¿Ñee casi ti escudu naroʼbaʼ fe stinu la?

1, 2. a) Casi ná Efesios 6:16, ¿xiñee caquiiñeʼ gaca fe stinu casi ti escudu naroʼbaʼ? b) ¿Xi pregunta zacábinu lu artículo riʼ?

CAQUIIÑEʼ gaca fe stinu casi ti «escudu naroʼbaʼ» (biindaʼ Efesios 6:16). ¿Xiñee yaʼ? Purtiʼ cásica racané ti escudu naroʼbaʼ para cadi gacaná ti soldadu. Zacaca racané fe stinu para cadi guniná ca cosa malu ni nuu lu Guidxilayú riʼ laanu, casi inmoralidad, guendaridinde o intiica cosa ni qué riuulaʼdxiʼ Dios.

² Nabáninu «lu ca últimu dxi» ne ca guendanagana ni guidxaagalunu zusihuinni cani pabiáʼ naguidxi fe stinu (2 Tim. 3:1). Yanna, ¿ximodo zanda gánnanu pa naguidxi fe stinu casi ti escudu yaʼ? Ne ¿xi caquiiñeʼ gúninu para guinaaze dxíchinu ni? Guidúʼyanu ximodo guicábinu ca pregunta riʼ.

GUIDÚʼYANU XIMODO NUU ESCUDU STINU

3. ¿Xi biʼniʼ ca soldadu de dxiqué para cadi gaca feu escudu sticaʼ ne xiñee?

³ Ca escudu ni biquiiñecabe tiempu gucuá Biblia nápani forro de guidi. Ne gatigá rixubi ca soldadu que ni grasa para cadi gaca feu guidi stini ne para cadi guicá tini ra nápani guiibaʼ. Pa gudii ti soldadu cuenta maʼ cayaca feu escudu stiʼ la? nagueendaca runi chaahuini, zacá riuube listu para chebe lu guerra sti biaje. ¿Xiñee cuchaaganu fe stinu ti escudu yaʼ?

4. a) ¿Xiñee naquiiñeʼ guidúʼyanu ximodo nuu fe stinu? b) ¿Ximodo naquiiñeʼ gúninu ni?

⁴ Cásica biʼniʼ ca soldadu de dxiqué, laanu laaca gatigá naquiiñeʼ guidúʼyanu ximodo nuu fe stinu ni zeeda gaca casi ti escudu, ne pa caquiiñeʼ gúninu xiixa. Guirútiruʼ zanda gúnini pur laanu. Zacá ziuʼnu listu para gudxíʼlunu intiica cosa, purtiʼ laanu ca xpinni Cristu, cudxíʼlunu ca espíritu malu (Efes. 6:10-12). ¿Xi zanda gúninu para chuʼnu listu ti gudxíʼlunu ca guendanagana ni gueeda yaʼ? Primé, guinábanu Dios gacané laanu. Despué iquiiñenu Stiidxabe para gánnanu ximodo ruuyabe laanu (Heb. 4:12). Biblia ná: «Gupa confianza Jehová de guidubi ladxidoʼloʼ, ne cadi chinándaluʼ ni ná xpiaaniluʼ» (Prov. 3:5, 6). Né ni bizéʼtenu riʼ, guiníʼ íquenu ca últimu cosa ni bizaacanu ne xi bíninu. Guzéʼtenu ti ejemplu, ¿huayuu dxi guiaananu sin bueltu la? Ora bizaacanu ndiʼ, ¿ñee bietenaláʼdxinu promesa stiʼ Jehová ni zeeda lu Hebreos 13:5 la? Lu textu riʼ ná: «Qué zusaanaʼ lii ne qué ziaanadxieeʼ de gacaniaʼ lii». ¿Ñee bicaa ca diidxaʼ riʼ laanu gápanu confianza zacané Jehová laanu la? Pa zacá ni, naguidxi nuu fe stinu ni zeeda gaca casi ti escudu.

5. ¿Xi zándaca guizaaca ora guidúʼyanu ximodo nuu fe stinu?

⁵ Zándaca guidxagayaanu ora guidúʼyanu ximodo nuu fe stinu. Ne gudiʼnu cuenta nápanu xiixa debilidad ni qué gánnanu pa nápanu. Guzéʼtenu ti ejemplu, zándaca gudiʼnu cuenta riuu xhaatanu xizaa, rucaʼdiáganu ca cosa ni cadi dxandíʼ o raca desanimarnu ne pur laacani cará fe stinu. Pa zacá ni, ¿xi zanda gúninu para cadi guniná xhaataʼ ca guendanagana riʼ laanu yaʼ?

