Ni gusiiditu ca xiiñitu

Ti secretu ni zanda güíneluʼ xcaadxi binni

ÑEE huayuiʼnécabe lii xiixa secretu la?a... Napaʼ ti secretu ni riuuladxeʼ gabeʼ lii. Laani nga ti secretu sagradu. Biblia na guyuuni «nagaʼchi xadxí» (Romanos 16:25). Dxiqué la? Jiobá Dios si nga gunna ni. Peru guidúʼyanu xi bíʼnibe para gunna binni ni.

Ante gabeʼ ni lii, ñee rietenaláʼdxiluʼ xi riníʼ diidxaʼ sagradu la?... Ti cosa sagradu nga xiixa ni nabé risaca ne nayá. Dios naca ti binni nayá, nga runi sagradu secretu stibe. Ñee nannuʼ tuu nga ca binni ni gucalaʼdxiʼ ñanna secretu nabé risaca riʼ la?... ¡Ca ángel ca! Biblia na: «Dede ca ángel ñuulaʼdxi ca ñene chaahui ca» ca cosa ca (1 Pedro 1:12).

Jesús laacaʼ gunna secretu riʼ ne laabe nga primé binni guníʼ xii laani. Dxi beedabe ndaaniʼ Guidxilayú riʼ gúdxibe ni ca discípulo stibe. Gúdxibe laacaʼ: «Cudii Dios lugar guiene tu modo runi mandar, [o «de reinu stiʼ», NM] dede ni nagaʼchiʼ» (Marcos 4:11). Ñee bidiiluʼ cuenta xii nga secretu sagradu riʼ la?... Laani nga Reinu stiʼ Dios, gobiernu ni bisiidiʼ Jesús laanu guinábanu ora guni orarnu Jiobá (Mateo 6:9, 10).

Casi maʼ bidúʼyanu ca, xadxí guca Reinu stiʼ Dios ti secretu. Dede dxi gulee Dios Adán ne Eva ndaaniʼ jardín ni guyuu Edén hasta dxi beeda Jesús ne guníʼ xii nga secretu que la? dxiqueruʼ nga maʼ gunna ca xpinni Dios stale cosa de Reinu ca. Ni nannasícabe nga racaláʼdxiruʼ Dios guni Guidxilayú riʼ ti paraísu (Génesis 1:26-28; 2:8, 9; Isaías 45:18). Guyuu chupa chonna de laacabe guniʼcaʼ pabiáʼ sicarú nibani binni lu Guidxilayú riʼ ora ñeeda Reinu stiʼ Dios (Salmo 37:11, 29; Isaías 11:6-9; 25:8; 33:24; 65:21-24).

Yanna, tu gulí Dios para guni mandar lu Reinu ca yaʼ. Ñuulaʼdxuʼ ñannuʼ tu laabe la?... Gulibe Xiiñibe, Jesucristu. Biblia na zacaabe derechu para guni mandarbe casi «Príncipe ni rudii Guendariuudxi» (Isaías 9:6, 7). Nga runi, cásica lii ne naa, risácapeʼ nga «[g]unibiáʼ chaahui [nu] ni qué nuluíʼ Dios binni chiqué, ne nga nga Cristu» (Colosenses 2:2). Xi caquiiñeʼ gánnanu de Cristu yaʼ. Primé la? Gucuaa Jiobá xquendanabani Xiiñiʼ, primé ángel ni bizaʼbe guibáʼ, ne guluube ni ndaaniʼ María ti ganda gale Jesús casi ti binni. De raqué bidii Xiiñibe xquendanabani pur laanu ti ganda guibáninu sin qué chuʼ dxi gátinu (Mateo 20:28; Juan 3:16; 17:3).

Yanna chigüeniáʼ lii xcaadxi de secretu riʼ. Gudixhe ique Dios cheʼ stale hombre ne gunaa guibáʼ para guibaninecaʼ Jesús. Xi rábiluʼ chigúnicabe racá yaʼ.... Chiguni mandarnécabe Cristu (Efesios 1:8-12).

Ñee riuulaʼdxuʼ gannuʼ tuu nga chupa chonna de ca binni ni chiguni mandarné Jesús la?... Lade ca binni ca nuu chupa chonna de ca apóstol ni qué nusaana de ñuni ni na Dios, ne nánnanu ni purtiʼ gudxi Jesús laacabe chiguni chaahuiʼ ti lugar para laacabe guibáʼ (Juan 14:2, 3). Lu Mateo 10:2-4, Marcos 15:39-41 ne Juan 19:25, zadxelaluʼ lá chupa chonna de ca binni ni chiguni mandar lu Reinu stiʼ Dios.

Yanna, panda binni cheʼ racá yaʼ. Gudiʼdiʼ stale iza guirutiʼ tu ñanna panda binni nga chiguni mandarné Jesús guibáʼ. Peru yanna maʼ nánnanu ni. Biblia cayabi laanu nácacabe 144,000 (Apocalipsis 14:1, 4).

Yanna, ximodo runi sentirluʼ ra maʼ nánnaluʼ Reinu stiʼ Dios nga secretu sagradu ca yaʼ. Cadi dxandíʼ guizáʼ sicarú ni la?... Galán guʼnuʼ pa qué gusaanaluʼ de guiziidiluʼ de Reinu ca. ¡Pa guʼnuʼ zacá, zacaneluʼ naa güínenu ni xcaadxi binni!

[Ni cá ñee yaza]

GUENDARINABADIIDXAʼ:

▪ Xi secretu nga gudxeʼ lii, ne xiñee lani zacá.

▪ Xii nga secretu ca, ne tu laa guniʼni primé.

▪ Xi rietenaláʼdxiluʼ de secretu sagradu ca.

▪ Ximodo nusiéneluʼ secretu riʼ ca xhamíguluʼ.

[Dibuju/foto ni zeeda lu yaza 31]

Xi gucalaʼdxiʼ ca ángel que ñánnacaʼ