Ximodo iquiiñenu Internet sin guiábanu lu trampa stini

MODO bichaa Internet xquendanabani binni zanda guchaaganu ni né ni guca raca chupa chonna siglu dxi bihuinni imprenta. Dede riníʼcabe Internet nga tobi de ca modo jma nagueenda para ganna binni ni cayaca guiráʼ ladu. Ne biaʼsi nga ni riníʼcabe, purtiʼ racaneni binni ganna stale cosa ne xi riníʼ ique xcaadxi binni de xiixa tema.

Dxi bizáʼ Jiobá binni bisigáʼdebe laacaʼ xiixa nabé sicarú. Xi laani yaʼ. Laani nga ganda guiníʼnecaʼ stobi ne guiniʼcaʼ xi riníʼ íquecaʼ. Ne Jiobá peʼ bizulú guniʼné binni dxi gúdxibe Adán ne Eva xi naquiiñeʼ gúnicaʼ para ganda guibánicaʼ nayecheʼ (Gén. 1:28-30). Peru despué biquiiñecabe ni bisigaʼdeʼ Dios laacabe que para gúnicabe cosa malu. Ngapeʼ nga ni bizaaca dxi nacubi guyuu binni lu Guidxilayú riʼ. Guniʼné Binidxabaʼ Eva ne gúdxibe laa caadxi cosa ni cadi dxandíʼ. Biʼniʼ cré Eva laabe ne despué gúdxini xheelaʼ. Cumu laaca biʼniʼ cré Adán ni la? nga runi, napa binni stale guendanagana yanna (Gén. 3:1-6; Rom. 5:12).

Xi zanda guininu de Internet yaʼ. Naquiiñeʼ gatananu né laani, purtiʼ neca zanda gacaneni laanu la? pa qué chuʼnu cuidadu laaca zanda guninani laanu. Dxandíʼ racaneni laanu guidxélanu ni caquiiñenu, cadi gunítipenu stale tiempu ne gúninu xhiiñanu jma nagueenda. Peru laaca zanda guidxélanu ni cadi dxandíʼ luni, ne zanda gunítinu stale tiempu ne guidúʼyanu cosa dxabaʼ. Yanna, ximodo iquiiñenu Internet sin guiábanu lu trampa stini yaʼ.

Ñee zanda guni crenu guiráʼ ni zeeda luni la?

Cadi guiníʼ íquenu galán guiráʼ ni zeeda lu Internet. Ora guyúbinu xiixa luni, zanda guidxélanu ni gacané laanu ne laaca zanda guidxélanu ni guniná laanu. Guiníʼ íquenu ti grupu de binni ni rutopa stale hongo, cásica ni galán ne ni napa venenu. Pa quíxhecabe guirani nezalú binni para gó sin cueecabe cani napa venenu, ñee zaná binni gócani casi zeʼ la? Zacaca nga naquiiñeʼ gatananu ora maʼ nuunu lu Internet, purtiʼ ora maʼ cuyúbinu xiixa zadxélanu ni zanda gacané laanu, peru laaca zadxélanu xiixa ni zanda guniná laanu. Nga runi, pa qué racaláʼdxinu gaca biidiʼ xquendabiaaninu la? naquiiñeʼ cuinu xi guidúʼyanu lu Internet.

Lu iza 1993, guyuu ti revista ni nabé binibiáʼ binni, purtiʼ gúpani ti dibuju ra cá chupa biʼcuʼ zúbacaʼ lu ti computadora. Ti biʼcuʼ que cayabi sti biʼcuʼ que: «Lu Internet guirutiʼ qué ganna pa biʼcuʼ lii». Dxandíʼ, lu Internet cadi nagana nga gucaachiʼ tuuxa tu laa. Peru cadi deruʼ yanna nga gácani zacá, raca stale siglu Binidxabaʼ bicaachilú deche ti beendaʼ para bicaa Eva guni cré zanda gaca casi Dios. Lu Internet tutiica zanda guiníʼ naca tuuxa ni nanna stale. Guirácabe zanda gucaacabe xi riníʼ íquecabe, zanda gudiicabe conseju, gucaacabe tu nácacabe o uguucabe intiica foto.