CHUʼNU CUIDADU NÉ CA COSA NI ZANDA GUSIRÁ FE STINU

6. ¿Xii nga caadxi cosa ni cadi malu chuʼnu xizaa pur laacaʼ?

⁶ Cadi malu nga chuʼnu xizaa pur xiixa cosa, casi ora riníʼ íquenu pa cayuulaʼdxiʼ Jehová ne Jesús ni cayúninu (1 Cor. 7:32). Pa bíninu ti pecadu nabé malu, ni jma racaláʼdxinu nga gaca xhamígunu Dios sti biaje (Sal. 38:18). Laaca cadi malu nga guyubi ti binni ni maʼ bichaganáʼ guni ni chuulaʼdxiʼ xheelaʼ ne guiranu riuʼnu xizaa chuʼ familia stinu ne ca hermanu stinu galán (1 Cor. 7:33; 2 Cor. 11:28).

7. a) ¿Xi zándaca guizaaca fe stinu pa chuʼ xhaatanu xizaa? b) Casi ná Proverbios 29:25, ¿xiñee cadi naquiiñeʼ guidxíbinu binni?

⁷ Peru pa chuʼ xhaatanu xizaa zándaca guirá fe stinu. Tobi de ca cosa ni zanda guiníʼ ique xhaatanu nga gápanu lari ni gácunu ne ni guidoʼno (Mat. 6:31, 32). Pa puru laacani guicá íquenu zándaca gucaacani laanu guyúbinu gápanu stale cosa dede gannaxhiinu bueltu, ne pur laani zará fe stinu ne zaxélenu de Jehová (Mar. 4:19; 1 Tim. 6:10). Laaca ziuʼnu xizaa pa guyúbinu gúninu ni chuulaʼdxiʼ xcaadxi. Peru pa gúninu ndiʼ, zusihuínninu jma ridxíbinu guni burla binni laanu o sanándacaʼ laanu lugar de guidxíbinu Dios. ¿Xi gúninu para cadi guizaacanu ndiʼ yaʼ? Guinábanu Jehová gacané laanu gápanu fe ne gácanu nadxibalú (biindaʼ Proverbios 29:25; Luc. 17:5).

8. ¿Xi gúninu pa guiníʼ ti binni xiixa cosa ni cadi dxandíʼ de Jehová ne de ca hermanu stinu yaʼ?

⁸ Binidxabaʼ nga «bixhoze guiráʼ ni rusiguii», riquiiñebe binni ni runi mandarbe para guiníʼ cosa ni cadi dxandíʼ de Jehová ne de ca hermanu stinu (Juan 8:44). Riquiiñeʼ ca apóstata sitiu ni nuu lu Internet, revista o televisión para guiniʼcaʼ cosa ni cadi dxandíʼ de Jehová ne xquidxi. Zeeda gaca ca guendarusiguii ca casi «flecha ni cá guí» ni culaa Binidxabaʼ luguianu (Efes. 6:16). ¿Xi gúninu pa málasi gabi tuuxa laanu xiixa cosa ni cadi dxandíʼ yaʼ? Qué zucaʼdiáganu laa. ¿Xiñee coʼ yaʼ? Purtiʼ nápanu fe Jehová ne runi crenu ca hermanu stinu. Nga runi, qué ruyúbinu guinínenu ca apóstata. Qué zuyúbinu tindediidxanenu laacabe ne qué zúninu ni para si gánnanu xi riníʼ íquecabe.

9. ¿Xi zándaca guizaaca pa gaca desanimarnu?

⁹ Laaca zanda guirá fe stinu pa gaca desanimarnu. Nuu biaje zanda cuee ca guendanagana gápanu gana laanu. Zuyúbinu modo guni chaahuinu ca guendanagana stinu. Peru ni cadi naquiiñeʼ gúninu nga guiníʼ íquenu puru si de laacani, purtiʼ zanda gusiáʼndanu guiráʼ ca cosa galán ni chigudii Jehová laanu (Apoc. 21:3, 4). Pa gaca desanimarnu zándaca gusirani stipa stinu dede gusaana de gúninu ni ná Jehová (Prov. 24:10). Peru cadi naquiiñeʼ gudiʼnu lugar guizaacanu ni.

10. ¿Xi rizíʼdinu de ca diidxaʼ ni bicaa ti hermana?

