Laguzuubaʼ stiidxaʼ cani runi dxiiñaʼ nadipaʼ ládetu
«Rinaba du laatu icaa tu stiidxa cani runi dxiiña lade tu, cani za niru lú tu ne rabi laatu xi na Señor guni tu.» (1 TES. 5:12)
1, 2. 1) Xi cazaaca neza binni ridagulisaa de Tesalónica dxi bicaa Pablu primé carta stiʼ ra nuucabe. 2) Xi conseju bidii apóstol Pablu laacabe.
BIXUIʼLÚ nácaluʼ tobi de ca binni ni nuu ndaaniʼ neza binni ridagulisaa ni nuu Tesalónica lu primé siglu que, laani nga tobi de ca primé ni guyuu Europa. Apóstol Pablu guyuu stale tiempu raqué para gucané laacabe iguidxi fe stícabe ne guluu gana laacabe. Ne cásica huayúnibe xcaadxi lugar, laaca gulibe tu gaca binnigola ndaaniʼ neza binni ridagulisaa que para gapa ca dendxuʼ stiʼ Jiobá (Hech. 14:23). Peru dxi maʼ guyáʼ neza binni ridagulisaa que la? ca judíu que bicaacaʼ binni guiladxi Pablu ne Silas de guidxi que. Zándaca biʼniʼ sentir ca xpinni Cristu de Tesalónica stúbicaʼ ne bidxíbicaʼ stale.
2 Cani maʼ guninu ca rusihuínnicani nabé guyuu Pablu xizaa pur ca xpinni Cristu ni nuu ndaaniʼ neza binni ridagulisaa ni nacubi bizulú que. Ne biʼniʼ apóstol ca stipa pur guibiguetaʼ ndaaniʼ guidxi ca sti biaje, peru «bicueeza binidxaba» laabe. Ngue runi biseendabe Timoteu raqué para guquidxi fe stiʼ ca xpinni Cristu (1 Tes. 2:18; 3:2). Despué de ngue bibiguetaʼ Timoteu ra nuube ne gudxi laabe guiráʼ cosa sicarú cazaaca ndaaniʼ neza binni ridagulisaa que, ne óraque biseendaʼ Pablu ti carta ni guluu gana laacabe. Lu carta que bicaabe conseju riʼ: «Rinaba du laatu icaa tu stiidxa [...] cani za niru lú tu» (biindaʼ 1 Tesalonicenses 5:12, 13).
3. Xiñee naquiiñeʼ gannaxhiicabe ca binnigola de Tesalónica jma.
3 Ca binnigola nuu Tesalónica qué gánnacaʼ biaʼ nanna Pablu ne ca xcompañeru, ne huaxiéʼ tiempu nápacabe de cayúnicabe xhiiñaʼ Dios pa guchaaganu ni né tiempu napa ca binnigola ni nuu Jerusalén. Ne zacá ni, purtiʼ deruʼ ti iza napa de bizulú neza binni ridagulisaa ni nuu Tesalónica. Neca zaqué, biluíʼ apóstol Pablu laacabe chonna razón para gudiicabe xquíxepeʼ pur nápacabe ca pastor que ra ridagulisaacabe, sicaríʼ gúdxibe laacaʼ: Laacabe rúnicabe «dxiiña lade tu» ne zanírucabe «lú tu ne rabi[cabe] laatu xi na Señor guni tu». Ne laaca gúdxibe laacaʼ naquiiñeʼ gusisácacaʼ «laacabe ne [gannaxhiicaʼ] laacabe». Ne maʼ para guilúxebe gúdxibe laacaʼ «cadi chuʼ dinde[caʼ]». Pa ñuuluʼ ndaaniʼ neza binni ridagulisaa de Tesalónica, ñee nusisácaluʼ dxiiñaʼ stiʼ ca binnigola de raqué la? Yanna, ñee rusisácaluʼ ca binnigola nuu ra ridagulisaaluʼ la? Ñee ruuyaluʼ laacabe casi gracia bidii Dios binni o casi ti cosa ni bisigaʼdeʼ Dios pur Cristu la? (Efe. 4:8.)
