BIBLIOTECA NI NUU LU INTERNET Watchtower
Watchtower
BIBLIOTECA NI NUU LU INTERNET
diidxazá
  • BIBLIA
  • PUBLICACIÓN
  • REUNIÓN
  • w11 15/1 yaza 3-7
  • Guidúʼyanu lá Jiobá casi ti lugar ra zanda guilanu

Gastiʼ nin ti videu de ca ni guliluʼ riʼ.

Bitiidilaʼdxiʼ, guyuu ti error ora cayaca cargar videu riʼ.

  • Guidúʼyanu lá Jiobá casi ti lugar ra zanda guilanu
  • Torre stiʼ ni rapa ni caníʼ de Reinu stiʼ Jiobá 2011
  • Subtítulo
  • Laaca zanda gúʼndaluʼ
  • Dxi biaba nisaguié ne bi yooxhoʼ ni ruzeeteʼ Biblia
  • Zalanu purtiʼ nuunu gaxha de Jiobá ne zalanu ora gueeda dxi stibe
  • Rapa Dios cani rusisaca lá
  • Qué zanda diʼ iquiiñeʼ binni lá Dios casi xiixa ni napa poder para gapa laa
  • Ximodo rilanu ca dxi riʼ
  • ¿Ñee cuyúbinu guilanu ra nuu Jiobá la?
    Torre stiʼ ni rapa ni caníʼ de Reinu stiʼ Jiobá 2017
  • Jiobá zulá guiranu
    Guidúʼndanu né guendanayecheʼ para Jiobá
Torre stiʼ ni rapa ni caníʼ de Reinu stiʼ Jiobá 2011
w11 15/1 yaza 3-7

Guidúʼyanu lá Jiobá casi ti lugar ra zanda guilanu

«Zudieeʼ lugar guiaana ti guidxi [...] ni qué rudxiibaʼ laca laa [...] ne dxandipeʼ zuyúbicabe guilácabe lu lá Jiobá.» (SOF. 3:12)

1, 2. Xi «nisaguié ne bi» chiguniná guiráʼ binni guidxilayú.

ZÁNDACA maʼ huayuu biaje huagaanu ti nisaguié naroʼbaʼ ne bi yooxhoʼ o de granizu ne gupa xidé yechuʼnu xaʼnaʼ ti puente para bilanu. Peru pa ñaca cuxóʼñenu de ti huracán o de ti tornadu la? pur gana si nichuʼnu xaʼnaʼ ti puente.

2 Ca dxi riʼ laaca zedadxiña ti cosa casi ti nisaguié ne bi yooxhoʼ. Nabé nadipaʼ ni dede zanda gunduuxeni guiráʼ binni. Laani nga «dxi guiaba nisaguié ne bi», «dxi jma risaca stiʼ Jiobá», ne zugaandani guidubi naca Guidxilayú. Peru galán nga nuu ti lugar ra zanda guilanu. Biblia na: «Maʼ gaxha nuu dxi jma risaca stiʼ Jiobá. Gaxha nuuni, ne nagueenda zeeda guidxíñani [...]. Dxi ca ti dxi de guendaridxiichi ni, ti dxi naná ne ti dxi para chuʼ binni xizaa, ti dxi guiaba nisaguié ne bi, ne ti dxi para gunidé [...]. Nin plata nin oro stícabe qué zanda gulá laacabe dxi guidxiichi Jiobá; [...] purtiʼ zunitilube guiráʼ ca binni ni nuu lu guidxilayú, ne guizáʼ feu modo chigúnibe ni» (Sofonías 1:14-18). Xi naquiiñeʼ gúninu para chuʼnu lugar ca ora guzulú «dxi guidxiichi Jiobá» yaʼ.

