Chii cosa ni rinabadiidxaʼ binni de ora ratané ti hombre ti gunaa ni cacabi Biblia

1 Ñee ra gutané Adán Eva nga bicheenecaʼ Dios la?

▪ Ni cacabi Biblia: Stale binni na ora guníʼ Dios cadi gócabe cuananaxhi ni nuu ndaaniʼ jardín stiʼ Edén que, caniʼbe cadi gatané Adán xheelaʼ. Peru cadi nga diʼ nga ni rusiidiʼ Biblia.

Guiníʼ íquenu ndiʼ. Caʼruʼ guzáʼ Dios Eva dxi gúdxibe Adán cadi gó cuananaxhi ni cá lu «yaga stiʼ guendananna ni jneza ne ni cadi jneza» (Génesis 2:15-18). Cumu stúbiruʼ Adán nuu dxi que la? qué zanda diʼ guininu gudxi Dios laabe cadi gatanebe xheelabe. Despué gudxi Dios Adán ne Eva ca diidxaʼ riʼ: «Lagapa xiiñitu ne lagaca stale ne laguchá guidxilayú riʼ» (Génesis 1:28). Pa qué ñatané Adán xheelaʼ, ñee ñanda ñaca ni guníʼ Dios riʼ la? Ñee niná ti Dios, ni nadxii binni, ñuuti laacabe pur bizuubacabe stiidxaʼ la? (1 Juan 4:8).

Sti cosa ni naquiiñeʼ gánnanu nga qué guinni diʼ Adán ora gudó Eva cuananaxhi que. Ne «despué bidiibe ni [Adán ora] guyuu ra nuube, ne laa bizulú gudó ni» (Génesis 3:6).

Ne laaca qué nulidxe diʼ Dios Adán ora gutané Eva ne gúpacaʼ xiiñicaʼ (Génesis 4:1, 2). Rihuinni dxíchica ora guníʼ Dios cadi gócabe cuananaxhi que cadi cucueezabe Adán de gatané xheelaʼ, sínuque caniʼbe de ti cuananaxhi stiʼ ti yaga.

2 Ñee riníʼ Biblia malu nga guiechené binni xheelaʼ ora gatané laabe la?

▪ Ni cacabi Biblia: Lu primé libru stiʼ Biblia cayeeteʼ Dios nga bizáʼ «hombre ne gunaa» ne laaca guniʼbe «nabé galán» guiráʼ cani bíʼnibe (Génesis 1:27, 31). Gayuaa iza despué gúdxibe ti hombre ni bicaa Biblia gabi ca hombre ni maʼ bichaganáʼ ca diidxaʼ riʼ: «Biechené xheelaluʼ ni bichaganaluʼ dxi nahuiiniluʼ [...]. Guxhudxi ca xídxibe lii guiráʼ ora» (Proverbios 5:18, 19). Ñee cusihuinni ca diidxaʼ ca riníʼ Biblia malu nga guiechené binni xheelaʼ ora gatané laabe la?

Nuu stale cosa ni rusihuinni cadi bizáʼ diʼ Dios ra naca binni hombre ne ra naca gunaa para si gápacaʼ xiiñicaʼ, sínuque laaca bíʼnibe cani para gusihuinni ca guendaxheelaʼ ca nadxiisaacaʼ ne para chuʼcaʼ nayecheʼ. Ti hombre ne ti gunaa ni maʼ nadxiisaacaʼ ridaagucaʼ ora gátacaʼ purtiʼ caquiiñeʼ xcuérpucaʼ ni ne runi sentircaʼ nayecheʼ ora gúnicaʼ ni.

3 Ñee riníʼ Biblia jneza nga cuezané ti hombre ti gunaa sin guichaganacaʼ la?

▪ Ni cacabi Biblia: Biblia na «zusaba ná Dios cani rapa jnadxii» (Hebreos 13:4). Lu griegu biquiiñecabe diidxaʼ pornéia para guiníʼcabe intiica modo chuʼné binni tuuxa ni cadi xheelaʼ.a Nga runi cadi jneza ruuyaʼ Dios cuezané ti hombre ti gunaa neca cá íquecaʼ guichaganacaʼ despué.

Neca guizáʼ nadxii ti hombre ti gunaa, Dios na naquiiñeʼ guichaganabe gunaa ca para gatanebe laa. Guenda ni jma rusihuinni Dios nga guendarannaxhii ne bíʼnibe binni maca para gannaxhii. Yanna, ñee cadi nápabe razón para guinábabe guichaganáʼ binni primeru ti gátacaʼ la? Sti tema ca zusiene gunáʼ nga ca razón ni napa Dios.