Rúnicabe dxiiñaʼ nadipaʼ
4, 5. Xiñee guníʼ Pablu nadipaʼ cayuni ca binnigola bibani tiempu stibe que dxiiñaʼ, ne xiñee zanda guininu zacaca nga cayuni ca binnigola dxiiñaʼ yanna.
4 Casi maʼ bidúʼyanu ca, xi biʼniʼ ca binnigola ni nuu Tesalónica despué de biree Pablu ne Silas raqué ne zecaʼ Berea yaʼ. Qué nusaanacabe de ñúnicabe dxiiñaʼ nadipaʼ. Dxandíʼ bíʼnicabe stipa pur gusiidicabe ca binni que de Stiidxaʼ Dios cásica biʼniʼ apóstol que. Peru Biblia na ca de Berea «jma nachaʼhui ca [...] que cani nuu Tesalónica, purti bicaa diaga ca stiidxa Dios ne stale gana ne irá dxi ma cuyubi ca lu Xquiʼchi Dios» (Hech. 17:11). Ñee riníʼ nga qué rusisaca ca xpinni Cristu de Tesalónica Stiidxaʼ Dios la? Coʼ. Cadi caníʼ diʼ apóstol ca de ca xpinni Cristu ni nuu Tesalónica, sínuque caniʼbe de guiráʼ ca judíu ni nabeza ndaaniʼ guidxi que. Laapebe guniʼbe sicaríʼ: «Ucuaa tu ca diidxa byuí né du laatu casi stiidxa Dios ne cadi casi stiidxa binni» (1 Tes. 2:13). Rihuínnica biʼniʼ ca binnigola que stale dxiiñaʼ para gunda gacanecaʼ cani gucuaa Stiidxaʼ Dios que para chuʼcaʼ gaxha de laabe.
5 Ca dxi stinu riʼ, «mozo ni nuu xpiaaniʼ ne ni runi jneza» cudii guiráʼ ni caquiiñeʼ ca dendxuʼ stiʼ Dios (Mat. 24:45). Ne rucaacabe stale libru ne revista lu stale diidxaʼ, ne laaca rudiicabe xcaadxi cosa ni zanda iquiiñecaʼ, casi Índice de las publicaciones Watch Tower ne programa Watchtower Library. Mozo ni nuu xpiaaniʼ ruluíʼ ca binnigola ximodo gacanecaʼ ca xpinni Cristu para gaca fe sticaʼ naguidxi. Para ganda gacanécabe ca xpinni Cristu ni nuu ra ridagulisaacabe la? ribeecabe stale tiempu para gúnicabe ca libana ni riquiiñecabe para gusiidicabe ne para uguucabe gana laacaʼ. Stale de laacabe laaca rudiicabe libana lu ca guendaridagulisaa roʼ. Ñee huaníʼ íquenu guiráʼ tiempu ribeecabe para gúnicabe guiráʼ ni maʼ guninu ca la?
6, 7. 1) Xi ejemplu bisaana Pablu para ca binnigola de Tesalónica. 2) Xiñee zándaca gaca nagana para ca binnigola ni nuu yanna chinándacaʼ ejemplu stiʼ apóstol Pablu.
6 Ca binnigola ni guyuu Tesalónica qué nusiaandacaʼ ejemplu stiʼ Pablu ora gúpacaʼ ca xpinni Cristu. Qué niganna Pablu laacabe purtiʼ si napa xidé gúnini. Lu tema gudídinu ca bidúʼyanu gúcabe nachaʼhuiʼ ne laacaʼ «casi runi ti gunaa ne ca xiiñiʼ» ora maʼ cusiniisi laacabe (biindaʼ 1 Tesalonicenses 2:7, 8). Ne pa ñanda la? né xquendanabánibe nudiibe para ñacanebe laacaʼ. Zacaca nga naquiiñeʼ gapa ca binnigola de Tesalónica ca binni ridagulisaa.