Dxi biaba nisaguié ne bi yooxhoʼ ni ruzeeteʼ Biblia

3. Xii nga «nisaguié ne bi ni caxidxi laa» biaba lu reinu stiʼ Israel.

3 Dxi stiʼ Jiobá ca zuzuluni ora guinitilú guiráʼ religión ni cadi dxandíʼ. Paraa zanda guilá binni yaʼ. Zánnanu ni ora guidúʼndanu ni bizaaca xquidxi Dios. Isaías, ni bibani lu siglu VIII ante de ca dxi stiʼ Jesús, bichaaga modo gusabanáʼ Jiobá guidxi Israel —reinu de chii tribu ni biʼniʼ adorar xcaadxi dios— ne ti «nisaguié ne bi ni caxidxi laa» ne guirutiʼ tu zanda gucueeza ni. Biblia na: «¡Biiyaʼ! Napa Jiobá xiixa ni nadipaʼ ne nandxóʼ. Laani nga ti nisaguié ne bi ni caxidxi laa ra cayaba granizu, nisaguié ne bi para gunitilú, casi ti nisa ziáʼ nadipaʼ ni cuxooñeʼ, ni rundaahua, laani dxandipeʼ nabé naná modo gusábani ca cosa ca layú» (Isaías 28:2). Guca ni na ca diidxaʼ riguixhená ca lu iza 740 ante de ca dxi stiʼ Jesús, dxi binitilú Asiria guidxi Israel.

4. Xi bizaaca Jerusalén lu iza 607 ora beeda «dxi jma risaca stiʼ Jiobá».

4 Gudiʼdiʼ si stale iza de bisabanáʼ Dios guidxi Israel ni qué nuzuubaʼ diidxaʼ que, bedandá sti «dxi jma risaca stiʼ Jiobá». Lu iza 607, laaca bisabanáʼ Jiobá Judá ne Jerusalén, capital stini, purtiʼ biʼniʼ adorarcaʼ xcaadxi dios ni cadi dxandíʼ. Ca babilonio nga bisabanáʼ laacabe, ra guca Nabucodonosor xaíque. Guidxi que biyubi ti «lugar ra cadi dxandíʼ zalá binni», laani nga ora biyúbicabe chúʼcabe tobi si né Egipto. Peru pur gana si ni bíʼnicabe que. Cásica runduuxeʼ granizu ora guiaba ti lugar la? zaqueca binduuxeʼ ca babilonio guidxi ni nácabe zanda gacané laacabe que (Isa. 28:14, 17).

5. Xi zazaaca xquidxi Dios ora guinitilú guiráʼ ca religión ni qué rusiidiʼ ni dxandíʼ.

5 Dxi jma risaca stiʼ Jiobá ni beeda luguiáʼ Jerusalén que cusihuínnini ximodo zusabanáʼ Dios ca religión ni nacaʼ zinándacaʼ Cristu purtiʼ runi adorarcaʼ xcaadxi dios ni cadi dxandíʼ. Zacaca nga zanitilú xcaadxi xpinni «Babilonia, guidxi roʼ», ni zeeda gaca guiráʼ ca religión ni qué rusiidiʼ ni dxandíʼ. Despué de nga zanitilú xcaadxi cosa ni nuu lu guidxilayú stiʼ Binidxabaʼ riʼ. Peru zalá xquidxi Dios purtiʼ ruuyacabe Jiobá casi tuuxa ni zanda gapa laacabe (Apo. 7:14; 18:2, 8; 19:19-21).