4 Ñee jneza ruuyaʼ Dios gapa binni chupa chonna xheelaʼ la?

▪ Ni cacabi Biblia: Dxiqué bidii Dios lugar gapa ti hombre chupa chonna xheelaʼ (Génesis 4:19; 16:1-4; 29:18–30:24). Peru cadi laadibe gudixhestibe ni, purtiʼ bidiibe Adán ti xheelaʼ si.

Dios maca gudixhe gapa cada hombre ti xheelaʼ si, ne despué biʼniʼ mandarbe Jesucristu quixhe guni binni ni maca guniʼbe que (Juan 8:28). Ora gunabadiidxaʼ caadxi binni Jesús ti cosa de guendaxheelaʼ, bicabi sicaríʼ: «Qué xa huayuunda tu ra cá xi biʼni Dios dxi bizulú bizáʼ binni. Bizáʼ be hombre ne gunaa, ne na be: “Pur nga runi zusaana hombre bixhoze ne jñaa, ne zadxaaga xheela ne zaca ca tobi si”» (Mateo 19:4, 5).

Despué gudxi Dios tobi de ca discípulo stiʼ Jesús gucaa ca diidxaʼ riʼ: «Cada hombre gapa xheelaʼ, ne zaqueca cada gunaa gapa xheelaʼ» (1 Corintios 7:2). Biblia laaca caníʼ pa racalaʼdxiʼ tuuxa hombre ni maʼ bichaganáʼ gapa xiixa guenda lade ca binni ridagulisaa la? «cadi gapa chupa chonna gunaa, sínuque xheela si» (1 Timoteo 3:2, 12).

5 Ñee jneza nga iquiiñeʼ ti guendaxheelaʼ xiixa ni gucueeza laacaʼ para cadi gápacaʼ xiiñicaʼ la?

▪ Ni cacabi Biblia: Nin Jesús nin ca discípulo stiʼ qué niniʼcaʼ naquiiñeʼ gapa ca xpinni Cristu xiiñicaʼ o cadi gápacaʼ xiiñicaʼ. Ne qué rieeteʼ lu Biblia pa cadi jneza nga gucueeza binni laa de gapa xiiñiʼ.

Nga runi, ca guendaxheelaʼ ca nga naquiiñeʼ gúʼyacaʼ pa zápacaʼ xiiñicaʼ, panda ne padxí gápacaʼ laacabe. Ne maʼ laaca gúʼyacaʼ pa quixhe íquecaʼ iquiiñecaʼ xiixa ni gucueeza laacaʼ para cadi gápacaʼ xiiñicaʼ ne cadi gácani xiixa ni gutiidiʼ xiiñiʼ gunaa ca.b Guirutiʼ naquiiñeʼ guiníʼ cadi jneza ni quixhe íquecabe gúnicabe (Romanos 14:4, 11-13).

6 Ñee jneza na Biblia gutiidiʼ xiiñiʼ ti gunaa la?

▪ Ni cacabi Biblia: Nabé risaca xquendanabani binni para Dios. Dede ti baʼduhuiiniʼ ni caʼruʼ gale maʼ ruuyabe laa casi ti binni ne gadxepeʼ laa de xcaadxi (Salmo 139:16). Laabe gudíxhebe gaca castigar tuuxa ni guniná ti baʼduhuiiniʼ ni nuuruʼ ndaaniʼ jñaa. Nga runi, tuuxa ni guuti ti baʼduhuiiniʼ ni caʼruʼ gale la? casi ñaca ñuuti ti binni huaniisi (Éxodo 20:13; 21:22, 23).

Yanna, xi naquiiñeʼ gaca pa ora cayale ti baʼduhuiiniʼ nuu xquendanabani ra naxoo ne zaqueca xquendanabani jñaabe, ne tobi si de laacabe zanda guibani yaʼ. Maʼ guendaxheelaʼ ca nga naquiiñeʼ guʼyaʼ xi guni.c

7 Ñee riníʼ Biblia zanda gaca divorciar binni la?

▪ Ni cacabi Biblia: Zanda gúnicabe ni. Peru Jesús bizeeteʼ ti razón si nuu para ganda gaca ni. Sicaríʼ bisiénebe: «Tutiica gaca divorciar né xheela ne ichaganá stobi, neca qué nuchee xheela [gatané tuuxa ni cadi xheelaʼ] la? ma enda rapa jnadxii ngue» (Mateo 19:9).