7 Ca binnigola nuu yanna laaca naquiiñeʼ gápacaʼ ca dendxuʼ stiʼ Dios, gácacaʼ nachaʼhuiʼ ne gannaxhiicaʼ ca xpinni Cristu cásica biʼniʼ Pablu. Cadi guiráʼ diʼ xpinni Cristu riuulaʼdxiʼ guicaa conseju ne cadi guirádicabe nacháʼhuicabe, peru ti binnigola ni nuu xpiaaniʼ la? riuulaʼdxiʼ guʼyaʼ ca cosa galán cayuni cada tobi de laacabe (Pro. 16:20). Peru cumu binni ruchee laabe la? ziuu ora zaca nagana para laabe gúʼyabe ca cosa galán ni runi chupa chonna de laacabe. Neca zacá naquiiñeʼ gúnibe stipa pur chinándabe ejemplu stiʼ Pastor Chaʼhuiʼ ne gannaxhiibe guiracaʼ. Cadi dxandíʼ riquiiñeʼ gudiʼnu xquíxepeʼ laacabe pur guiráʼ stipa rúnicabe la?
8, 9. Ximodo nga rapa ca binnigola laanu.
8 Nabé risaca guzuubaʼ ca xpinni Cristu stiidxaʼ ca binnigola. Xiñee yaʼ. Purtiʼ casi guníʼ Pablu que cayápacabe laanu (Heb. 13:17). Cásica ribee xcaandaʼ ti pastor huaxhinni ora maʼ cayapa ca dendxuʼ stiʼ, zacaca nga runi ca binnigola, purtiʼ laaca ribee xcaandacaʼ para gacanecaʼ ca xpinni Cristu ni napa xiixa guendanagana, casi pa maʼ caxélecaʼ de Dios, pa nuucaʼ triste o pa huaracaʼ. Nuu biaje, cani runi dxiiñaʼ lu Grupu de Binnigola ni Riniʼné ca doctor riásacaʼ huaxhinni para chiguuyacaʼ ti xpinni Cristu ni bizaaca xiixa. ¡Guizáʼ rudiʼnu xquíxepeʼ laacabe purtiʼ racanécabe laanu órapeʼ jma caquiiñenu laacabe!
9 Laaca naquiiñeʼ gacanenu ca binnigola ni ruuyaʼ modo gaca Yoo stiʼ Reinu ne cani racané ora guizaaca xiixa desgracia. Guiníʼ íquenu guiráʼ modo gucanécabe ca xpinni Cristu de Myanmar (dxiqué biree lani Birmania) gudiʼdiʼ si ti ciclón ni láʼ Nargis lu iza 2008 raqué. Tobi de ca lugar ra jma gucaná nga ti guidxi huiiniʼ nuu ruaa guiiguʼ Irauadi, ra nuu ti neza binni ridagulisaa ni láʼ Pothigon. Para gunda yendá ca binni ni chigacané laacabe, gupa xidé gudíʼdicaʼ guiráʼ ra bininá ciclón que ne riʼ stale gueʼtuʼ. Lade ca primé binni ni yendá raqué nuu ti binnigola ni yeganna ca binni ridagulisaa de guidxi que. Ora biiyaʼ ca xpinni Cristu laabe biéchecaʼ ne guniʼcaʼ: «¡Laguuyaʼ, maʼ beeda binnigola ni beeda ganna neza binni ridagulisaa stinu dxiqué! ¡Maʼ bilá Jiobá laanu!». Cásica laacabe, ñee rusisácanu dxiiñaʼ nadipaʼ runi ca binnigola ridxíʼ ne huaxhinni la? Laaca cadi naquiiñeʼ gusiáʼndanu ca binnigola ni qué ruchá bi yanni purtiʼ gulícabe laacaʼ para guni juzgarcaʼ xiixa guendanagana ni gapa ti xpinni Cristu (Mat. 6:2-4). Ca binni ni ricaa conseju stícabe rudiicaʼ xquíxepeʼ laacabe de guidubi ladxidoʼcaʼ.