Zalanu purtiʼ nuunu gaxha de Jiobá ne zalanu ora gueeda dxi stibe

6. Laanu, ca xpinni Jiobá, ximodo ndiʼ ridxélanu ti lugar ra zanda guilanu.

6 Ca dxi stinu riʼ, ra mayaca guinitilú ca cosa nuu yanna, laanu, ca xpinni Cristu zanda guyúbinu ti lugar ra guilanu. Ximodo yaʼ. Para ganda gapa Jiobá laanu la? naquiiñeʼ «guiníʼ íquenu lu labe» ne gúninu ni nabe né stale gana. Biblia na: «Dxi que, cani ridxibi Jiobá guníʼnecaʼ xcaadxi binni, cada tobi guniʼné xcompañeru, ne bicaadiaga chaahuiʼ Jiobá laacabe. Ne nezalube bizulú gucuá lu ti libru lá cani ridxibi Jiobá ne lá cani riníʼ ique lu labe para guietenaláʼdxibe laacaʼ» (Malaquías 3:16). Peru, riénenu cadi naquiiñeʼ si guiníʼ íquenu lu labe. Biblia cusiene sicaríʼ: «Guiráʼ tu iquiiñeʼ lá Jiobá ora guinabaʼ gacanebe laa la? zalá» (Rom. 10:13, NM). Casi maʼ bidúʼyanu ca, para ganda guilanu la? napa xidé iquiiñenu lá Jiobá. Stale binni ni nayá ladxidóʼ rudiicaʼ cuenta maʼ gadxé laanu de cani qué ruzuubaʼ stiidxaʼ Dios, purtiʼ «riníʼ [íquenu] lu labe» ne rúninu ni nabe purtiʼ nácanu Testigu stibe.

7, 8. Ximodo bilá ca xpinni Cristu ni bibani lu primé siglu que, ne xiñee zanda guchaaganu laacabe né laanu.

7 Yanna, ora rabi Jiobá laanu zanda guilanu la? cadi caníʼsibe zápabe laanu purtiʼ nuunu gaxha de laabe. Laaca cayábibe laanu zalanu ora gueeda dxi stibe. Guidúʼyanu xiñee dxandíʼ ni pur ni bizaaca lu iza 66 despué de ca dxi stiʼ Jesús, ora bicaalú Cestio Galo ne ca soldadu de Roma guidxi Jerusalén. Jesús maca guníʼ: «[Z]ucueeza dxí Dios» ca dxi jma nagana que (Mat. 24:15, 16, 21, 22). Guca ni na ca diidxaʼ riguixhená que ora málasi gundisaʼ ca soldadu que leʼ ni naguucaʼ guidxi que ne zecaʼ. Zaqué gunda bilá caadxi «binni», laacabe nga cani dxandíʼ xpinni Cristu, cani maca bizeeteʼ Jesús zalá que. Laacabe gunda bixooñecabe de guidxi que ne de xcaadxi guidxi huiiniʼ nuu gaxha de laani, ne guyuu caadxi de laacabe ni gudiʼdiʼ guiiguʼ Jordán ne bicachilúcabe lade ca dani ni nuu neza ra rindani gubidxa stiʼ guiiguʼ que.

8 Zanda guchaaganu ca xpinni Cristu ni bibani lu primé siglu que né laanu, cani cayuni adorarnu Dios ca dxi riʼ. Xiñee yaʼ. Purtiʼ guyécabe lugar ra gudxi Jiobá laacabe zalácabe, ne zacaca nga naquiiñeʼ gúninu. Peru laanu maʼ cadi caquiiñeʼ diʼ chuunu xiixa lugar para guilanu casi guyécabe, purtiʼ nuunu lu guidubi naca Guidxilayú. Neca zacá, xquidxi Dios —ra nuu «ca xpinni be» ni bibí ne xcaadxi xpínnibe ni qué rusaana laabe— zalacaʼ ora guinitilú ca religión ni qué rusiidiʼ ni dxandíʼ, pa guyúbicaʼ guilacaʼ ra nuu Jiobá ne chuʼcaʼ ndaaniʼ xquídxibe, ni ruzeeteʼ Biblia zeeda gaca casi ti dani.

