Zácatu testigu stinneʼ

1, 2. 1) Tuu nga testigu stiʼ Jiobá ni jma risaca. 2) Xi riníʼ lá Jesús. 3) Ximodo bisihuínnibe biaʼsi ngue ni riníʼ labe.

DXI cayaca juzgar Jesús, gúdxibe Poncio Pilatu, ti hombre ni cayuni mandar Judea, ca diidxaʼ riʼ: «Beda gale ndaani guidxilayú para güe nia binni xii nga ni dxandíʼ» (biindaʼ Juan 18:33-37). Nuucabe guuticabe Jesús purtiʼ guníʼ naca rey. Caadxi iza despué, apóstol Pablu bizeeteʼ nabé nadxibalú Jesús purtiʼ «qué nidxibi niníʼ ni dxandí dxi zuhuaa lú Poncio Pilatu» (1 Tim. 6:13). Dxandíʼ, nuu biaje naquiiñeʼ gácanu nadxibalú para gusihuínninu nácanu ti Testigu «ni qué rusiguii» ndaaniʼ guidxilayú stiʼ Binidxabaʼ, ra nabé nanaláʼdxicabe ca xpinni Dios (Apoc. 3:14).

² Cumu Jesús naca judíu la? maca naca testigu stiʼ Jiobá dede dxi gule (Is. 43:10). Laabe nga testigu ni jma risaca ni guyuu lu Guidxilayú. Ora gudxi ti ángel José, hombre ni bisiniisi Jesús, nacaxiiñiʼ María pur espíritu santu stiʼ Dios, ángel que guniʼruʼ: «Zapa be ti badu huiini ne zabee lá lu laa Jesús, purti zulá ca xpinni de irá ni huachee caʼ» (Mat. 1:20, 21). Stale de ca binni ni ruundaʼ de Biblia nacaʼ lá Jesús lu diidxaʼ hebreu riníʼcabe ni Jesúa, ni riníʼ «Jiobá nga ni Rulá». Ne biáʼsipeʼ ni riníʼ lá Jesús, purtiʼ gucanebe «cani za de Israel, cani ruluíʼ dendxu ni cananiti» para gaca arrepentircaʼ ne chuulaʼdxiʼ Jiobá ni gúnicaʼ (Mat. 10:6; 15:24; Luc. 19:10). Ne pur nga bicheeche Jesús stiidxaʼ Reinu né stale gana. Sicaríʼ bicaa Marcos: «Uyé be Galilea yegüí né be ca binni que stiidxa Dios, na be rabi be laacaʼ: “Ma bidxiña dxi gudixhe Dios guni mandar, ne ma chi aca ni. Yanna la? lainaba perdón laabe ne laguni cre stiidxa be”» (Mar. 1:14, 15). Nabé nadxibalú guca Jesús ora bicheeche diidxaʼ, ne guniʼbe cadi jneza ni cayuni xaíque yuʼduʼ que ne laacaʼ gucanecaʼ para gátibe ne guicabe lu yaga (Mar. 11:17, 18; 15:1-15).

«ENDA NANDXÓʼ NI BIʼNI DIOS»

3. Xi bizaaca guionna gubidxa de guti Jesús.

³ Despué de guti Jesús, guca ti cosa ni bidxagayaa binni. Chonna gubidxa despué gundisaʼ Jiobá laabe lade gueʼtuʼ, cadi casi binni de beela, sínuque de espíritu (1 Ped. 3:18). Para guni crécabe maʼ biasa Jesús lade gueʼtuʼ la? gúcabe casi binni ne zaqué bisihuínnibe maʼ bibánibe sti biaje. Dxi queca bihuínnibe gaayuʼ biaje ne nezalú gadxé gadxé discípulo (Mat. 28:8-10; Luc. 24:13-16, 30-36; Juan 20:11-18).

4. 1) Xi guendaridagulisaa biʼniʼ Jesús dxi ca biasa lade gueʼtuʼ. 2) Xi dxiiñaʼ bidii Jesús ca apóstol stiʼ.

⁴ Lu gaayuʼ biaje bihuinni Jesús, bíʼnibe ni nezalú ca apóstol stibe ne xcaadxi binni nuuné laacaʼ. Ne dxi que, bisiene chaahuiʼ Jesús laacabe Stiidxaʼ Dios. Biblia na: «Ne óraque bixhele be xquenda biaani ca para guiene ca ni cá lu Xquiʼchi Dios». Zacá biénecabe maca cá lu Biblia zuuti ca xhenemigu Dios Jesús ne laaca ziasa de lade gueʼtuʼ. Ra biluxe guendaridagulisaa que, dxi ca biasa Jesús lade gueʼtuʼ, bisiénebe ca apóstol stibe nápacaʼ ti dxiiñaʼ gúnicaʼ. Ne gúdxibe laacaʼ zuseendabe «tu chi güí né binni naquiiñe inaba ca perdón Dios para aca perdonar caʼ. Zuzulú ni Jerusalén, de racá ma ze ni irá guidxi». Ne laaca gudxi Jesús laacabe: «Laatu zanda güi tu ni purti biiya pe tu irá ni» (Luc. 24:44-48).

