«Biiyaʼ, cayune irá xixé cosa nacubi»

Ñuuláʼdxiluʼ nibanineluʼ binnilídxiluʼ ndaaniʼ ti guidxilayú ra qué ñuu guendahuará ne ra nibánitu sin ñátitu la? Ñuuláʼdxiluʼ niree guiráʼ yuubaʼ ne guendaguti la? Cadi ti bacaandaʼ diʼ nga, dxandíʼ zaca ni. Purtiʼ Dios maʼ bidii stiidxaʼ gúnini. Guidúʼyanu ximodo zuni Dios ni maʼ guníʼ lu Apocalipsis 21:3-5 (biindaʼ ni).

«Zuchaa [Dios] nisa riete lú caʼ.» (Apocalipsis 21:4.) Gunáʼ nga nisa riete lú binni ni zuchaa Dios yaʼ. Qué zuchaabe nisa ni riete lú binni pur nuu nayecheʼ, nin nisa ni runi lubricar lú binni, sínuque zuchaabe nisa ni riete lú binni ora nuu triste. Qué zuchaa si Dios nisa riete lú binni, sínuque laaca zabeebe yuubaʼ ni rucaa binni guʼnaʼ.

«Ma qué ziuu ru enda guti.» (Apocalipsis 21:4.) Guendaguti ca nga ni jma rucaa binni guʼnaʼ. Peru zabee Jiobá ca binni ni ruzuubaʼ diidxaʼ de lu náʼ guendaguti. Ximodo chigúnibe nga yaʼ. Zúnibe ni ra cueebe donda ni bisaanané Adán binni (Romanos 5:12). Zaquiiñeʼ Jiobá guendaguti stiʼ Jesús para cuee donda napa binni.a Ne zunitilube últimu enemigu stiʼ hombre, laani nga guendaguti (1 Corintios 15:26). Guiráʼ binni zabani casi maca gudixhe Dios guibánicaʼ: qué zaca huaracaʼ ne qué ziuu dxi gáticaʼ.

«Ma qué ziuu ru [...] yuubaʼ.» (Apocalipsis 21:4.) Xi yuubaʼ ndiʼ maʼ qué zuni sentir binni yaʼ. Laacani nga ni runi sentir binni ora gatiʼ binnilidxi, ni runi sentir binni ora guizaaca xiixa, ne ni runiná ca binni ni huará xpiaaniʼ. Ca yuubaʼ ni runi sentir millón de binni nuu cani pur guendaruchee ne qué rudii cani lugar guibani binni nayecheʼ.

Maʼ cadi candaa zabani binni sin gatiʼ, sin yuubaʼ ne sin guʼnaʼ. Zándaca guinabadiidxaluʼ: «Peru paraa nga guibani binni zacá yaʼ. Guibáʼ la?». Coʼ. Xi chupa razón nápanu para guininu zacá yaʼ. Primé la? purtiʼ Dios maʼ guníʼ ca diidxaʼ riʼ: «Ma nabeza Dios lade binni», ne lu Guidxilayú nga nabani binni (Apocalipsis 21:3). Guiropa la? purtiʼ Dios maʼ guníʼ ziuu ti guidxilayú ra «ma qué ziuu ru enda guti», ni caniʼbe raríʼ nga guyuu guendaguti peru bireeni despué. Guibáʼ guirutiʼ tu huayati, peru lu Guidxilayú riʼ, dede dxi guyuu binni luni huayati. Nga runi, lu Guidxilayú riʼ nga ra zabani binni galán casi maca guníʼ Dios chiguni.

Jiobá racalaʼdxiʼ guni crenu cani maʼ guníʼ chiguni. Despué de guniʼbe xi guiráʼ ndaayaʼ zacaa binni, guniʼbe ca diidxaʼ riʼ: «Biiyaʼ, cayune irá xixé cosa nacubi». Ne laaca guniʼbe: «Dxandí irá diidxa riʼ, zanda guni cre lu ni» (Apocalipsis 21:5). Rinábadu lii ne ca binni ni nadxiiluʼ guiziiditu xi zanda gúnitu para chuʼtu lade ca binni ni guibani nayecheʼ ne gúʼyatu dxi guni Dios guiráʼ ni maʼ guníʼ.