9. Tuu nga cani huayacalaʼdxiʼ gusiaandaʼ binni lá Dios. Bizeeteʼ ti ejemplu.

9 Ca religión ni qué rusiidiʼ ni dxandíʼ ca, caquiiñepeʼ nga guinitilucaʼ, purtiʼ pur laacabe stale de ca xpínnicabe qué ganna de Dios ne rusihuínnicabe nanaláʼdxicabe lá Dios. Lu ca iza 500 hasta 1500 despué de ca dxi stiʼ Jesús, ndaaniʼ stale guidxi nuu Europa qué ridxagayaa binni guʼyaʼ lá Dios lu tapa letra hebreu ni runibiáʼcabe casi Tetragrámaton ne rutiixhicabe ni YHWH (o JHVH). Gucuani lu moneda, lu stale libru ne Biblia, ra puertaʼ stiʼ stale yoo dede né ra puertaʼ yuʼduʼ stiʼ ca católicu ne ca protestante. Peru ca dxi stinu riʼ maʼ huaxiéʼ rucaacabe ni lu ca Biblia cayúnicabe ne lu xcaadxi cosa. Ti ejemplu de laani nga «Carta a las Conferencias Episcopales sobre “el Nombre de Dios”», ni bicaa Congregación para el Culto Divino y la Disciplina de los Sacramentos, ni biree 29 stiʼ junio iza 2008. Lu carta que na Iglesia Católica iquiiñecabe diidxaʼ «Señor» lugar de iquiiñecabe tobi de ca modo zanda guiníʼ binni lá Dios né Tetragrámaton. Ne guníʼ Vaticano cadi iquiiñeʼ diʼ binni lá Dios ne cadi guzeeteni ora guʼndaʼ ne ora guni rezá ora maʼ cayuni adorar. Ne ca xaíque stiʼ ca religión ni na zinanda Cristu ne xcaadxi religión, laaca qué rusiidicaʼ ca xpínnicaʼ tu lá Dios, zacá nga casi ora nucaachicabe tu labe nezalucaʼ.

Rapa Dios cani rusisaca lá

10. Ximodo rusisaca binni lá Dios yanna.

10 Rihuinni dxíchica gadxé ca testigu stiʼ Jiobá de xcaadxi religión. Xiñee yaʼ. Purtiʼ laacaʼ rusisácacaʼ lá Dios ne riquiiñecaʼ ni né respetu. Nabé riechené Dios ca binni ni runi cré zanda gacanebe laacaʼ ne ora tiisi iquiiñecaʼ xiixa rúnibe ni para uguube ndaayaʼ laacaʼ ne gápabe laacaʼ. Laabe runibiáʼ chaahuibe tuu nga «cani ruyubi guilá ra nuube» (Nah. 1:7; Hech. 15:14).

11, 12. Tuu nga cani qué nusaana de ñuni ni na Dios ndaaniʼ guidxi Judá, ne tu laa cayuni zacaca ca dxi stinu.

11 Nécapeʼ biʼniʼ adorar stale binni de Judá xcaadxi dios ni cadi dxandíʼ la? guyuu tu laa biyubi guilá «lu lá Jiobá». Biblia na: «Zudieeʼ lugar guiaana ti guidxi galaa de lii, tobi ni qué rudxiibaʼ laca laa, ne maʼ gucaná, ne dxandipeʼ zuyúbicabe guilácabe lu lá Jiobá» (Sofonías 3:12). Xi bizaaca ca binni ca dxi bisabanáʼ Dios Judá purtiʼ qué ñapa fe laabe yaʼ. Bilácabe dxi biuu ca babilonio que ndaaniʼ guidxi que, binitilucaʼ ni ne zinecaʼ ca binni que de esclavu. Nga nga ni bizaaca Jeremías, Baruc ne Ébed-mélec, ca hombre ni bibani lade ca binni ni biʼniʼ adorar xcaadxi dios ni cadi dxandíʼ. Caadxi de ca binni ni yenécabe de esclavu, qué nusaanacaʼ de ñúnicaʼ ni na Dios. Peru lu iza 539 ante de ca dxi stiʼ Jesús, beeda Ciro, xaíque stiʼ ca medo ne ca persa ne binitilucaʼ Babilonia. Qué nindaa de ngue gulee Ciro ti ley ra na zanda guibiguetaʼ caadxi judíu de ca judíu que xquídxicaʼ.

12 Casi guníʼ Sofonías que, bilá Dios cani gucané binni para gaca adorar Jiobá jneza sti biaje ne nabé biéchebe pur laacaʼ. Biblia na: «Ca dxi que zábicabe Jerusalén: “Cadi guidxíbiluʼ, Sión. Cadi gudiiluʼ lugar guiaba naluʼ. Jiobá Dios stiluʼ nuu ládetu. Casi tobi ni napa stale poder zulá laatu. Ziechenebe lii. Zatadxí ladxidoʼbe ora gusihuínnibe nadxiibe lii. Ziéchebe pur lii ne zúnibe ridxi tantu cayéchebe» (Sofonías 3:16, 17). Ca dxi stinu riʼ laaca cayaca ni na ca diidxaʼ riguixhená ca. Despué de bizulú cayuni mandar Reinu stiʼ Dios guibáʼ la? bilá Jiobá caadxi xpinni ni bibí né espíritu santu, ora guleebe laacaʼ de lu náʼ Babilonia guidxi roʼ. Ne dede yanna riéchebe pur laacaʼ.

