CANI RINABADIIDXAʼ BINNI DE BIBLIA

Xiñee qué ganda chuʼ binni de guiráʼ guidxi tobi si

Biblia ruzeeteʼ chupa razón nabé risaca. Tobi de ca razón ca nga neca stale cosa galán huabeendú binni guidxilayú pur stipa ni cayuni para chuʼ binni tobi si, peru cadi guyáʼ diʼ binni para guni mandar nin ra guzuhuaa ñee. Guiropa razón ca nga purtiʼ «naaze dxiichi binidxaba idubi guidxilayú». Nga runi nin ti binni guidxilayú qué ganda gacané chuʼ binni tobi si. (Biindaʼ Jeremías 10:23 ne 1 Juan 5:19.)

Cumu ruyubi binni puru si para laa ne rachelú gapa stale cosa risaca la? nga runi qué ganda guibani binni tobi si. Para ganda chuʼ binni de guiráʼ guidxi tobi si, caquiiñeʼ chuʼ ti gobiernu ni guni mandar lu guidubi naca Guidxilayú, ni gusiidiʼ binni chuulaʼdxiʼ guni cosa galán ne guizaalaʼdxiʼ xcaadxi binni. (Biindaʼ Isaías 32:17 ne 48:18, 22.)

Tu laa zacané binni guibani tobi si lu Guidxilayú riʼ

Dios ni jma nandxóʼ maʼ bidii stiidxaʼ cuee ca gobiernu nuu lu Guidxilayú riʼ ne cuʼ ti gobiernu si lugar stícabe para guni mandar binni guidxilayú (Daniel 2:44). Jesús, Xiiñiʼ Dios nga xaíque stiʼ gobiernu ca, ne Biblia na labe «Príncipe ni rudii Guendariuudxi». Laabe zabeebe guiráʼ guendaquéiquiiñeʼ ne zusiidibe binni guibani sin tinde. (Biindaʼ Isaías 9:6, 7 ne 11:4, 9.)

Ca dxi riʼ nuu millón de binni ni cayabi Cristu laacaʼ xi naquiiñeʼ gúnicaʼ ne caquiiñecaʼ Biblia para gusiidicaʼ binni guibani sin tinde. Mayaca chuʼ binni de guiráʼ guidxi tobi si. (Biindaʼ Isaías 2:3, 4 ne 54:13.)