5, 6. 1) Xiñee guníʼ Jesús zaca ca discípulo que testigu stiʼ. 2) Xi zusiidiʼ ca discípulo stiʼ Jesús.

⁵ Ngue runi, cuarenta dxi despué, últimu biaje bihuinni Jesús nezalúcabe, nanna dxíchinu biene ca apóstol que ora gúdxibe laacaʼ zácacaʼ testigu stibe «ndaani guidxi Jerusalén ne idubi Judea ne Samaria ne idubi naca guidxilayú» (Hech. 1:8). Xiñee gudxi Jesús laacabe zácacabe testigu stiʼ ne cadi testigu stiʼ Jiobá yaʼ. Purtiʼ ca binni ni cucaadiaga laabe que israelita laacaʼ ne maca nácacaʼ testigu stiʼ Jiobá.

⁶ Racá nga biene ca discípulo que biquiiñeʼ Jiobá Jesús para gulá binni guidxilayú. Jma risaca modo chigulá Jiobá binni yanna que modo bilabe ca israelita de Egipto ne de Babilonia. Pur guti Jesucristu ne biasa lade gueʼtuʼ gunda bilá binni de lu náʼ guendaruchee ne guendaguti. Lu Pentecostés stiʼ iza 33, ca xpinni Cristu ni nacubi bibí pur espíritu santu que guniʼcaʼ «irá enda nandxóʼ ni biʼni Dios» ne pur ngue stale tu gupa fe Jesús. Ora gurí Jesús cueʼ Bixhoze guibáʼ, biquiiñeʼ laabe para ganda gaca arrepentir binni ne gapa fe laabe ti zacá ganda guilacaʼ (Hech. 2:5, 11, 37-41).

BIDIIBE XQUENDANABÁNIBE «PARA ILÁ STALE BINNI»

7. Xi bisihuinni cani bizaaca lu Pentecostés iza 33.

⁷ Cani bizaaca lu Pentecostés iza 33, bisihuínnicani biiyaʼ Jiobá pabiáʼ risaca guendanabani stiʼ Jesús para guxhiá stonda binni (Heb. 9:11, 12, 24). Sicaríʼ guníʼ Jesús, «benda cadi para gacané cabe naa, sínuque para gacaniá laacabe ne para udiee xpida para ilá stale binni» (Mat. 20:28). Ora guníʼ Jesús «stale binni» la? caniʼbe de ca judíu, peru cadi laasicaʼ. Dios «racalaʼdxi ulá irá binni, ne ganna ca ni dxandíʼ», purtiʼ xquendanabani Jesús nga ni chindee «xpecadu binni guidxilayú» (1 Tim. 2:3-6; Juan 1:29).

8. 1) Ximodo gunda guníʼ ca primé discípulo stiʼ Jesús de laa. 2) Dede pa guidubi bicheeche ca discípulo stiʼ Jesús diidxaʼ.

⁸ Nanna dxíchinu guca ca primé discípulo stiʼ Jesús nadxibalú. Peru cadi pur stipa si stícabe gúcacabe nadxibalú, sínuque espíritu santu stiʼ Jiobá nga bidii stipa laacabe para gunda bicheechecabe diidxaʼ (biindaʼ Hechos 5:31, 32). Biaʼ veintisiete iza despué de Pentecostés stiʼ iza 33, ca discípulo stiʼ Jesús mápeca bicheechecaʼ «ca diidxa ni dxandíʼ» lade ca judíu ne cani cadi judíu lu «idubi naca guidxilayú» (Col. 1:5, 23).

9. Casi maca guníʼ Jesús, xi bizaaca né primé neza binni ridagulisaa de dxiqué.

⁹ Triste guininu ni, peru primé neza binni ridagulisaa de dxiqué maʼ qué ñúnicaʼ ni jneza (Hech. 20:29, 30; 2 Ped. 2:2, 3; Jud. 3, 4). Casi maca guníʼ Jesús, biyubi «binidxabaʼ» modo guidale ca apóstata ne maʼ qué zahuínnipeʼ tuu nga cani dxandíʼ xpinni Cristu dede ora «iluxe guidxilayú» (Mat. 13:37-43). Biʼniʼ Jiobá Jesús Rey para guni mandar binni guidxilayú. Ne bizaaca ni lu beeu octubre iza 1914, dxi bizulú ca últimu dxi stiʼ guidxilayú stiʼ Binidxabaʼ (2 Tim. 3:1).

