Gástiruʼ sti cosa jma galán que guneʼ xhiiñaʼ Dios

Ti iza despué bireeʼ lu caadxi película ne lu stale de laacani naa nga binni ni jma rihuinni lúcani. Stale reporteru riuulaʼdxiʼ guni entrevistar ne cuee foto naa, laaca nuu tu runi invitar naa ra chiguiree ti película, ra chiguixeleʼ xiixa lugar, chitahuaʼ ne chitahuaxhieʼ. Puru si de naa maʼ caníʼ binni.

Peru qué nindaa bidieeʼ cuenta cadi nabaneʼ nayecheʼ casi modo guníʼ iqueʼ. Lu stale película ra bireeʼ bineʼ cosa ra guluaaʼ xquendanabaneʼ ra naxoo. Ca actor de Hong Kong cadi biaacaʼ iquiiñecaʼ sti binni para guiree lugar sticaʼ casi rúnicabe ni Hollywood, nga runi naapiaʼ naquiiñeʼ guneʼ ca escena que. Tobi de cani bineʼ nga gudideniáʼ ti motocicleta ique ti carru. Lu stale de ca película ra bireeʼ que rihuinni espiritismo, cosa dxabaʼ ne ra cadinde binni.

Lu iza 1995 bichaganaʼyaʼ ti hombre ni runi película. Neca ruluíʼ napaʼ guiráʼ ni caquiiñeʼ para guibaneʼ nayecheʼ, nacaʼ famosa, napaʼ bueltu ne nadxii xheelaʼ naa la? guyuaaʼ triste ne gucaʼ deprimir. Gudixheʼ iqueʼ gusaanaʼ de guireeʼ lu película.

BIETENALADXEʼ NI BIZIIDEʼ DXI NAHUIINEʼ

Guizáʼ riuaaʼ triste ora rietenaladxeʼ tiempu guyé ti familia testigu stiʼ Jiobá yeguundanecaʼ naa ne bendaʼ Biblia guiráʼ sábadu. Testigu ni láʼ Joe McGrath, ni gúdxidu laa «apá Joe», biindané laadu Biblia ora biindané guionnaʼ xiiñidxaapaʼ. Nabé runi respetarbe xheelabe ne ca xiiñibe. Guyuuladxeʼ chiniáʼ laacabe reunión ne chupa chonna biaje yeniáʼ laacabe asamblea stícabe. Aque nayecheʼ guyuaaʼ lade ca Testigu dede bineʼ sentir nuu tu cayapa naa.

Peru qué riuuladxeʼ chuaaʼ ra lidxeʼ. Pur xpiaʼ bixhozeʼ nabé bininabe jñaaʼ ne pur ngue nabé guca deprimir. Dxi napaʼ 10 iza bisaana jñaaʼ de guidagulisaané ca testigu stiʼ Jiobá. Guyaaruaʼ neca maʼ sin gana, ne guyuaanisaʼ dxi napaʼ 17 iza. Peru qué nindaa bisaanaʼ de guibaneʼ casi na Stiidxaʼ Dios ne bixeleʼ de ca binni ridagulisaa.

GUDIXHEʼ IQUEʼ GUIBIGUETAʼ

Despué de bichaganaʼyaʼ, yeganna chupa hombre ni rusiidiʼ lade ca testigu stiʼ Jiobá naa, laacabe ridagulisaacabe gaxha de ra lidxeʼ. Bisiénecabe naa ximodo gacaʼ xhamiguaʼ Jiobá Dios sti biaje ne gúdxicabe ti misionera láʼ Cindy gacané naa. Dxi guyé Cindy maʼ huaxiéʼ runeʼ cré cani rusiidiʼ Biblia. Ngue runi, gunabaʼ laabe guluiʼbe naa dxandíʼ Stiidxaʼ Dios ni. Biluíʼ Cindy naa caadxi profecía ni zeeda lu Biblia ni maʼ guca. Qué nindaa gucaʼ xhamigaʼ laabe ne bidieeʼ lugar guluiʼbe naa cani naquiiñeʼ guiziidiʼ binni de Biblia. Raqueruʼ nga bieneʼ nabé nadxii Jiobá naa ne racaláʼdxibe guibaneʼ nayecheʼ.

Dxi guyaaʼ guendaridagulisaa sti biaje bidieeʼ cuenta jma nayecheʼ runeʼ sentir ora chuaaʼ lade ca Testigu que ora maʼ nuaaʼ lade ca binni ni riree lu televisión. Modo bibaneʼ dxi nahuiineʼ bicaani naa guiníʼ iqueʼ guirutiʼ nadxii naa ne laaca pur ngue qué ñapaʼ confianza binni. Tobi de ca binni ridagulisaa biluíʼ naa lu Biblia ximodo gusaanaʼ de guiníʼ iqueʼ zacá. Laaca gupaʼ xhamiguaʼ ni nadxii naa.

GÁSTIRUʼ STI COSA JMA GALÁN QUE GUNEʼ XHIIÑAʼ DIOS

Lu iza 1997 naa ne xheelaʼ yendézadu ndaaniʼ guidxi Hollywood (California, Estados Unidos). Biquiiñeʼ stale tiempu stinneʼ para gacaniáʼ jma binni guiziidiʼ ne gudii cuenta zacané ca conseju ni zeeda lu Stiidxaʼ Dios laa. Ni jma rusiecheʼ naa nga gacaniáʼ binni guiziidiʼ de Biblia que gacaʼ famosa. Lu iza 2002 bidxaagaʼ Cheri, maca binibiaʼdu ndaaniʼ guidxi Hong Kong. Casi tobi si ni gudídidu lu xquendanabánidu. Laabe gúcabe Miss Hong Kong ti iza ante que naa. Ne dxi bineʼ ganar la? laabe guluube corona iqueʼ. Laaca actriz laabe ne bíʼnibe película ne bíʼnibe dxiiñaʼ né ca director ni jma runibiáʼ binni. Laaca Hollywood nabézabe.

