CANI RINABADIIDXAʼ BINNI DE BIBLIA

Ñee zadxiña dxi maʼ qué ziuu guendapobre la?

Guiráʼ iza cayati millón de binni purtiʼ qué rizaa ni gocaʼ ne pur nga raca huaracaʼ. Neca nuu guidxi roʼ napa stale bueltu, stale binni qué lica gapa ni tiidiné dxi. Biblia ruzeeteʼ maʼ xadxí nuu guendanagana riʼ. (Biindaʼ Juan 12:8.)

Para maʼ qué chuʼ binni pobre caquiiñeʼ ti gobiernu ni guni mandar lu guidubi Guidxilayú ne gucheechenáʼ guiráʼ ni riquiiñeʼ binni. Ne laaca caquiiñeʼ cueeni guiráʼ guerra cayaca, purtiʼ pur laacani nuu stale binni pobre. Ne ngapeʼ nga ni chiguni gobiernu stiʼ Dios. (Biindaʼ Daniel 2:44.)

Tu laa zanda cuee guendapobre

Maʼ gulí Dios Xiiñiʼ, Jesucristu, ti guni mandar binni guidxilayú (Salmo 2:4-8). Zacané Jesús binni pobre ne zabeebe ca binni ni guquiichináʼ stobi ne maʼ guirutiʼ zadinde. (Biindaʼ Salmo 72:8, 12-14.)

Zacané Jesucristu, «Príncipe ni rudii Guendariuudxi», guibani binni lu Guidxilayú tobi si ne guirutiʼ tu zuchibi laacaʼ. Dxi ca, guiráʼ binni zapa lidxi, ti dxiiñaʼ ni chuulaʼdxiʼ ne qué ziaadxaʼ ni gó. (Biindaʼ Isaías 9:6, 7; 65:21-23.)