10. Xi dxiiñaʼ ni huaxiéʼ rihuinni runi ca binnigola.
10 Peru stale binnigola rúnicaʼ xcaadxi dxiiñaʼ ndaaniʼ neza binni ridagulisaa. Casi binnigola ni ruuyaʼ dxiiñaʼ ni runi grupu de binnigola la? rúnibe ca guiʼchiʼ ra cá tu laa chigudii libana lu ca guendaridagulisaa raca guiráʼ semana. Secretariu ca rutopa ca hora rúninu ora rucheechenu diidxaʼ ti beeu ne cani rúninu guidubi ti iza ndaaniʼ neza binni ridagulisaa. Binnigola ni rutiidiʼ scuela ruuyaʼ chaahuiʼ tu laa zanda gutiidiʼ libana. Ne cada chonna beeu ruuyaʼ ti binnigola ximodo nuu ca guiʼchiʼ ra cá pabiáʼ bueltu riaba ndaaniʼ ca caja ni nuu ndaaniʼ Yoo stiʼ Reinu. Ne guiráʼ ca binnigola ruundacaʼ ca carta ni ruseendaʼ Betel ne rinándacaʼ ni nácani ti zacá «gaca nu tobi si lu ni runi cre nu» (Efe. 4:3, 13). Ca dxiiñaʼ ca racanécani para «gaca [guiráʼ ca cosa ca] jneza» (1 Cor. 14:40).
«Cani za niru lú tu»
11, 12. Tuu nga cani zaniruʼ ndaaniʼ neza binni ridagulisaa, ne xi dxiiñaʼ rúnicabe.
11 Lu carta ni bicaa Pablu ra nuu ca xpinni Cristu de Tesalónica, laaca gúdxibe laacaʼ «za niru» ca binnigola lucaʼ (1 Tes. 5:12). Raríʼ ridúʼyanu laaca ca binnigola riʼ nga ni maca bizeetebe «runi dxiiña lade[cabe]». Nga runi, guirácabe nga zanírucabe lu ca binni ridagulisaa, ne cadi tobi si. Ca dxi stinu riʼ dxandíʼ zanda guininu zuhuaa ca binnigola nezalú ca xpinni Cristu ora raca ca guendaridagulisaa. Ne maʼ bidxaa modo rábicabe «binnigola ni rapa guiráʼ stiʼ binni ridagulisaa», yanna maʼ labe «binnigola ni ruuyaʼ dxiiñaʼ ni runi grupu de binnigola» ne nga racané laanu guidúʼyanu guirutiʼ nga jma risaca ládecabe ne cayúnicabe dxiiñaʼ tobi si.
12 Yanna, qué zanda diʼ guininu zaniruʼ ti binnigola lade ca binni ridagulisaa purtiʼ si rusiidibe laacaʼ, sínuque naquiiñeʼ gúnibe xcaadxi cosa. Pablu biquiiñeʼ laaca diidxaʼ ca lu 1 Timoteo 3:4, ora bisiénebe naquiiñeʼ gaca ti binnigola «tobi ni nanna guni mandar ndaani lidxi ne usiidi ca xiiñi uzuuba diidxa sin icabi ruaa». Ca diidxaʼ ca rusihuinni cani cadi naquiiñeʼ gusiidisibe xiiñibe, sínuque laaca naquiiñeʼ guzuubacaʼ stiidxabe ne laaca naquiiñeʼ ganna hombre ca guluíʼ binnilidxi xi naquiiñeʼ guni. Zacaca nga ca binnigola naquiiñeʼ guluiʼcaʼ ca binni ridagulisaa xi naquiiñeʼ gúnicaʼ ne gacanécabe laacaʼ guzuubacaʼ Stiidxaʼ Jiobá (1 Tim. 3:5).