¹⁰ Guidúʼyanu xi runi ti hermana de Estados Unidos para cadi guirá fe stiʼ laga cayápabe xheelabe purtiʼ guizáʼ huará. Biseendabe ti carta ra central mundial stiʼ ca testigu stiʼ Jehová ne luni bicaabe ca diidxaʼ riʼ: «Pur ni cadídidu riʼ nuu biaje guizáʼ raca estresardu ne raca desanimardu, peru esperanza ni nápadu nabé racané ni laadu. Guizáʼ ridxagayaaʼ modo racané ca información ni ricaadu para iguidxi fe stidu ne riguucani gana laadu. Caquiiñepedu ca conseju riʼ. Racanécani laadu cadi guireʼdu gana ne guni huantardu ca prueba stiʼ Binidxabaʼ». Ca diidxaʼ ni bicaa hermana riʼ rusiidiʼ ni laanu zanda gudxíʼlunu desánimo. ¿Ximodo zanda gúninu ni yaʼ? Guidúʼyanu ca cosa ni rizaacanu casi ti prueba stiʼ Binidxabaʼ, gápanu confianza zaguixhedxí Jehová ladxidoʼno ne gusisácanu guiráʼ guendaró espiritual ni rudiibe laanu.

11. ¿Xi pregunta naquiiñeʼ guiníʼ íquenu para gánnanu pa naguidxi fe stinu?

¹¹ ¿Ñee caquiiñeʼ gaca fe stinu jma naguidxi cásica naguidxi ti escudu la? Guiníʼ íquenu ca ni bíninu lu ca últimu beeu gudiʼdiʼ ca: «¿Ñee qué ñuaaʼ xhaataʼ xizaa pur xiixa la?, ¿qué nucaadiaʼgaʼ ca apóstata ne qué nidindediidxaniaʼ laacaʼ la? ne ¿ñee randa rudxieeluaʼ desánimo la?». Pa zacá ni, naguidxi fe stinu. Peru naquiiñeʼ chuʼnu cuidadu purtiʼ riquiiñeʼ Binidxabaʼ xcaadxi cosa para gucaalú laanu. Guidúʼyanu xi laacani.

CHUʼNU CUIDADU NÉ MATERIALISMO

12. ¿Xi zanda guizaaca pa qué chuʼnu cuidadu né materialismo?

¹² Pa qué chuʼnu cuidadu zanda gusirá materialismo fe stinu. Apóstol Pablo guníʼ: «Pa racalaʼdxiʼ ti soldadu gusiecheʼ binni ni guluu laa de soldadu la? qué zuni sti dxiiñaʼ laga nuu de soldadu» (2 Tim 2:4). Ca soldadu romano de dxiqué qué zanda gápacaʼ negocio. ¿Xi guizaaca pa qué guzuubaʼ ca soldadu que diidxaʼ yaʼ?

13. ¿Xiñee qué zanda gapa ca soldadu de dxiqué negocio?

¹³ Guzéʼtenu ti ejemplu. Siadoʼroʼ cayuni practicar ti grupu de soldadu né espada sticaʼ, peru tobi de laacabe coʼ, purtiʼ ziguxheleʼ negocio ni napa ndaaniʼ guidxi, ra rutoo guendaró. Huadxí que, cayuuyaʼ ca soldadu que ximodo nuu armadura sticaʼ ne cutuxhucaʼ espada sticaʼ. Peru soldadu ni napa negocio que cayuni preparar guendaró ni chigutoo sti dxi. Peru sti dxi que, siadoʼroʼ málasi bicaalú ca enemigu stícabe laacabe. ¿Gunáʼ de ca soldadu riʼ zuni xhiiñaʼ jneza ne ziuulaʼdxiʼ comandante stiʼ ni runi yaʼ? Ne ¿gunáʼ de ca soldadu riʼ ñuuláʼdxinu ñuu gaxha de laanu ora maʼ cayaca guerra yaʼ? ¿Ñee ca soldadu ni guyuu listu para tinde la? o soldadu ni biʼniʼ tender negocio stiʼ?

14. ¿Xii nga ni jma risaca para ca soldadu stiʼ Cristu?

¹⁴ Casi ca soldadu ni biʼniʼ xhiiñaʼ jneza riʼ, laanu laaca jma ricá íquenu gusiéchenu ca xaíque stinu, Jehová ne Cristu. Jma risaca para laanu gusiéchenu laacabe que guicaanu guiráʼ ca cosa ni rudii guidxilayú stiʼ Binidxabaʼ laanu. Ruyúbinu gápanu tiempu ne stipa ni caquiiñenu para gúninu ni ná Jehová ti cadi guirá fe stinu ne cadi gaca feu armadura stinu.