13. Xi ndaayaʼ cacaa stale binni de guiráʼ guidxi.

13 Ca xpinni Cristu ni cabeza guibani lu Guidxilayú riʼ sin gáticaʼ, laaca maʼ bireecaʼ de lu náʼ Babilonia guidxi roʼ ne de cani cadi dxandíʼ rusiidini (Apo. 18:4). Nga runi, ca dxi stinu riʼ nga cayaca ni na ca diidxaʼ riguixhená ni zeeda lu Sofonías 2:3: «Laguyubi Jiobá, guiráʼ cani nachaʼhuiʼ ni nuu lu guidxilayú riʼ». Ca dxi stinu riʼ nuu stale binni nadóʼ de guiráʼ guidxi, caadxi de laacaʼ zabani guibáʼ ne xcaadxi zabani lu Guidxilayú, ne guiracaʼ ruyúbicaʼ guilacaʼ lu lá Jiobá.

Qué zanda diʼ iquiiñeʼ binni lá Dios casi xiixa ni napa poder para gapa laa

14, 15. 1) Xi huaquiiñeʼ binni casi talismán para gapa laa. 2) Xii nga ni cadi naquiiñeʼ guidúʼyanu casi ti amuletu.

14 Ca binni ni bibani tiempu stiʼ Jeremías que guníʼ íquecaʼ naca yuʼduʼ que casi ti amuletu ni zulá laacaʼ de ca xhenemígucaʼ (Jer. 7:1-4). Ne stale iza ante, ca israelita que biiyacaʼ guiña stiʼ pactu que casi ti talismán ni zulá laacaʼ ora tíndenecaʼ sti guidxi (1 Sam. 4:3, 10, 11). Gudiʼdiʼ si stale siglu, Constantino ni huaniisi, laaca biʼniʼ cré ni biʼniʼ crécabe que neca cadi jneza ni. Laabe biʼniʼ mandarbe guicá ca letra kji ne rho, modo ruzulú ricá lá «Cristu» lu griegu lu ca escudu stiʼ ca soldadu stibe. Xiñee yaʼ. Purtiʼ guníʼ íquebe zaqué zalá ca soldadu stibe ora maʼ chitíndecaʼ. Ne ruluíʼ ngaca nga ni biʼniʼ rey Gustavo II Adolfo de Suecia, ni gudinde lu ti guerra ni bindaa treinta iza. Laabe biquiiñebe ti guiibaʼ ni racu ca soldadu ra cá caadxi letra ni na «Iehova» (biiyaʼ yaza 7).

15 Nuu xpinni Cristu rinábacaʼ gapa Jiobá laacaʼ ora gacalaʼdxiʼ ca demonio ca guniná laacaʼ ne rúnicabe ni ora riníʼcabe labe. Peru cadi liica naquiiñeʼ guni crenu napa ca cosa casi talismán o amuletu ra cá lá Jiobá poder para gulá laanu de xiixa. Cadi nga diʼ nga riníʼ ca diidxaʼ guyúbinu guilanu lu lá Jiobá.