Guizáʼ biaʼyaʼ Cheri ora gunnaʼ guti xnovio, purtiʼ bizuhuaadxí ladxidóʼ. Qué ñanda ñatadxí ladxidoʼbe, neca nuube lade religión stiʼ ca budista. Laaca casi nuaaʼ que nuube, neca gúpabe ni ñuulaʼdxiʼ guiráʼ binni ñapa: gúcabe famosa peru guyuube triste ne qué ñápabe confianza binni. Bisiideʼ laabe cani biziideʼ lu Biblia, peru pur religión stibe qué ñanda ñénebe cani rusiidiʼ Biblia.

Lu iza 2003, guniʼné Cheri naa dxi nuu Vancouver (Canadá), ra cayuni grabar ti película. Dede cayéchebe gúdxibe naa xi bizaacabe ora zebe lu carretera ne laga ziyuuyabe guiráʼ cosa galán nuu nezaqué biʼniʼ orarbe Dios ne gúdxibe laa: «Tu lii pue. Tu laluʼ». Biáʼsipeʼ óraque gudíʼdibe ra nuu ti Yoo stiʼ Reinu ne biiyabe cá lá Jiobá raqué. Bidiibe cuenta bicabi Dios ni canabadiidxabe laa que ne biyúbibe guiníʼnebe ti testigu stiʼ Jiobá. Ngue runi, gunieniáʼ caadxi Testigu nuu nezaqué ne qué nindaa guyé Cheri ti guendaridagulisaa guidxi Vancouver ni raca lu diidxaʼ chino.

Sicaríʼ gudxi Cheri naa: «Ca binni riʼ dxandíʼ rizaaláʼdxicaʼ naa. Randa rabeʼ laacabe ximodo cayuneʼ sentir». Guizáʼ biecheʼ pur ni gúdxibe naa que, purtiʼ dxi bíʼnibe película qué ñuu dxi ñápabe xhamígube. Qué nusaana Cheri de nidagulisaa ndaaniʼ guidxi que. Peru lu iza 2005 biʼniʼ firmarbe ti contratu para gúnibe chupa película China, ngue runi gupa xidé bibiguétabe Hong Kong. Despué, lu iza 2006 bidiibe xquendanabánibe Jiobá ne guyuunísabe lu ti guendaridagulisaa ni guca raqué para gácabe Testigu.

RIECHEʼ ORA GACANIÁʼ XCAADXI BINNI

Lu iza 2009 bichaa xquendanabani Cheri. Gudixhe íquebe gusaanabe dxiiñaʼ stibe ti ganda gúnibe jma lu xhiiñaʼ Jiobá. Gúpabe stale xhamígube lade ca binni ridagulisaa. Biquiiñebe stale tiempu stibe para gucheechebe diidxaʼ ne yanna nabé galán runi sentirbe purtiʼ cayacanebe binni guibani nayecheʼ (Mateo 24:24).

Gudixhe ique Cheri guiziidiʼ nepalí ti gacané ti grupu de Testigu ni rucheeche diidxaʼ ra nuu ca binni de Nepal ni nabeza Hong Kong. Ca binni de Hong Kong rúnicaʼ menu ca binni de Nepal purtiʼ gadxé costumbre nápacaʼ ne qué riniʼcaʼ inglés nin chinu. Gudxi Cheri naa nabé riuulaʼdxiʼ gacané ca binni que guiénecaʼ cani cá lu Biblia. Casi ti dxi canagucheechebe diidxaʼ de yoo pur yoo, guníʼnebe ti gunaa ni nanna caadxi si cosa de Jesús peru qué lica ganna gastiʼ de Jiobá. Biluíʼ Cheri laabe ruzeeteʼ Biblia biʼniʼ orar Jesús Bixhoze ni nuu guibáʼ. Ora bidii gunaa que cuenta zanda guni orar Dios ni dxandíʼ gucalaʼdxiʼ guiziidiʼ jma. Qué nindaa de ngue bizulú xheelaʼ gunaa riʼ ne xiiñidxaapaʼ biindacaʼ Biblia (Salmo 83:18; Lucas 22:41, 42).

Ora biiyaʼ pabiáʼ nayecheʼ riuu Cheri pur riquiiñeʼ tiempu stiʼ para gucheeche diidxaʼ la? guníʼ iqueʼ: «Xiñee qué guneʼ ni cayúnibe riʼ yaʼ». Para tiempu riʼ maʼ nabezaʼ Hong Kong. Gudixheʼ chaahueʼ tiempu stinneʼ ti ganda gusiideʼ binni cani zeeda lu Biblia. Nabé riuuladxeʼ gucaadiaʼgaʼ binni ne gacaniáʼ laacaʼ guiénecaʼ Stiidxaʼ Dios.

Casi ti gunaa de Vietnam ni biindaniáʼ Biblia nisi maʼ cayuuna ne nuu triste. Yanna maʼ nuube nayecheʼ ne maʼ nápabe stale xhamígube lade ca binni ridagulisaa.

Naa ne Cheri bidiʼdu cuenta gástiruʼ sti cosa jma galán que gúnidu xhiiñaʼ Dios. Nécapeʼ nabé galán biʼniʼ sentirdu ora bínidu película ne gúcadu famosa, bidiʼdu cuenta jma galán nga gusíʼdidu binni de Jiobá purtiʼ rusisácadu laabe. Maʼ bidiʼdu cuenta dxandíʼ ca diidxaʼ ni guníʼ Jesucristu: «Jma nayeche ni rudii que ni ricaa» (Hechos 20:35).