10. 1) Xi fecha nabé bizeeteʼ ca xpinni Cristu ni bibí né espíritu santu. 2) Xi bizaaca lu beeu octubre iza 1914, ne ximodo nánnanu zacá ni.

¹⁰ Jma de treinta iza ante, ca xpinni Cristu ni bibí né espíritu santu guniʼcaʼ lu beeu octubre iza 1914, nuu ti cosa ni zazaaca fecha ca. Guníʼcabe zacá pur ni na profecía stiʼ Daniel ra cayeeteʼ de ti yaga naroʼbaʼ ni bigácabe ne zagaa yaga que tiidiʼ si «gadxe tiempu» (Dan. 4:16). Ora guníʼ Jesús de presencia stiʼ ne ora «iluxe guidx[i]layú riʼ», guniʼbe laaca tiempu ca nga «biaʼ dxi udii Dios lugar» ca guidxi roʼ ca. Dede lu iza 1914, bihuinni dxichi maʼ nuunu lu presencia stiʼ Cristu (Mat. 24:3, 7, 14; Luc. 21:24). Nga runi, tobi de ca «enda nandxóʼ ni biʼni Dios» nga ra bíʼnibe Jesús Rey para guni mandar guidxilayú.

11, 12. 1) Xi bizulú biʼniʼ Jesús ra maʼ naca Rey lu Guidxilayú, ne xi bizaaca chupa chonna iza despué. 2) Xi bihuinni dxichi lu iza 1935. (Biiyaʼ foto ni zeeda ra ruzulú tema riʼ.)

¹¹ Cumu maʼ naca Jesucristu Rey la? qué nindaa bilabe ca xpínnibe ni maʼ bibí né espíritu santu de «Babilonia [...] guidxi roʼ» (Apoc. 18:2, 4). Lu 1919, cadi xadxí de biluxe Primera Guerra Mundial, ca xpinni Cristu ni bibí né espíritu santu bicheechecaʼ stiidxaʼ Reinu ni maʼ cayuni mandar lu guidubi naca guidxilayú ne guníʼcabe xi maʼ biʼniʼ Dios para gulá binni. Ne pur nga, stale tu biziidiʼ de Dios ne bibicaʼ para guni mandárnecaʼ Cristu guibáʼ.

¹² Lu iza 1935, bihuinni dxichi maʼ bizulú Cristu cutopa millón de «xcaadxi dendxu» ni zeeda gaca gran muchedumbre ni za de guiráʼ guidxi. Ca xpinni Cristu ni bibí nácacaʼ nadxibalú cásica guca Jesús ne cayacanecaʼ «xcaadxi dendxu» para gucheechecaʼ diidxaʼ ne guiniʼcaʼ Dios ne Cristu nga chigulá laacaʼ. Cumu qué rusaana de gucheechecabe diidxaʼ ne nápacabe fe lu guendaguti stiʼ Cristu la? zalácabe ora gueeda gran tribulación ni chigunitilú guidxilayú stiʼ Binidxabaʼ (Juan 10:16; Apoc. 7:9, 10, 14).

GÁCANU NADXIBALÚ ORA GUCHEECHENU DIIDXAʼ

13. 1) Xi maʼ gudixhe íquenu gúninu casi testigu stiʼ Jiobá. 2) Ximodo zanda gúninu ni.

¹³ Ti ndaayaʼ nga gácanu Testigu ne guininu de ca «enda nandxóʼ» ni maʼ biʼniʼ Jiobá ne ni maʼ guníʼ chiguni. Dxandíʼ, nuu biaje raca nagana para laanu gúninu ni. Stale xpinni Cristu rucheechecaʼ diidxaʼ ra qué riná binni gucaadiaga ne nabé runi búrlacaʼ ne xcaadxi xpinni Cristu rizanándacabe laacaʼ. Zanda gúninu casi biʼniʼ apóstol Pablu ne ca xcompañeru. Laabe guniʼbe: «Ucané Dios laadu para gunda bidxiña du xquidxi tu ne byuí né du laatu stiidxa be sin nidxibi du, neca uyuu tu bicaa lú laadu» (1 Tes. 2:2). Qué chuʼ dxi guireʼnu gana. Ni gúninu nga cadi gusaana de gácanu Testigu stibe dede ora guiluxe guidxilayú stiʼ Binidxabaʼ (Is. 6:11). Ne naquiiñeʼ gánnanu qué zanda gúninu ni pur stipa si stinu. Cásica biʼniʼ ca primé xpinni Cristu, naquiiñeʼ guinábanu Jiobá gudii espíritu santu stiʼ laanu ne gacané laanu né «enda nandxóʼ stiʼ» (biindaʼ 2 Corintios 4:1, 7; Luc. 11:13).