13. Xiñee nuu biaje riné ca binnigola ca stale tiempu para chuʼcaʼ tobi si ora quixhe íquecaʼ gúnicaʼ xiixa.
13 Para ganda gapa ca binnigola neza binni ridagulisaa galán la? naquiiñeʼ guidagulisaa guirácabe para gúʼyacabe xi caquiiñeʼ ca xpinni Cristu ne ximodo gacanécabe laacaʼ. Zándaca guinabadiidxanu laca laanu pa jma galán ñuuyaʼ tobi si de laacabe xi naquiiñeʼ gaca ndaaniʼ ti neza binni ridagulisaa. Peru ca binnigola de yanna rinándacaʼ ejemplu stiʼ Grupu ni Zaniruʼ ni guyuu lu primé siglu. Ora ridagulisaacabe rucaadiágacabe ni riníʼ guiráʼ ca binnigola ne ruuyacabe xiná Biblia para gánnacabe xi conseju jma jneza chinándacabe para gacanécabe ca binni ridagulisaa. Cada tobi de laacabe racané para guireendú ni galán lu ca guendaridagulisaa ca, purtiʼ dede ante ruuyacabe xiná Stiidxaʼ Dios ne xi huaníʼ mozo ni nuu xpiaaniʼ naquiiñeʼ gaca. Para gaca nga la? naquiiñeʼ cueecabe tiempu. Nuu biaje gadxé gadxé modo riníʼ ique ca binnigola gaca xiixa ne raca nagana para laacabe chúʼcabe tobi si ora chigúnicabe xiixa, ne zacaca nga bizaaca ni lu primé siglu que ora biiyaʼ ca binnigola que pa jneza nga gaca circuncidar binni. Ora rizaaca nga la? ricaacabe jma tiempu para ganna chaahuicabe ximodo gaca xiixa cosa ne gácani modo na Stiidxaʼ Dios (Hech. 15:2, 6, 7, 12-14, 28).
14. Xiñee galán guni ca binnigola dxiiñaʼ tobi si.
14 Xi zazaaca pa gacalaʼdxiʼ ti binnigola gaca puru si ni na ne dede gutinde diidxaʼ xcaadxi binnigola, casi biʼniʼ Diótrefes lu primé siglu que yaʼ (3 Juan 9, 10). Zacaná guiráʼ ca binni ridagulisaa. Cásica dxiqué, Binidxabaʼ nisi cuyubi ximodo gutinde ca xpinni Cristu ni nuu yanna riʼ. Ximodo nga yaʼ. Nuu tiru rucaabe tuuxa guyubi puru si para laa para guihuinni laa nga jma risaca lade ca binni ridagulisaa. Nga runi, galán guni ca binnigola stipa para cadi gudxiibacaʼ laca laaca ne guyúbicaʼ ximodo chuʼcaʼ tobi si. Guiráʼ ca binni ridagulisaa riéchecaʼ ora ruuyacaʼ rúnicabe dxiiñaʼ casi ora ñácacabe ti binni si.
Rulídxecabe ca xpinni Cristu
15. Xiñee rulidxe ca binnigola ca bíʼchicaʼ ne ca bizáʼnacaʼ.
15 Guionna cosa ni bizeeteʼ Pablu runi ca binnigola ora maʼ cayápacaʼ ca dendxuʼ stiʼ Dios nga rulídxecabe laacaʼ ne rúnicabe ni neca rácani nagana para laacabe. Pablu si nga biquiiñeʼ diidxaʼ gulídxecabe ca xpinni Cristu lu Stiidxaʼ Dios ni gucuá griegu. Diidxaʼ ca riniʼni gudiicabe conseju ne gacanécabe tuuxa saʼ jneza, peru sin guninácabe laa (2 Tes. 3:15). Nga runi, bisiénebe ca binni de Corinto: «Cadi cucaa ndi para usitué lú tu, sínuque para ulidxe laatu, purti laatu nga xiiñe ni nadxieeʼ» (1 Cor. 4:14). Racá ridúʼyanu rulidxe apóstol que ca bichi purtiʼ nadxii laacabe ne rizaalaʼdxiʼ laacabe.
16. Xi cadi naquiiñeʼ gusiaandaʼ guiráʼ binnigola ora gulídxecaʼ ca xpinni Cristu.
16 Ora maʼ chigulidxeʼ ti binnigola tuuxa, naquiiñeʼ guyúbibe ximodo gúnibe ni. Cásica biʼniʼ Pablu, naquiiñeʼ gusihuínnibe nadxiibe ca xpinni Cristu, nacháʼhuibe né laacaʼ ora gudiibe conseju ni zanda gacané laacaʼ (biindaʼ 1 Tesalonicenses 2:11, 12). Peru laaca naquiiñeʼ chinanda binnigola ca «casi pe biziidi ni, ti ganda acané xcaadxi ra usiidi» (Tito 1:5-9).
17, 18. Xi naquiiñeʼ guietenaláʼdxinu pa gudii ti binnigola xiixa conseju laanu.