15. ¿Xi guníʼ Pablo cadi naquiiñeʼ gúninu, ne xiñee?

¹⁵ ¿Xiñee caquiiñeʼ gatananu yaʼ? Apóstol Pablo guníʼ: «Ca ni ricá ique gaca ricu la? [...] maʼ bixélecaʼ de fe sticaʼ» (1 Tim. 6:9, 10). Diidxaʼ «maʼ bixélecaʼ» cayabi ni laanu zanda guixélenu de Jehová pa guyúbinu gápanu cosa ni cadi caquiiñenu. Purtiʼ pa gúninu ni la? zándaca guiale «stale deseu malu ni runiná» laanu ndaaniʼ ladxidoʼno. Nga runi, cadi gudiʼnu lugar guiale ca deseu ca ndaaniʼ ladxidoʼno. Caquiiñeʼ guidúʼyanu ca deseu ca casi tobi de ca cosa ni riquiiñeʼ Binidxabaʼ para gusirá fe stinu.

16. Despué de guidúʼndanu relatu ni zeeda lu Marcos 10:17-22, ¿xi pregunta caquiiñeʼ guiníʼ íquenu?

¹⁶ Guxuíʼlunu nápanu bueltu para sinu stale cosa material. ¿Ñee cucheʼnu pa sinu cosa ni riuuláʼdxinu neca cadi caquiiñenu ni la? Coʼ. Peru guiníʼ íquenu ca pregunta riʼ: Neca zanda sinu xiixa, ¿ñee nápanu tiempu ne stipa para iquiiñenu ni ne gápanu ni la? ¿Ñee zándaca gannaxhii xhaatanu ca cosa ni nápanu la? ¿Ñee zúninu casi biʼniʼ xa joven ni qué nicaa invitación stiʼ Jesús de guni jma lu xhiiñaʼ Dios la? (Biindaʼ Marcos 10:17-22). Jma galán guibáninu né ni caquiiñesinu ne iquiiñenu tiempu ne stipa stinu para gúninu ni ná Jehová.

GUINAAZE DXÍCHINU ESCUDU STINU, LAANI NGA FE STINU

17. ¿Xi cadi naquiiñeʼ guiaandaʼ laanu?

¹⁷ Cadi guiaandaʼ laanu nuunu lu ti guerra ne caquiiñeʼ chuʼnu listu para tíndenu luni guiráʼ dxi (Apoc. 12:17). Qué zanda guaaʼ ca hermanu escudu stinu. Laanu nga caquiiñeʼ guinaaze dxíchinu ni.

18. ¿Xiñee gunaaze dxichi ca soldadu de dxiqué escudu sticaʼ?

¹⁸ Dxiqué la? rusisaca binni ca soldadu nadxibalú ni rié lu guerra. Peru nabé feu nga guibiguetaʼ ti soldadu sin escudu stiʼ. Ti historiador lá Tácito guníʼ: «Ora guniti ti soldadu escudu stiʼ la? nabé feu ni para laa». Nga nga tobi de ca razón ni nuu para guinaaze dxichi ca soldadu que escudu sticaʼ.

19. ¿Xi caquiiñeʼ gúninu para guinaaze dxíchinu escudu stinu?

¹⁹ Para guinaaze dxíchinu escudu stinu la? caquiiñeʼ chuunu guiráʼ reunión ne guinínenu binni de Jehová ne Reinu stiʼ (Heb. 10:23-25). Laaca caquiiñeʼ gúʼndanu Biblia ne guinábanu Jehová lu oración gacané laanu gúninu ni cusiidibe laanu ne chinándanu ca conseju stiʼ lu guiráʼ ni gúninu (2 Tim. 3:16, 17). Pa gúninu ni, intiica cosa gulaa Binidxabaʼ luguianu qué zuniná peʼ ni laanu (Is. 54:17). Fe stinu, ni zeeda gaca casi ti escudu zápani laanu. Zúninu ni ná Jehová tobi si né ca hermanu stinu. Ne qué zuni ganársinu ora gudxíʼlunu Binidxabaʼ, sínuque laaca ziuʼnu gaxha de Jesús ora gunitilube Binidxabaʼ ne ca xpinni (Apoc. 17:14; 20:10).