Nanalaʼdxiʼ Dios tutiica binni ni gusiguii o chuʼné sti binni para gaca divorciar de xheelaʼ. Zabídxibe cuenta ca binni ni rusaana xheelaʼ pur intiica cosa ni qué risaca, jmaruʼ si pa guni ni para guichaganáʼ sti binni (Malaquías 2:13-16; Marcos 10:9).

8 Ñee jneza ruuyaʼ Dios chuʼné ti hombre sti hombre o chuʼné ti gunaa sti gunaa la?

▪ Ni cacabi Biblia: Cadi jneza diʼ chuʼné binni ni cadi xheelaʼ, casi chuʼné ti hombre sti hombre o chuʼné ti gunaa sti gunaa (Romanos 1:26, 27; Gálatas 5:19-21). Neca qué riuulaʼdxiʼ Dios ca nga la? nánnanu «nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16).

Cani dxandíʼ xpinni Cristu rácacaʼ nachaʼhuiʼ né guiráʼ binni, neca qué riuuláʼdxicaʼ chuʼné ti hombre sti hombre o chuʼné ti gunaa sti gunaa (Mateo 7:12). Cumu Dios racalaʼdxiʼ guni «respetar» ca xpinni «irá binni» la? nga runi qué racananaláʼdxinu ca hombre ni riuuné sti hombre o ca gunaa ni riuuné sti gunaa (1 Pedro 2:17).

9 Ñee malu guiníʼ binni de cosa dxabaʼ pur teléfono ne guuyaʼ cani lu Internet la?

▪ Ni cacabi Biblia: Para guiníʼ binni de cosa dxabaʼ o para guʼyaʼ cani, riquiiñeʼ cani runibiáʼcabe casi sexo telefónico, sexting ne cibersexo. Sexo telefónico nga güiʼ binni diidxaʼ pur teléfono de modo ratané ti hombre ti gunaa o gucaadiágacaʼ xiixa mensaje luni ni cusiene ximódopeʼ runi binni ni. Ne sexting nga ora riquiiñecabe celular para guseendacabe foto ra cusihuinni tuuxa xcuerpu, o gucaacabe xiixa mensaje ra caníʼcabe de modo ratené ti hombre ti gunaa. Ne ni rábicabe cibersexo nga iquiiñecabe Internet para guʼyasaacabe xcuérpucabe.

Biblia qué ruzeeteʼ guiráʼ cani runi binni yanna. Peru ndiʼ nga ni cayábini laanu: «Yáquexa ma xpinni Dios laatu la? ma cadi lica guiete enda rapa jnadxii lade tu, nin guni tu gasti ru ni nadxabaʼ, nin uyubi tu gapa tu xiixa para laasi tu. Cadi usituí tu lú stobi pur ni iníʼ tu, ne cadi iníʼ tu diidxa guidxa nin diidxa huati» (Efesios 5:3, 4). Cani runibiáʼcabe casi sexo telefónico, sexting ne cibersexo ruchaacani xquendabiaaniʼ binni ne riníʼ íquecaʼ gastiʼ naca gúnicaʼ ca cosa ca ne dede rucaacani laacaʼ gatanecaʼ tuuxa ni cadi xheelacaʼ. Lugar de ñacanécani binni nucueeza de ñuni ni rinabaʼ beela ladi laa, laga rucaacani laa guni ni riuulaʼdxiʼ si.

10 Xi rusiene Biblia de ora riguite binni ra naca hombre o ra naca

▪ Ni cacabi Biblia: Luni qué rieeteʼ diʼ de ora riguite binni ra naca hombre o ra naca gunaa, nga nga ni runi binni para guxuiʼlú nexhené tuuxa dede guni sentir jma galán o guni sentir ni rábicabe orgasmo. Neca qué rieeteʼ nga lu Stiidxaʼ Dios, peru cayuni mandarni ca xpinni Cristu guni ni na ca diidxaʼ riʼ: «Lagaxha irá ni zeeda de guidxilayú ri ndaani ladxidóʼ to. Nin tobi de laatu cadi chuʼ né ni cadi xheelaʼ, nin guni gasti ni nadxabaʼ. Cadi chi nanda tu ni na ique tu [o guluiʼláʼdxitu gatanetu tuuxa, NM]» (Colosenses 3:5).

Ca binni ni riguite ra naca hombre o ra naca gunaa ruchaani xquendabiaanicaʼ ne riníʼ íquecaʼ gastiʼ naca gúnicaʼ ni ne rucaani laacaʼ gúnicaʼ ni riuuláʼdxisicaʼ. Biblia cayabi laanu zudii Dios stipa biaʼ caquiiñeʼ ca binni ni racalaʼdxiʼ gusaana viciu riʼ (2 Corintios 4:7; Filipenses 4:13).

[Nota]