Ximodo rilanu ca dxi riʼ

16. Ximodo rapa Dios laanu ca dxi riʼ.

16 Ca dxi riʼ cayapa Jiobá laanu ndaaniʼ xquidxi purtiʼ nuunu gaxha de laa (Sal. 91:1). Laabe riquiiñebe «mozo ni nuu xpiaaniʼ ne ni runi jneza» ne ca binnigola para quixhenabe laanu de ca cosa ni nuu ndaaniʼ guidxilayú riʼ ni zanda guxheleʼ laanu de xquídxibe (Mat. 24:45-47; Isa. 32:1, 2). Guiníʼ íquesinu panda biaje maʼ huaguixhenácabe laanu de guendarapa bidxichi, ne ximodo huayacané ca conseju ca laanu para cadi gacananu ne guixélenu de Dios. Ne laaca ribeendunu stale cosa ora rucaadiáganu ca conseju ni rudiicabe laanu para cadi gácanu binni ni qué rizaalaʼdxiʼ guni xhiiñaʼ, purtiʼ pa gácanu zacá chaahuiʼ chaahuiʼ zusaananu de gúninu jma lu xhiiñaʼ Jiobá. Nga runi, jneza nga ni riníʼ Biblia né ca diidxaʼ riʼ: «Cumu qué rizaalaʼdxiʼ ca binni ni qué riene gúnicaʼ xhiiñacaʼ la? zanitilucaʼ; peru ni gucaadiaga naa la? zabani galán, qué ziuu tu guchiichi laa ne qué zadxibi guizaaca xiixa desgracia» (Pro. 1:32, 33, Biblia de América). Para cadi gusaana de gapa Jiobá laanu naquiiñeʼ gúninu stipa pur chuʼnu nayá nezalube.

17, 18. Ximodo cayacanenu millón de binni para guyubi guilá lu lá Jiobá.

17 Mozo ni nuu xpiaaniʼ cadi cusaana de gabi laanu gucheechenu ca diidxaʼ nacubi ne galán stiʼ Reinu lu guidubi naca Guidxilayú, casi biʼniʼ mandar Jesús, ne galán guiníʼ íquenu conseju ca (Mat. 24:14; 28:19, 20). Sofonías guníʼ ziuu ti cosa ni zacané binni guyubi guilá lu lá Jiobá: «Zuchaaʼ diidxaʼ riníʼ stale guidxi ne zudieeʼ laacaʼ ti diidxaʼ nayá, para gucaacaʼ ridxi lá Jiobá, para gúnicabe ni nabe tobi si» (Sof. 3:9).

18 Xii nga «diidxaʼ nayá» ca yaʼ. Laani nga guiráʼ ni dxandíʼ maʼ bizíʼdinu de Jiobá ne cani naguixhe íquebe gúnibe, ni zeeda lu Stiidxabe. Riquiiñenu ni zeeda gaca casi ti «diidxaʼ» ca guiráʼ biaje rusiénenu binni xii nga Reinu stiʼ Dios ne ximodo zusisácani lá Dios. Laaca riquiiñenu ni ora rininu Dios si nga napa derechu de guni mandar ne ora rininu de ca ndaayaʼ ni qué zará ni chigudii Dios guiráʼ ca binni ni guni ni nabe. Stale de laanu maʼ rininu diidxaʼ ca ne cayacanenu jma binni «gucaacaʼ ridxi lá Jiobá» ne gúnicaʼ ni nabe casi ñácacaʼ «tobi si». Dxandíʼ maʼ nuu millón de hombre ne gunaa lu guidubi naca Guidxilayú ni cuyubi guilá ra nuu Jiobá (Sal. 1:1, 3).

19, 20. Xi bizaaca ca israelita ni biʼniʼ cré zanda guilacaʼ «lugar ra cadi dxandíʼ zalá binni».