Nga runi, ora chuʼnu lu Internet, cadi galán diʼ guni crenu guiráʼ ni zeeda luni. Cadi gaca huátinu casi guca Eva. Ante guni crenu xiixa ni bidúʼndanu luni, galán guinabadiidxanu laca laanu: 1) Tu bicaani. Ñee zanda guneʼ cré laabe la? 2) Xiñee bicaabe ni. Ñee nachaʼhuiʼ binni riʼ la? o puru si ni riníʼ íquebe nga rucaabe. 3) Ñee rucaabe paraa guleebe cani ti ganda guʼyaʼ binni pa dxandíʼ cani la? 4) Ñee biaʼsi cani rucaabe la? o maʼ nayooxhoʼ cani. Dede yanna naquiiñeʼ chinándanu conseju ni bicaa Pablu ra nuu Timoteu: «Gupa dxiichi dxiiña ni biaana neuʼ. Qué chi ucaa diaʼgu ca diidxa ricaa yu né cabe ni cadi zeeda de Dios, nin ni na cabe enda biaani peru cadi dxandíʼ» (1 Tim. 6:20).

Ñee zacaneni naa gapaʼ jma tiempu la?

Pa iquiiñenu Internet ca jneza la? qué zunítipenu tiempu, bueltu ne stipa stinu. Dede ndaaniʼ lídxinu zanda guidúʼyanu tu rutoo jma baratu, zanda sinu, zanda uguʼnu bueltu ra bancu ora tiisi, guyúbinu ne sinu boletu jma baratu. Laaca zanda guyúbinu paraa nabeza tuuxa binni ne xi númeru de teléfono stiʼ, ximodo jma nagueenda chindanu paxaraa sin gunítinu stale bueltu. Ca yoo Betel stiʼ ca testigu stiʼ Jiobá ni nuu lu guidubi naca Guidxilayú riquiiñecaʼ Internet para stale de ca dxiiñaʼ rúnicaʼ, zacá maʼ qué runítipecaʼ tiempu, bueltu ne rápacaʼ biaʼ binni si caquiiñecaʼ para ca dxiiñaʼ sticaʼ.

Peru laaca zanda guniná Internet binni. Stale binni, lugar de niquiiñecaʼ Internet para ñacané laacaʼ la? maʼ beeda gácani xiixa ni nabé ribee tiempu sticaʼ. Ridíʼdicabe stale hora luni —nuu tiru maʼ caguítecabe, maʼ cazíʼcabe, caniʼnécabe stobi, maʼ cuseendacabe mensaje o maʼ cuyubisícabe xiixa— dede riaandaʼ laacabe ca cosa ni jma risaca, casi binnilídxicabe, ca xhamígucabe ne ca binni ridagulisaa. Reeda gácani ti viciu para laacabe. Ne stale binni napa viciu ca. Lu iza 2010 gunabadiidxacabe stale binni de Corea de laani ne bihuinni nuu 18,4% de hombrehuiiniʼ ne dxaapahuiiniʼ ni maʼ qué randa ribani sin laani. Ne sicaríʼ guníʼ ti grupu de binni de Alemania ni ruuyaʼ ximodo nabani binni: «Zeʼ dxi jma zidale gunaa ni riníʼ maʼ napa xheelacaʼ viciu ca». Tobi de ca gunaa ca guníʼ nuu triste purtiʼ bicaa viciu ca xheelaʼ guchaa modo laa ne dede binduuxeni xquendaxheelacabe.

Raca chupa chonna iza yendá ti carta stiʼ ti hombre ra yoo Betel stiʼ ca testigu stiʼ Jiobá, ne luni guniʼbe guidubi dxi maʼ nuube lu Internet. Dede guniʼbe nuu tiru ribibe xaʼnaʼ Internet chii hora ti dxi. Primé que la? guniʼbe riuube luni para si gápabe ra gutiidibe tiempu ti ratu, peru chaahuiʼ chaahuiʼ maʼ bizulú biaadxabe ca guendaridagulisaa ne maʼ qué runi orarbe. Maʼ qué ruundabe ni chitiidiʼ ndaaniʼ Yoo stiʼ Reinu, ne ora maʼ nuube raqué, nisi maʼ caníʼ íquebe guiuba guibiguétabe para chuʼbe lu Internet sti biaje. Galán nga biénebe nabé nagana modo nuube ne cayuninani laabe, ngue runi bichaabe modo nuube. Xi rusiidiʼ nga laanu yaʼ. Rusiidini laanu naquiiñeʼ guidúʼyanu pabiáʼ tiempu ribeenu para chuʼnu lu Internet ti cadi gundiibini laanu.

