purtiʼ feu xpiaʼ.
Ora runi orar binni Jiobá la? cayuni orarcaʼ Dios ni bizáʼ guiráʼ xixé cosa ne Bixhoze guiráʼ binni.a Isaías, ni riguixhená bizeeteʼ ca diidxaʼ riʼ lu ti oración ni biʼniʼ, laabe guniʼbe: «Lii, Jiobá, lii nga Bixhózedu» (Isaías 63:16). Ne ora gudxi Jesús ca diidxaʼ riʼ ca xpinni caniʼbe de Bixhózebe: «Ma chi chiba ra nuu Bixhoze ne Bixhoze tu, ra nuu Dios stinne ne Dios stitu» (Juan 20:17). Nga runi, pa Jiobá nga Bixhoze Jesús la? laaca laabe nga Dios ni biʼniʼ orar Jesús ne laaca Jiobá nga naquiiñeʼ guni orar ca discípulo stibe (Mateo 6:9).
Peru ñee ruzeeteʼ Biblia naquiiñeʼ guni orarnu Jesús, María, ca bidóʼ ca o ca ángel ca la? Coʼ, Jiobá si nga caquiiñeʼ guni orarnu. Guidúʼyanu chupa razón. Primé la? purtiʼ ti modo guni adorarnu Dios nga guni orarnu laa, ne Biblia na Jiobá si nga naquiiñeʼ guni adorarnu (Éxodo 20:5). Guiropa, purtiʼ laabe nácabe ti Dios «Ni rucaadiaga oración» (Salmo 65:2). Ne neca maʼ huadiibe xcaadxi binni gúnicaʼ stale de ca dxiiñaʼ stibe, peru laasibe nga rucaadiágabe ca oración stinu ne guirútiruʼ qué huadiibe dxiiñaʼ ca.
Nga runi, para ganda gucaadiaga Jiobá ca oración stinu la? caquiiñeʼ guni orarnu laabe. Biblia na: «Guiráʼ tu iquiiñeʼ lá Jiobá ora guinabaʼ gacanebe laa la? zalá» (Hechos 2:21, NM). Peru, ñee tisi guiníʼ binni labe nga zanda guininu rucaadiágabe guiráʼ xixé oración ni rúnicaʼ la? O caquiiñeruʼ guni binni xiixa.
[Ni cá ñee yaza]
a Nuu religión qué rinacaʼ guiniʼcaʼ lá Dios dede nin ora guni orarcaʼ. Peru lá ca zeedani biaʼ gadxé mil biaje lu ca primé guiʼchiʼ gucuá Biblia, ne laaca rieeteʼ lá ca gatigá lu ca oración ni biʼniʼ ca xpinni Dios ne lu ca salmo ni bicaacaʼ.
[Dibuju/foto ni zeeda lu yaza 5]
Casi bisihuinni Elías que, cadi guiráʼ diʼ ca oración ca rindácani ra nuu Dios