ORACIÓN

5 Pora ne paraa guni orarnu

STALE de ca religión ni jma napa binni ni nuu lu Guidxilayú riʼ nápapecaʼ ti lugar para guni orarcaʼ ne riguíxhecaʼ ti hora para gúnicaʼ ni. Peru ñee ruzeeteʼ Biblia paraa ne pora nga naquiiñeʼ guni orar binni la?

Biblia ruzeeteʼ pora nga jma galán guni orar binni. Ne Jesús bíʼnini ora bidii xquíxepeʼ Dios ante gó (Lucas 22:17). Ca discípulo stibe laaca biʼniʼ orarcaʼ guiráʼ biaje bidagulisaacaʼ para guni adorarcaʼ Dios. Peru cadi deruʼ laacabe ngue primé gúnicabe zaqué. Dxiqué maca runi orar binni ndaaniʼ ca sinagoga stiʼ ca judíu ne ndaaniʼ yuʼduʼ ni guyuu Jerusalén, laani nga gucalaʼdxiʼ Dios ñácani ti yoo «para iníʼ né irá binni» laa (Marcos 11:17).

Dios riuulaʼdxiʼ guidagulisaa ca xpinni ne tobi si modo guiníʼ íquecaʼ ora guni orarcaʼ ne gúnicaʼ ni casi na Stiidxaʼ Dios. Ne ca oración riʼ zanda gucaacani laanu gúninu xiixa ni qué ñanda ñúninu laasinu (Hebreos 13:18, 19). Nga runi, ca testigu stiʼ Jiobá runi orarcaʼ guiráʼ biaje guidagulisaacaʼ. Pa riuuláʼdxiluʼ gucaadíagaluʼ ca oración stícabe la? zanda cheluʼ ra Yoo stiʼ Reinu ra ridagulisaa ca Testigu ni riaana lii jma gaxha.

Peru Biblia qué ruzeeteʼ diʼ pora ne paraapeʼ naquiiñeʼ guni orar binni. Luni rieeteʼ biʼniʼ orar ca xpinni Dios ora tiica ne ratiica. Jesús guníʼ: «Ora chi iníʼ né tu Dios la? lachuu ndaani lidxi tu, lauseegu ra puerta ne lainíʼ né Bixhoze tu ni qué rihuinni, ti laa ruuya ni runi binni ra nagaʼchiʼ, ne zaguixe laatu» (Mateo 6:6).

Dios nga ni jma nandxóʼ ni nuu guibáʼ ne lu Guidxilayú. Cadi dxandíʼ riuʼnu nayecheʼ ora gánnanu zanda guinínenu laabe ne zucaadiágabe laanu ratiica nuunu ne ora tiica guinínenu laabe la? Nga rusihuinni xiñee biyubi Jesús chuʼ stubi para guni orar. Ti biaje, biʼniʼ orar Jesús guidubi ti gueelaʼ ante quixhe ique guni ti cosa nabé risaca (Lucas 6:12, 13).

Peru laaca guyuu xcaadxi hombre ne gunaa ni qué nusaana de ñuni ni na Dios, laacaʼ biʼniʼ orarcaʼ ante quixhe íquecaʼ gúnicaʼ xiixa cosa risaca ne ora bidxagalucaʼ guendanagana. Guyuu biaje biʼniʼ orárcabe né ridxi nadipaʼ, xcaadxi biaje bíʼnicabe ni ndaaniʼ ladxidóʼcabe, lade binni ne laaca bíʼnicabe ni ora nuucabe stúbicabe, peru ni jma risaca nga biʼniʼ orárcabe. Jiobá peʼ cayabi laanu ca diidxaʼ riʼ: «Lainíʼ né Dios sin guiaana dxí tu» (1 Tesalonicenses 5:17). Ñee cadi rusihuinni Dios nadxii binni ra cayábibe laacaʼ guni orarcaʼ la? Dios na zucaadiaga ca xpinni guiráʼ biaje guinábacaʼ laabe gacanebe laacaʼ.

Stale binni qué runi cré pa rucaadiaga Dios oración sticaʼ ne rinabadiidxacaʼ pa zanda gacaneni laacaʼ. Zándaca dede né lii laaca huanabadiidxaluʼ zacá.

[Ni caníʼ yaza 9]

Zanda guni orarnu Dios ora tiica ne ratiica nuunu