Nánnaluʼ tu láʼ Dios la?

Ñee zanda gápaluʼ ti xhamíguluʼ sin gánnaluʼ tu láʼ la? Qué zanda diʼ gaca nga njaʼ. Ti gunaa láʼ Irina de guidxi Bulgaria guníʼ: «Qué zanda diʼ gaca xhamígunu Dios pa qué gánnanu tu láʼ». Riéchenu stale purtiʼ casi bizíʼdinu lu tema gudídinu ca, Dios peʼ racalaʼdxiʼ chuʼnu gaxha de laa. Nga runi, lu Biblia maʼ gúdxibe laanu tu labe ora guniʼbe: «Naa nga Jiobá. Nga nga laʼyaʼ» (Isaías 42:8).

Peru, ñee rizaalaʼdxiʼ Dios ni bizáʼ laanu gánnanu tu láʼ ne guininu ni la? Guníʼ ique ndiʼ: Lá Dios, lu diidxaʼ hebreu ricané ni tapa letra rábicabe Tetragrámaton, zeedani biaʼ 7,000 biaje lu ca documentu jma nayooxhoʼ stiʼ Biblia ni gucuá lu diidxaʼ hebreu, ni runibiáʼcabe casi Antiguo Testamento. Ne lá Dios nga ni jma rieeteʼ lu ca documentu riʼ que xcaadxi lá. Nga rusihuinni racalaʼdxiʼ Jiobá gánnanu lá ne guininu ni.a

Cumu naca Jiobá ti Dios nayá ne napa stale poder la? nuu tu riníʼ ique qué zusihuínninu nápanu respetu laabe pa guininu labe. Ni cadi jneza gúninu nga iquiiñenu lá Dios para gúninu cosa malu, casi ora niquiiñenu lá ti xhamígunu para ñúninu xiixa ni cadi jneza. Peru zanda iquiiñenu lá Dios né respetu, purtiʼ Jiobá racalaʼdxiʼ gusisaca ca xpinni lá ne gusiidicaʼ ni xcaadxi binni (Salmo 69:30, 31; 96:2, 8). Cadi guiaandaʼ lii bisiidiʼ Jesús ca discípulo stiʼ guni orarcaʼ sicaríʼ: «Bixhózedu ni nuu guibáʼ, guisácapeʼ laluʼ». Rusisácanu lá Dios ora rusíʼdinu ni sti binni, ne nga ruchiña laanu gaxha de laabe (Mateo 6:9, TNM).

Biblia na rucaadiaga chaahuiʼ Dios «cani rusisaca lá» (Malaquías 3:16, La Biblia de las Américas). Guiráʼ cani rusisaca lá Jiobá maʼ bidii stiidxabe laacaʼ: «Zapaʼ laabe purtiʼ maʼ nánnabe tu laʼyaʼ. Laabe zucaabe ridxi naa, ne naa zácabe laabe. Ziuaaʼ ra nuube ora tiidibe lu guendanagana» (Salmo 91:14, 15). Nga runi, pa racaláʼdxinu gaca xhamígunu Dios la? naquiiñeʼ gánnanu tu labe ne guininu ni.