Guiéchenu ora guidúʼndanu Stiidxaʼ Dios ne cueendunu ni galán

Ñuuláʼdxiluʼ nibeenduluʼ jma cosa galán tiempu riquiiñeluʼ para gúʼndaluʼ Biblia la? Nuu chonna conseju nabé galán ni zacané lii para gúniluʼ ni.

1 BIʼNIʼ ORAR. Primé ni naquiiñeʼ gúniluʼ nga guinábaluʼ Dios gacané lii (Sal. 42:8). Laaca cayuni adorarnu Jiobá nga ora ridúʼndanu Stiidxabe. Nga runi, naquiiñeʼ guinábanu laabe gudiibe laanu espíritu stibe ne uguʼnu ladxidoʼno ne xquendabiaaninu listu para guizíʼdinu de laabe (Luc. 11:13). Barbara, ti xpinni Cristu ni maʼ ziné stale iza de misionera guníʼ: «Runeʼ orar Jiobá ante guundaʼ Biblia. Óraca runeʼ sentir racané Jiobá naa ne riuulaʼdxiʼ ni cayuneʼ». Ora runi orarnu Dios racané ni laanu para uguʼnu xquendabiaaninu ne ladxidoʼno listu para guicaanu guiráʼ ni rusiidiʼ Dios laanu.

2 GUNÍʼ IQUE. Cumu nabé napa binni stale dxiiñaʼ la? nuu binni ruundaʼ Stiidxaʼ Dios nagueenda ne pur nga maʼ qué ribeenducaʼ cosa galán. Carlos, ti hombre ni cayuni ni na Jiobá maʼ raca jma de cincuenta iza, nanna nabé risaca nga cuee binni tiempu para guiníʼ ique lu ni cayuundaʼ: «Yanna, jma huaxiéʼ yaza stiʼ Biblia ruundaʼ, chupa yaza guiráʼ dxi. Nga racané naa guieneʼ ni cayuundaʼ ne guuyaʼ ximodo guneʼ ni lu xquendanabaneʼ» (Sal. 77:12). Casi maʼ bidúʼyanu ca, pa cueenu tiempu para guiníʼ íquenu lu ni cadúʼndanu zunibiáʼ chaahuinu ne ziénenu xi racalaʼdxiʼ Jiobá gúninu (Col. 1:9-11).

3 BIʼNIʼ NI. Ora ridúʼyanu pabiáʼ racané xiixa laanu, jmaruʼ si riquiiñenu ni, ne ngaca nga rizaaca ora quixhe chaahuinu ximodo guidúʼndanu Biblia. Zacá guníʼ ti hombrehuiiniʼ xpinni Cristu ni láʼ Gabriel: «Ora guundaʼ Biblia racaneni naa chuaaʼ listu para gudxieeluáʼ guendanagana ne gacaniáʼ xcaadxi binni. Peru nannaʼ naquiiñeʼ guneʼ stipa pur guneʼ ni maʼ ziziideʼ lu xquendanabaneʼ» (Deu. 11:18; Jos. 1:8). Nabé stale cosa nga zanda guizíʼdinu de Dios ne gúninu cani lu xquendanabáninu (Pro. 2:1-5).

NI GUIETENALAʼDXUʼ. ¡Ti ndaayaʼ naroʼbaʼ nga gunibiáʼ chaahuinu Dios, purtiʼ ra nuube nga cadá guendabiaaniʼ! (Rom. 11:33.) Xi zacané laanu para cueendunu ni galán ora guidúʼndanu Biblia yaʼ. Primeru la? biʼniʼ orar ti gudii Jiobá lii espíritu santu stiʼ ne gacané lii chuʼ ladxidoʼloʼ ne xquendabiaaniluʼ listu para guiziidiluʼ de laabe; de racá, ora maʼ gudiʼdiʼ ti tiempu huiiniʼ guníʼ ique de laani, ne últimu la? biʼniʼ ni maʼ biziidiluʼ lu xquendanabániluʼ. Cadi nagana para chinándaluʼ ca conseju riʼ ne zacaneni lii chuuláʼdxiluʼ gúʼndaluʼ Stiidxaʼ Dios ne cueenduluʼ ni galán.