Risaca gutiidiláʼdxinu donda

CONSEJU ZEEDA LU BIBLIA: «Laguni perdonar guiráʼ ni guni stobi laatu pa tuuxa napa xiixa queja né laatu. Cásica biʼniʼ perdonar Jiobá guiráʼ xixetu, zacaca laguni» (Colosenses 3:13, TNM).

Xi riníʼ ni. Biblia ruchaaga guendaruchee casi ora nuzaabiʼ tuuxa ne perdón casi ora guiaxa ni (Lucas 11:4). Ti libru ni rusiene ni cá lu Biblia na diidxaʼ griegu biquiiñecabe para «perdón» laca laani nga «gusiaandaʼ binni ni nuzaabicabe laa ne cadi guicá lú guiaxa ni». Nga runi, ora gutiidiláʼdxinu stonda tuuxa ni bininá laanu, casi ñaca maʼ cadi nuzaabibe laanu. Ora rutiidiláʼdxinu donda qué riníʼ diʼ nga riuuláʼdxinu ni biʼniʼ binni ca o qué ñuniná ni laanu. Ni rusihuínninu nga qué ridaʼnu xiana, neca nuu razón para ñuni sentirnu ni.

Risaca conseju riʼ la? Guiranu rucheʼnu purtiʼ gulenenu donda (Romanos 3:23). Nga runi, jneza nga gutiidiláʼdxinu stonda binni, purtiʼ ziuu ora zaquíʼñenu gutiidiláʼdxicabe stóndanu. Ne ora gúninu ni zabeendunu ni galán. Ximodo yaʼ.

Zuninanu laca laanu pa nisi cadxiichinu, daʼnu xiana ne qué gutiidiláʼdxinu stonda binni. Ne pa qué guchaʼnu modo laanu maʼ qué ziuʼnu nayecheʼ ne pa puru laasini maʼ caníʼ íquenu gastiʼ zabeendunu. Dede zuni huará ni laanu. Lu ti informe ni biʼniʼ doctor Yoichi Chida ne profesor de Psicología Andrew Steptoe lu ti revista ni caníʼ de medicina na: «Ca estudiu huayaca yanna rusihuinni cani ora guidxiichi xhaata binni ne gacananalaʼdxiʼ zuni huarani ladxidóʼ» (Journal of the American College of Cardiology).

Yanna, xi zabeendunu pa gutiidiláʼdxinu donda yaʼ. Ziuʼnu tobi si ne ziuʼnu galán né binni. Peru ni jma risaca nga zinándanu ejemplu stiʼ Dios, purtiʼ laa rutiidilaʼdxiʼ donda stiʼ cani gaca arrepentir ne ribézabe gúninu zacaca (Marcos 11:25; Efesios 4:32; 5:1).