19 Ca binni Guidxilayú ridíʼdicaʼ lu stale guendanagana ni ruluíʼ qué zanda gaca chaahuiʼ. Cumu qué ridxélacabe xi gúnicabe la? riécabe ra nuu binni casi laacabe para gacané laacabe. O ribézacabe guni chaahuiʼ gobiernu ca guendanagana stícabe, cásica biʼniʼ ca israelita ora bidaagucaʼ ca guidxi nuu gaxha de laacaʼ. Cásica bizaaca dxiqué, ca binni riʼ zudiicaʼ cuenta caguitesícabe laacaʼ. Nin ti grupu políticu —nin Naciones Unidas— qué zanda guni chaahuiʼ guiráʼ ca guendanagana cadiʼdiʼ binni. Pur gana si nga guʼyaʼ binni ca grupu políticu ca casi ti lugar ra zanda guilacaʼ, purtiʼ nácacani «ti lugar ra cadi dxandíʼ zalá binni». Ca diidxaʼ riguixhená ni zeeda lu Biblia na nácacabe casi ti lugar ra cadi dxandíʼ zalá binni. Nápanu stale razón para guni crenu zacá ni, purtiʼ cani guni cré laacabe ziaande si lucaʼ ora gúʼyacaʼ qué zanda gacanécabe laacaʼ. Biblia na: «Purtiʼ laatu maʼ guniʼtu: “Maʼ bínidu ti pactu né guendaguti para cadi guuti laadu; ne lu ti visión maʼ gúdxidu Seol qué ziuudinu ndaaniʼ; ora gueeda ca guendanagana ca, casi nisa ni rundaahua, pa tiidini, qué zugaandadini laadu, purtiʼ ti lugar ra cadi dxandíʼ zalá binni nga rábidu zanda guiladu ne maʼ bicachiludu lu guendarusiguii» (Isaías 28:15).

20 Maʼ cadi candaa, ora guedandá dxi jma risaca stiʼ Jiobá, zusábabe ni zeeda gaca casi granizu lu Guidxilayú. Ora guedandá dxi ca, pur gana si guiníʼ ique binni zanda guilá ca lugar ra na binni qué zuniná bomba atómica, qué zaquiiñeʼ bidxichi stícabe nin sti lugar ni gúnicabe para guilácabe. Casi na Isaías 28:17: «Zunduuxeʼ granizu ca lugar ra cadi dxandíʼ zalá binni, ne zundaahua ca nisa ca ra rucaachilú binni».

21. Xi zabeendunu pa guibáninu modo na textu ni caquiiñenu lu iza 2011.

21 Jiobá nga cayapa laanu ca dxi riʼ, ne zúnirube ni ora maʼ guidxiña dxi gunduuxebe guiráʼ cosa malu nuu yanna riʼ. Galán gánnanu riníʼ lá Sofonías «Jiobá maʼ bicaachiʼ», nga runi zanda guininu ra nuusibe nga ti lugar ra zanda guilá binni. Pur nga, biáʼsipeʼ nga iquiiñenu lu iza 2011 textu ni biree lu Sofonías 3:12: Guidúʼyanu lá Jiobá casi ti lugar ra zanda guilanu. Casi maʼ bidúʼyanu ca, yanna nga naquiiñeʼ guyúbinu guilanu lu lá Dios, ra guni crenu laabe de guidubi ladxidoʼno (Sal. 9:10). Cadi guiaandaʼ laanu ca diidxaʼ ni zeeda lu Stiidxabe riʼ: «Lá Jiobá zeeda gaca casi ti torre nadipaʼ. Ra nuuni rié binni nachaʼhuiʼ para guilá» (Pro. 18:10).

Cani guietenaláʼdxinu

• Ximodo nga ruyúbinu guilanu lu lá Jiobá ca dxi riʼ.

• Xiñee cadi naquiiñeʼ guni crenu zalanu «lugar ra cadi dxandíʼ zalá binni».

• Xiñee nánnanu dxandíʼ zalanu ora gueeda dxi stiʼ Jiobá.

[Ni caníʼ yaza 6]

Ndiʼ nga textu para iza 2011: Guidúʼyanu lá Jiobá casi ti lugar ra zanda guilanu (Sofonías 3:12)

[Paraa gucuaacabe dibuju o foto ni zeeda lu yaza 7]

Thüringer Landesmuseum Heidecksburg Rudolstadt, Waffensammlung “Schwarzburger Zeughaus”

    Libru ne revista zapoteco del Istmo (1993-2025)
    Biteeguʼ sesión
    Bizulú sesión
    • diidxazá
    • Compartir
    • Configuración
    • Copyright © 2025 Watch Tower Bible and Tract Society of Pennsylvania
    • Modo iquiiñeʼ ni
    • Política de privacidad
    • Configuración de privacidad
    • JW.ORG
    • Bizulú sesión
    Compartir