14, 15. 1) Xi biʼniʼ sentir ca binni de primé siglu que pur ca xpinni Cristu. 2) Ximodo guluu apóstol Pedru gana ca xpinni Cristu. 3) Ximodo naquiiñeʼ guni sentirnu pa gaca nanalaʼdxiʼ binni laanu pur nácanu testigu stiʼ Jiobá.

¹⁴ Ca dxi riʼ, millón de binni na naca xpinni Cristu ne runi adorar Dios, «peru pur ni runi ca rihuinni cadi dxandí ni. Feu xpiaʼ caʼ, ne qué runa caʼ. Qué zaquiiñe ca para ni nachaʼhuiʼ» (Tito 1:16). Cadi guiaandaʼ laanu lu primé siglu que stale binni nabé guca nanaláʼdxicaʼ cani dxandíʼ xpinni Cristu. Nga runi apóstol Pedru bicaa: «Dichoso de laatu pa cuʼ dí cabe laatu tisi xpinni Cristu laatu, purti nuu né Espíritu sti Dios ni nandxóʼ laatu» (1 Ped. 4:14).

¹⁵ Ñee laaca caníʼ ca diidxaʼ ca de laanu, cani nácanu testigu stiʼ Jiobá la? Laaca pue, purtiʼ laaca nácanu testigu stiʼ Jesús; purtiʼ rininu de Reinu stibe. Pa nanalaʼdxiʼ binni laanu tiisi zinenu lá Jiobá la? laaca nanaláʼdxicabe laanu purtiʼ nácanu testigu stiʼ Cristu, ne laa gudxi ca xhenemigu: «Benda purti biseenda Bixhoze naa, peru cadi culabi tu naa» (Juan 5:43). Nga runi, ora chigucheechenu diidxaʼ ne tindenécabe laanu la? cadi guireʼnu gana. Nga zusihuinni riuulaʼdxiʼ Dios ni rúninu ne «nuu né» espíritu stiʼ laanu.

16, 17. 1) Xi cazaaca ndaaniʼ stale guidxi ni nuu lu Guidxilayú. 2) Xi cadi naquiiñeʼ gusaana de gúninu.

¹⁶ Laaca naquiiñeʼ gánnanu nuu stale lugar cadale binni ni cayuu ndaaniʼ xquidxi Dios. Dede ca lugar ra nabé huareeche diidxaʼ cadxélarunu binni ni riuulaʼdxiʼ gucaadiaga guiráʼ ca cosa sicarú ni chiguni Jiobá para gulá laanu. Cadi guiaandaʼ laanu guibiguétanu nagueendaca ra nuu ca binni ni riuulaʼdxiʼ guiziidiʼ de Dios, ne pa ganda la? guidúʼndanenu laacabe ne gacanenu laacabe gudiicabe xquendanabánicabe Jiobá ne chuʼnísacabe. Zándaca guni sentirnu casi Sarie, ti gunaa xpinni Cristu de Sudáfrica ni maʼ ziné jma de sesenta iza de cucheeche diidxaʼ, laa guníʼ: «Rudieeʼ xquíxepeʼ Jiobá, Dios ni jma nandxóʼ, pur bidii Xiiñiʼ guti pur binni, ne zacá zanda chuaaʼ jma gaxha de laa, ne riecheʼ purtiʼ randa rusiideʼ binni de labe o xlabe». Laabe ne Martinus, xheelabe, huayacanécabe stale binni —lade ca binni ca nuu chonna xiiñicabe— gaca xpinni Jiobá. Sarie guniʼruʼ: «Nabé ruchá tipa dxiiñaʼ riʼ ladxiduáʼ, ne espíritu santu stiʼ Jiobá rudii stipa guiráʼ ca xpinni para cadi gusaana de gúnicaʼ dxiiñaʼ ni zulá binni».

¹⁷ Pa nácanu xpinni Cristu ni maʼ guyuunisa o cayúninu stipa para chuʼnísanu la? nápanu stale razón para chuʼnu nayecheʼ, purtiʼ nuunu lade ca testigu stiʼ Jiobá ni nuu lu guidubi naca Guidxilayú. Nga runi, cadi gusaana de gucheechenu diidxaʼ ne gúninu stipa pur cadi chuʼnu lade ca binni ni nuu ndaaniʼ guidxilayú stiʼ Binidxabaʼ. Zacá zusisácanu Jiobá, Bixhózenu ni nuu guibáʼ ne qué zusaana de gácanu testigu stiʼ Jiobá.