CANI RINABADIIDXAʼ BINNI DE BIBLIA
Ñee zanda gacané ca ángel laanu la?
Cásica gucané ca ángel ca Daniel, ti xpinni Dios de dxiqué, zacaca racanécabe binni gucaadiágacaʼ cani zeeda lu Biblia
Dede ante guzáʼ Dios binni, bizaʼbe millón de ángel (Job 38:4, 7). Ca espíritu ni napa stale poder riʼ rúnicaʼ xhiiñaʼ Dios. Nuu biaje, ruseendabe laacaʼ para gacanecaʼ ne gápacaʼ ca binni ni ruzuubaʼ diidxaʼ (Salmo 91:10, 11). Ca dxi stinu riʼ, ca ángel ca racanécabe binni gucaadiágacaʼ ca diidxaʼ ziné ca discípulo stiʼ Jesús. (Biindaʼ Apocalipsis 14:6, 7.)
Yanna, ñee naquiiñeʼ guni orarnu ca ángel ca para gacanecaʼ laanu la? Coʼ; ora laanu runi orarnu la? cayuni adorarnu, ne Dios si nga naquiiñeʼ guni adorarnu (Apocalipsis 19:10). Cumu runi ca ángel ca xhiiñaʼ Dios, rúnicabe ni nabe ne cadi ni na binni. Nga runi, Dios si nga naquiiñeʼ guni orarnu lu lá Jesús. (Biindaʼ Salmo 103:20, 21 ne Mateo 26:53.)
Ñee nuu ángel malu la?
Cásica modo bizáʼ Dios binni guidxilayú, bidiibe lugar laacaʼ cuicaʼ gúnicaʼ ni jneza o ni cadi jneza la? zacaca bizaʼbe ca ángel. Triste guininu ni, peru stale de laacabe gudixhe íquecabe cadi guzuubacabe stiidxaʼ Dios (2 Pedro 2:4). Primé ni qué nuzuubaʼ diidxaʼ nga Binidxabaʼ; guyuu xcaadxi biʼniʼ casi bíʼnibe ne gúcacaʼ demonio. Cadi xadxí de guládxicabe laacaʼ de guibáʼ ne biseendacabe laacaʼ lu Guidxilayú. (Biindaʼ Apocalipsis 12:7-9.)
Dede lu iza 1914 jma maʼ bidale cosa malu ne guendaridinde ne qué huayuu dxi gácani zacá. Nga rusihuinni mayaca gunitilú Dios Binidxabaʼ ne ca demonio stiʼ, ne zúnibe Guidxilayú riʼ ti paraísu. (Biindaʼ Apocalipsis 12:12 ne 21:3, 4.)