Ca profecía ni dxandíʼ maʼ guca cumplir

Casi maca bizéʼtenu que, gudxite si oráculo de Delfos que rey Creso, pur ni gúdxibe laa que bicaalú rey stiʼ Persia ne biniti. Peru lu Biblia zeeda ti profecía ni cuzeeteʼ de rey stiʼ Persia, ne guca cumplir ni módopeʼ guníʼcabe zazaaca ni.

Chupa gayuaa iza ante (gale Ciro), maca bizeeteʼ profeta Isaías labe, ne bisiene ximodo zuni ganarbe guidxi Babilonia.

Isaías 44:24, 27, 28. «Ndiʼ nga ni maʼ guníʼ Jehová, [...] xa ni rabi nisa ziáʼ: “Bibidxi; ne zucuiidxeʼ guiráʼ guiiguʼ stiluʼ”; ni riníʼ de Ciro: “Laabe nga pastor stinneʼ, ne guiráʼ ca ni gacalaʼdxeʼ laabe zúnibe guiráʼ xixé ni”; ne ora guiniéʼ de Jerusalén: “Zabiguetaʼ zucuícabe ni sti biaje”, ne templu que: “zúnicabe cimientu stini”».

Según historiador griegu Heródoto, ejércitu stiʼ Ciro guleechú guiiguʼ didi ndaaniʼ guidxi Babilonia. Pur ni biʼniʼ Ciro, gunda gudíʼdibe guiiguʼ que ne ca soldadu stibe ne zaqué gunda biuube ndaaniʼ guidxi que. Biʼniʼ ganársibe guleebe ca Judíu ni nuu de esclavu Babilonia ne bidiibe lugar guibiguétacaʼ ne guni chaahuicaʼ Jerusalén, purtiʼ raca setenta iza de binitilúcabe ni.

Isaías 45:1. «Ndiʼ nga gudxi Jehová hombre ni gulí, Ciro, ni maʼ naazeʼ náʼ ladu derechu, para guneʼ mandar guidxi roʼ nezalú, para gaxhaʼ poder stiʼ ca rey, para guxheleʼ ca puertaʼ de chupa ndaga nezalú ne cadi guieeguʼ ca puertaʼ ca».

Guyuu ca persa ndaaniʼ guidxi que, neza ra puertaʼ naroʼbaʼ stini, purtiʼ qué nudiicabe cuenta biaanaxeleʼ ni. Pa ñaca ñanna ca babilonio xi cá ique Ciro guni, nuseegucaʼ guiráʼ ca puertaʼ ni nuu gaxha de guiiguʼ que. Peru cumu qué ñúnicabe ni la? maʼ qué ñapa guidxi que gastiʼ ni nulá laa.

Cásica guca cumplir profecía riʼ, zeedaruʼ xcaadxi profecía lu Biblia ni maʼ guca cumplir cásipeʼ modo gucuá ca ni.a Gadxé ca profecía riʼ de ni riníʼ binni chigaca, ne stale biaje zeeda ca ni de ca dios falsu, peru ca profecía ni cá lu Biblia, zeeda ca ni de Dios ni dxandíʼ, «Ni riníʼ ximodo riluxe xiixa ni ruzulú, ne ni riníʼ dede ante ca cosa ni caʼruʼ gaca» (Isaías 46:10).

Jehová, tobi lucha Dios ni dxandíʼ, laasi nga zanda guiníʼ dxandíʼ zaca xiixa. Ne labe raca significar «Laabe nga rúnibe ni caquiiñeʼ gaca», ndiʼ riníʼ napa Dios poder para guiníʼ xi chiguizaaca despué ne zanda gúnibe guiráʼ ni maʼ guniʼbe. Nga runi zanda guni crenu zuni cumplirbe guiráʼ ni maʼ biʼniʼ prometerbe.

CA PROFECÍA NI CAYACA CUMPLIR CA DXI RIʼ

¿Ñuuláʼdxiluʼ ñánnaluʼ xi maca cá lu Biblia zazaaca ca dxi stinu riʼ la? Raca biaʼ chupa mil iza, maca guníʼ Biblia «nagana» zaca «ca últimu dxi» riʼ «ne nadipaʼ zaca para binni guni huantar ni». Peru, ¿xii nga ca últimu dxi ni caninu yaʼ? Cadi ca últimu dxi stiʼ Guidxilayú riʼ o ca binni nabeza ndaaniʼ ni, sínuque ca últimu dxi stiʼ guiráʼ guendaridinde, ni runi tuuxa ora ruquiichináʼ binni pobre ne ca yuubaʼ ni cayuniná binni maʼ raca stale iza. Guidúʼyanu caadxi profecía ni caníʼ de ca últimu dxi.

