Ni rinabadiidxaʼ cani ruundaʼ

Ca diidxaʼ ni zeeda lu Salmo 144:12-15, ¿ñee caníʼ ni de xquidxi Dios la? o de ca binni malu ni riete lu versículo 11?

Textu hebreu riʼ zanda guiénenu ni de chupa modo. Ne ndiʼ zacané laanu guiénenu textu riʼ:

1. Biindaʼ guidubi capítulo 144. Lu versículo 12 hasta 14 riete de ca ndaayaʼ ni ricaa ca binni nachaʼhuiʼ, cani rinabaʼ gulá Dios laacaʼ de lu náʼ ca binni malu ni riete lu versículo 11. Guiropa biaje riete diidxaʼ «nayecheʼ» lu versículo 15 caníʼ ni de ca binni nachaʼhuiʼ ni «napa Jiobá casi Dios stiʼ».

2. Zacaca ná xcaadxi versículo de lu Biblia ni caníʼ de ca ndaayaʼ chigudii Dios ca xpinni ni qué gusaana laa. Salmo 144 rusihuinni pabiáʼ naroʼbaʼ confianza gupa David Jiobá. Guyuube seguru despué de gulá Jiobá guidxi Israel de ca enemigu stiʼ, zaguu ndaayaʼ laacabe, zabánicabe nayecheʼ ne zudii laacabe stale cosa (Lev. 26:9, 10; Deut. 7:13; Sal. 128:1-6). Ti ejemplu de laani nga ni zeeda lu Deuteronomio 28:4, ná ni: «Ziuu ca xiiñiluʼ ndaayaʼ ne ni gudii layú stiluʼ ne xiiñiʼ ca yuze stiluʼ ne ca yuzehuiiniʼ stiluʼ ne xiiñiʼ ca dendxuhuiiniʼ stiluʼ». Dxi biʼniʼ mandar Salomón, xiiñiʼ David, gupa guidxi que guendariuudxi ne qué ñuu dxi ñaadxaʼ laacaʼ gastiʼ. Caadxi de cani biʼniʼ Salomón dxi biʼniʼ mandar bisihuinni cani ni chiguni Mesías dxi guni mandar (1 Rey. 4:20, 21; Sal. 72:1-20).

Salmo 144 riʼ racané laanu guiénenu jma ca cosa ni maʼ xadxí cabeza ca xpinni Jiobá: gunitilú Dios ca binni malu, chuʼ guendariuudxi ne qué chuʼ dxi guiaadxaʼ gastiʼ ca binni nachaʼhuiʼ (Sal. 37:10, 11).