Ñee zabeendunu xiixa ora iquiiñenu ni la?

Lu 1 Tesalonicenses 5:21, 22 ridxélanu conseju riʼ: «Lauyubi uná nga ni jneza, ne nga laguiaana né. Ne laixele de irá xixé ni nadxaba». Cada biaje guidúʼyanu xiixa lu Internet, naquiiñeʼ guietenaláʼdxinu xiná ca ley stiʼ Jiobá. Cadi guxhélenu nin ti yaza yuudxuʼ ni cadi galán para ti xpinni Cristu. Lu Internet nabé nuu stale película ne foto de idxa guidxa, ne pa qué gatananu la? zanda gueeda gápanu viciu de guidúʼyanu cani.

Guinabadiidxanu laca laanu. «Ñee nituiluaʼ pa málasi ñedandá xheelaʼ, bixhozeʼ o jñaaʼ, o ti xpinni Cristu ra nuaaʼ ne ñuuyaʼ xi cayuuyaʼ lu computadora la?». Pa zacá ni, zándaca jma galán chuʼnu lu Internet ora si nuu tuuxa gaxha de laanu. Dxandíʼ zanda iquiiñeʼ binni Internet para siʼ ne para guiniʼné sti binni, peru laaca nápani stale modo para gucheené binni xheelaʼ ndaaniʼ ladxidóʼ «neca qué ñuu né pe» tuuxa (Mat. 5:27, 28).

Ñee naquiiñeʼ guseendaʼ ni ra nuu tuuxa la?

Zanda iquiiñenu Internet para guyúbinu xiixa ni caquiiñenu ne para ganda guinínenu sti binni. Peru pa chigucaʼnu xiixa o chiguséʼndanu xiixa ni beeda ra nuunu la? naquiiñeʼ gánnanu pa jneza nuuni ne pa qué zucaani binni guiníʼ ique cosa malu. Galán guinabadiidxanu laca laanu: «Ñee zanda gusihuinneʼ dxandíʼ ni la? Ñee napaʼ derechu para guseendaʼ ni ra nuu sti binni la?a Ñee zacaneni sti binni la? Xiñee rapaʼ gana guseendaʼ ni. Ñee chiguneʼ ni para si guluéʼ laacabe primé naa rapaʼ cani la?».

Ora riquiiñenu correu electrónicu jneza la? ribeendunu ni galán, peru laaca zanda guseendacabe stale ni qué zaquiiñenu. Nuu tu laa nabé ruseendaʼ stale noticia ne mensaje ni qué risaca ra nuu xcaadxi binni, zacá ribáʼnacabe tiempu ni napa binni para guni xiixa ni risaca. Para cadi gúninu ni runi ca binni ca la? galán guiníʼ íquenu chupa biaje ante guséʼndanu xiixa ra nuu sti binni. Ne xi para nga ruseendaʼ binni ti correu yaʼ. Dxiqué bicaa binni carta ra nuu ca binnilidxi ne ra nuu ca xhamigu para gábicaʼ laacabe ximodo nuucaʼ ne xi cazaaca neza ra nuucaʼ. Ñee cadi laaca ngaca nga naquiiñeʼ guni binni né ca mensaje electrónicu ca la? Ñee jneza guséʼndanu xiixa ra nuu sti binni pa qué gánnanu pa dxandíʼ ni la?

Yanna, ñee maʼ qué liica zaquiiñenu Internet pur cani maʼ guninu ca la? Zándaca nuu tu naquiiñeʼ guni zacá, casi hombre ni maca bizéʼtenu que, purtiʼ laa stale iza gupa viciu ca. Peru cadi naquiiñeʼ chindanu dede ra yendá hombre ca. Pa guiníʼ ique chaahuinu ante chuʼnu lu Internet ne gánnanu xii nga jneza ne xii nga ni cadi jneza la? zudiʼnu cuenta naca Internet ti cosa risaca ni zanda gacané laanu gúninu xhiiñanu (Pro. 2:10, 11).

[Ni cá ñee yaza]

[Dibuju/foto ni zeeda lu yaza 4]

Xiñee naquiiñeʼ gatananu né guiráʼ ni rihuinni lu Internet

[Dibuju/foto ni zeeda lu yaza 5]

Ñee riníʼ íquenu chupa biaje ante guséʼndanu xiixa ra nuu sti binni la?