Xi zanda gúninu para chuuláʼdxinu ne cueendunu jma ora guni estudiarnu Biblia

BIDXAAGALÚ Josué ti guendanagana nabé naroʼbaʼ: chinebe guidxi Israel lu Tierra Prometida. Peru para ganda chinebe guidxi riʼ la? caquiiñeʼ gudxiilube caadxi guendanagana. Peru gudxi Jiobá laabe zabeendube ni galán ne guluu gana laabe para gácabe nadxibalú ne nadipaʼ. Gudxi Jiobá laabe gúnibe ni ná ca Ley stiʼ ne gúʼndabe cani ridxí ne huaxhinni ti ganda gúnibe ni ná cani. Ne laaca gudxi Jiobá laabe pa gúnibe ni la? zabeendube ni galán ne zúnibe cani né guendabiaaniʼ (Jos. 1:7, 8).

Lu ca últimu dxi riʼ, jma nagana zaca ni purtiʼ zadxaagalunu stale guendanagana (2 Tim. 3:1). Laanu laaca zabeendunu ni galán pa gúninu ni gudxi Jiobá Josué. Pa guidúʼndanu Biblia gatigá la? zacané ni laanu gúninu ni ná ca principiu stiʼ Dios ora guidxaagalunu xiixa prueba.

Peru stale de laanu qué gánnanu ximodo guni estudiarnu Biblia ne nuu xcaadxi la? qué lica riuulaʼdxiʼ guni estudiar ni. Peru cumu nánnanu nabé risaca guni estudiarnu Biblia la? galán guidúʼndanu información ni zeeda lu tema ni láʼ «Zanda gúniluʼ cani zeeda raríʼ». Lu tema ca zadxélaluʼ caadxi sugerencia guizáʼ galán ni zacané lii cueenduluʼ ni galán ne chuuláʼdxiluʼ guni estudiarluʼ Biblia jma.

Ti salmista biindaʼ sicaríʼ: «Gucané naa sayaʼ lu neza stiluʼ casi ná ca mandamientu stiluʼ, purtiʼ guizáʼ riuuladxeʼ ni» (Sal. 119:35). Lii laaca zanda chuuláʼdxiluʼ guni estudiarluʼ Stiidxaʼ Dios jma. Mientra jma gúʼndaluʼ ni la? jma stale perla espiritual zadxélaluʼ.

Neca cadi chineluʼ ti guidxi paxaraa casi biʼniʼ Josué ni la? caquiiñeʼ gudxiiluluʼ ca guendanagana stiluʼ. Nga runi galán gúniluʼ casi biʼniʼ Josué, biindaʼ Stiidxaʼ Dios ne biʼniʼ ni ná ni, purtiʼ zacá zabeenduluʼ ni galán. Pa gúniluʼ ni la? zabeenduluʼ ni galán ne guiráʼ cosa ni gúniluʼ, zúniluʼ cani né guendabiaaniʼ.