NI RINABADIIDXAʼ CANI RUUNDAʼ

Ñee jneza cuiné ti guendaxheelaʼ ti xiiñiʼ ndaaniʼ Yoo sti Reinu neca maʼ biree xiiñicabe riʼ ndaaniʼ xquidxi Dios la?

Gastiʼ razón para guininu paraapeʼ naquiiñeʼ cuiʼ ti binni ni maʼ biree ndaaniʼ xquidxi Dios ndaaniʼ Yoo stiʼ Reinu. Nabé huayabi revista riʼ ca Testigu ni napa ti xiiñiʼ ni maʼ biree ndaaniʼ xquidxi Dios, gúnicaʼ stipa para gacanecaʼ laabe guibiguétabe pa nuurube ralídxicaʼ ne pa gúʼyacaʼ zanda gúnicaʼ ni. Casi bizeeteʼ revista Torre stiʼ ni rapa 15 stiʼ noviembre 1988, yaza 19 ne 20, ca Testigu ni napa ti xiiñiʼ ni maʼ biree ndaaniʼ xquidxi Dios, zanda guʼndanécabe laabe Biblia pa nabezanécabe laabe ralídxicabe. Ora guni bixhózebe ne jñaabe sicaríʼ, zanda uguuni gana xiiñibe para guibiguetaʼ ra nuu Jiobá sti biaje.a

Zanda cuiné ti hombrehuiiniʼ ni maʼ biree ndaaniʼ xquidxi Dios bixhoze ne jñaa ndaaniʼ Yoo stiʼ Reinu. Cumu cadi naquiiñepeʼ cuiʼ ti binni ni maʼ biree ndaaniʼ xquidxi Dios dede atrá ndaaniʼ Yoo stiʼ Reinu la? gastiʼ naca cuínebe bixhózebe ne jñaabe. Cumu nápacabe gana guibiguétabe sti biaje la? ora cuinécabe laabe zudiicabe cuenta pa rucaadiágabe ne pa riziidibe ora maʼ nuube ndaaniʼ Yoo stiʼ Reinu, peru qué zanda gúnicabe nga pa gudiicabe lugar laabe cuibe stúbibe sti ladu.

Yanna, pa maʼ cadi nabezané hombrehuiiniʼ riʼ bixhoze ne jñaa yaʼ. Ñee naquiiñeʼ cuícabe juntu ra ridagulisaacabe la? Dxiqué bisiene chaahuiʼ revista riʼ xi naquiiñeʼ guni ti xpinni Cristu pa gacalaʼdxiʼ guidxaaga ti binnilidxi ni maʼ biree ndaaniʼ xquidxi Dios ni cadi nabezané laacaʼ ralídxicaʼ.b Peru, cadi purtiʼ si ribiné ti Testigu ti binnilidxi ni maʼ biree ndaaniʼ xquidxi Dios ndaaniʼ Yoo stiʼ Reinu, guininu riuuláʼdxicaʼ guidxaagacaʼ laabe. Pa riene ca binnilídxibe xi naquiiñeʼ gúnicaʼ né tuuxa ni maʼ biree ndaaniʼ xquidxi Dios ne rúnicaʼ stipa pur chinándacaʼ ca principiu zeeda lu Biblia ora guidxaagacaʼ laabe la? gastiʼ razón para chuʼnu xizaa (1 Cor. 5:11, 13; 2 Juan 11).

Pa guni binni ni maʼ biree ndaaniʼ xquidxi Dios riʼ ni maʼ gúdxicabe laa la? zanda cuibe cueʼ ti binnilídxibe o cueʼ tutiica sti xpinni Cristu. Nuu biaje, riuu xcaadxi guendanagana ora gacalaʼdxiʼ tuuxa quixhe paraa zanda cuiʼ binni riʼ ndaaniʼ Yoo stiʼ Reinu o paraa qué zanda cuiʼ. Nga runi, pa guiráʼ ca binni ridagulisaa, ne binnilidxi binni ni maʼ biree ndaaniʼ xquidxi Dios riʼ, gúnicaʼ stipa pur chinándacaʼ ca principiu zeeda lu Biblia ni caníʼ ximodo naquiiñeʼ gúʼyacabe laabe ne pa qué guchiiñani xquendabiaaniʼ xcaadxi la? zanda cuibe ratiica ne cadi galán diʼ chuʼnu xizaa ora guidúʼyanu ni.c