17 Ca binnigola ca nánnacaʼ laaca binni ruchee laacaʼ ne nuu tiru zaníʼcabe xiixa ni qué ñuuláʼdxicabe niníʼcabe (1 Rey. 8:46; Sant. 3:8). Laaca riénecabe qué riecheʼ ti xpinni Cristu «ora cayaba náʼ, sínuque riaana triste purti naná ni» (Heb. 12:11). Nga runi, ante guseendacaacabe ti xpinni Cristu para gulídxecabe laa la? ribeecabe tiempu para guiníʼ íquecabe ne guni orárcabe ti ganda gacanécabe laa. Yanna, pa gudii ti binnigola conseju laanu la? naquiiñeʼ guiníʼ íquenu zacá nga cusihuínnibe rizaaláʼdxibe laanu.
18 Guiníʼ íquenu pa ñápanu ti guendahuará ni qué gánnanu xi laa. Despué bidxélanu ti doctor ni gudxi laanu xi guendahuará nápanu, peru qué ñuuláʼdxinu ora gúdxibe laanu malu guendahuará ni nápanu. Ñee nidxiichinenu laabe la? Coʼ njaʼ. Yanna, pa gábibe laanu caquiiñeʼ gaca operarnu ne nánnanu naná ni yaʼ. Cumu nánnanu zacatiʼ nga zanda guiándanu la? zudiʼnu lugar guni operárcabe laanu. Yanna, pa feu modo ñábibe ni laanu, ñee nidxiichinu la? Ñándaca nidxiichinu pur modo guniʼbe ni, peru cadi pur nga maʼ qué zudiʼnu lugar guni operárcabe laanu. Zacaca nga laani, cadi galán diʼ guidxiichinu pur modo gudii ti binnigola xiixa conseju laanu ne guni nga maʼ qué gucaadiáganu laabe. Guietenaláʼdxinu zándaca caquiiñeʼ Jiobá ne Jesús laabe para gacanebe laanu o para cadi guixélenu de Dios.
Gusisácanu ca binnigola ni bisaana Jiobá para gapa laanu
19, 20. Ximodo rusihuínninu rusisácanu ca binni ni bidii Jiobá gracia para guni xhiiñaʼ.
19 Ximodo zanda gusihuínninu rudiʼnu xquíxepeʼ tuuxa pur bisigaʼdeʼ laanu xiixa yaʼ. Zusihuínninu ni ora iquiiñenu ni bidiibe laanu. Jiobá biquiiñeʼ Jesucristu para «bidii be gracia binni para guni xhiiña be», laacabe nga ca binnigola ni nuu lade ca binni ridagulisaa. Ximodo gusihuínninu rusisácanu laacabe yaʼ. Ora gucaadiáganu ca libana rudiicabe ne ora rúninu stipa pur chinándanu ni gábicabe laanu. Ora guinábacabe guicábinu la? gúninu ni de guidubi ladxidoʼno. Ne ora rinándanu modo quíxhecabe gaca xhiiñaʼ Dios casi ora chigucheechenu stiidxaʼ Reinu. Laaca rábinu laacabe ximodo huayacané ca conseju stícabe laanu. Ne laaca rusisácanu stipa runi binnilídxicabe purtiʼ rudiicaʼ lugar iquiiñebe tiempu ñuunebe laacaʼ para gacanebe laanu.
20 ¡Nabé riéchenu purtiʼ nuu binnigola cayuni dxiiñaʼ nadipaʼ, ni zaniruʼ lunu ne ni rulidxe laanu! Nga runi naquiiñeʼ gusisácanu ca binni ni «bidii [Jiobá] gracia [...] para guni xhiiña be».
Rietenalaʼdxuʼ la?
• Xiñee naquiiñeʼ guni respetar ca xpinni Cristu de Tesalónica ca binnigola ni biaana para gapa laacaʼ.
• Xi dxiiñaʼ nadipaʼ runi ca binnigola pur laanu.
• Xi ribeendunu purtiʼ zaniruʼ ca binnigola lunu.
• Xi naquiiñeʼ guietenaláʼdxinu pa gudii ti binnigola xiixa conseju laanu o pa gulidxe laanu.
[Dibuju/foto ni zeeda lu yaza 27]
Ñee rusisácanu guiráʼ ni runi ca binnigola pur ca binni ridagulisaa la?