2 Timoteo 3:1-5. «Lu ca últimu dxi [...] zuyubi binni puru si para laa, zannaxhiicaʼ bueltu, zácacaʼ presumidu ne orgulloso, zucaalucaʼ Dios ne zucaalucaʼ binni, qué zuzuubacaʼ stiidxaʼ jñaacaʼ ne stiidxaʼ bixhózecaʼ, qué zácacaʼ binni agradecidu ne zucheenecaʼ binni. Qué zannaxhiicaʼ binni ne qué zanacaʼ chuʼcaʼ de acuerdu, zaniʼcaʼ mal de sti binni para guninacaʼ ne qué zucueezacaʼ laacaʼ, zácacaʼ naduxhuʼ ne zaca nanaláʼdxicaʼ guiráʼ ni jneza. Zuni traicionarcaʼ binni ne zácacaʼ tercu, zácacaʼ orgulloso ne jma zacá íquecaʼ gúnicaʼ ni riuuláʼdxicaʼ que gannaxhiicaʼ Dios. Zusihuínnicaʼ casi ora runi adorarcaʼ Dios, peru pur modo nabánicaʼ zahuinni cadi dxandíʼ ni».

¿Ñee huayuuyaluʼ zeʼ dxi zidale binni ni naca zacá la? ¿Ñee cadi rábiluʼ nabáninu lade binni orgulloso ni ruyubi puru para laasi ne nisi bueltu ricá íquecaʼ la? ¿O huayuuyaluʼ binni ni nabé exigente laa ne nin qué riná chuʼ razón la? Laaca huayuuyaluʼ maʼ qué ruzuubaʼ xiiñiʼ binni diidxaʼ ne nuu tu ruyubi ni chuulaʼdxiʼ lugar de nuyubi Dios. Ne zeʼ dxi jmaruʼ si feu modo nabani binni.

Mateo 24:6, 7. «Ne zunadiágatu cayaca guerra ne noticia de guerra [...]. Purtiʼ zadinde ti guidxi ne sti guidxi ne zucaalú ti reinu sti reinu».

Según caadxi cálculo, lu ca guerra ni maʼ guca dede lu iza 1914 hasta ca dxi stinu riʼ, huayati jma de ti gayuaa millón de binni. Bixuiʼlú pabiáʼ huayuunaʼ stale binni ne huayacaná pur guiráʼ guendaguti riʼ. Pur guiráʼ ni huayaca riʼ, ¿ñee huayacané ni para maʼ cadi chuʼruʼ guerra la?

Mateo 24:7. «Ziuu hambre».

Programa Mundial de Alimentos ná: «Guidxilayú riʼ runi producir ni stale guendaró para guiráʼ binni nabeza luni, peru 815 millón de binni, tobi de cada gaʼ, ridiʼdiʼ dxi sin gó. Ne tobi de cada chonna nuu desnutridu». Guiráʼ iza rati jma de chonna millón de xcuidihuiiniʼ pur guendarindaana.

Lucas 21:11. «Zaca xu roʼ».

Guiráʼ iza raca biá 50,000 xu naroʼbaʼ ne 100 de ca xu riʼ runiná ca ni stale edificiu. Ne casi guiráʼ iza raca ti xu naroʼbaʼ lu Guidxilayú riʼ. Según ti estudiu ni guca entre iza 1975 ne 2000, huayati 471,000 binni pur xu naroʼbaʼ.

Mateo 24:14. «Ne zaca predicar ca noticia galán stiʼ Reinu lu guidubi guidxilayú para gunadiaga guiráʼ xixé guidxi ni, ne oraqueruʼ nga gueeda fin».

Yanna riʼ nuu jma de xhono millón de testigu stiʼ Jehová ni runi predicar ca noticia galán de Reinu stiʼ Dios lu jma de 240 guidxi ne territorio, zándapeʼ guininu guidubi naca Guidxilayú. Runadiágacabe mensaje riʼ ndaaniʼ stale guidxi roʼ ra nuu stale binni, ne ndaaniʼ ca guidxihuiiniʼ ni nuu zitu, ne lu ca dani ne ndaaniʼ guiʼxhiʼ. Peru profecía ca laaca ruzeeteʼ ora maʼ guníʼ Dios maʼ guca predicar guidubi Guidxilayú la? oraqueruʼ nga «iluxe guidxilayú riʼ» ¿Xi riníʼ ndiʼ yaʼ? Riníʼ ni zanitilú guiráʼ gobiernu stiʼ Guidxilayú riʼ ne zuchaa modo nabani binni ora guni mandar Reinu stiʼ Dios. ¿Gunáʼ nga ca promesa chiguni cumplir Reinu riʼ yaʼ? Lu ca yaza ni zeeda ca zadxélaluʼ respuesta ca.