Scuela ra Riziidicabe Gúnicabe Xhiiñaʼ Dios: ti puertaʼ ni zuxale ndaga para aca jma dxiiñaʼ
1 Jiobá biquiiñebe Jeremiás para guiniʼbe: «Dxandipeʼ zandisaʼ pastor ni dxandipeʼ zapa [ca dendxuʼ stinneʼ] ne laacame maʼ qué zadxíbicame, nin la zacadíticame de dxiibi, ne qué ziaadxaʼ nin tobi» (Jer. 23:4). Ca dxi riʼ la? gayuaa binnigola ni nuu lade ca binni ridagulisaa ca, cayúnicabe dxiiñaʼ riʼ lade binni de iráʼ guidxi. Laaca nuu stálepeʼ hombrehuiiniʼ ni zeeda ácacaʼ casi gupa (gopa) ni riaana lu bandaga, ne de idubi ladxidoʼcaʼ cayúnicaʼ xhiiñaʼ Jiobá (Sal. 110:3). ¡Ti ndaayaʼ roʼ nga ca bíchinu nachaʼhuiʼ riʼ lade ca binni ridagulisaa stiʼ xquidxi Dios! Cumu cadóparuʼ binni guni xhiiñaʼ Dios la? caquiiñeruʼ hombre ni zanda gúnini ne ni náʼ acané ca biʼchiʼ.
2 Tobi de cani jma cayacané ca binnigola ne ca sierbu ministerial ni caʼruʼ ichaganáʼ nga Scuela ra Riziidicabe Gúnicabe Xhiiñaʼ Dios, ti gápacabe jma dxiiñaʼ ne gúnicabe jneza. Lu ca 999 clase ni maʼ uca dede 1987 la? jma de 22.000 de ca bíchinu de 140 guidxi ni guyé scuela riʼ maʼ biziidicabe gúnicabe xhiiñacabe jneza. Para laacabe scuela riʼ zeeda aca ni casi ti puertaʼ ni zuxaleʼ ndaga para aca jma dxiiñaʼ (1 Cor. 16:9).
3 Xi pur nuu scuela riʼ. Laani nuu ni para usiidichaahuiʼ ni ca hombre ca para gúnicaʼ iráʼ clase dxiiñaʼ ra iquiiñeʼ xquidxi Jiobá laacaʼ. Scuela ca rusiidiʼ ni laacabe modo gusanírucabe guendarucheche diidxaʼ, modo gápacabe ca dendxuʼ ca ne gusiidicabe lade ca binni ridagulisaa. Ora maʼ bilúxecabe scuela riʼ la? nuu de laacabe rie xquidxi o sti guidxi roʼ casi precursor especial o casi binnigola ni riganna binni ridagulisaa. Xcaadxi la? ruseendacabe laacaʼ ra maca ridagulisaacaʼ o stiʼ lugar ra nanna Betel jma zaquiiñecabe.
4 Lu xhono semana stiʼ scuela riʼ, cani caziidiʼ ca rúʼndacabe ne riénecabe Biblia biaʼ gándatiʼ. Riziidicabe stale modo gápacabe ca dendxuʼ stiʼ Dios, modo gudxiilúcabe ca guendanagana ni rapa ca xpinni Cristu ne guiénecabe cani rusiidiʼ Biblia. Laaca riziidicabe ni na Biblia de ximodo raca dxiiñaʼ ne tuu nga cani ruuyaʼ aca ni, ne modo guni jusgárcabe jneza. Riziidiʼ chaahuicabe ximodo gudiicabe libana ne riuu tu racané laacabe ti ganda iniisicabe jma lu stiidxaʼ Dios.
5 Ni rinábacabe. Casi nánnanu la? naquiiñeʼ gúnicabe xiixa para chécabe scuela riʼ. Cani canabaʼ cheʼ ca naquiiñeʼ ácabe tobi ni maca naca binnigola o sierbu ministerial biaʼ chupa iza. Ácacabe solteru ne gápacabe biaʼ 23 o 50 iza. Naquiiñeʼ gánnacabe gúʼndacabe, gucaacabe ne guiníʼ chaahuicabe diidxaʼ chigaca scuela riʼ, ne chúʼcabe nazaaca ne cadi gápacabe ti dieta chinándacabe. Jma zúnicabe pur cani naca precursor regular.
6 Cani inabaʼ cheʼ ca la? naquiiñeʼ inácabe chigacanécabe ra jma caquiiñeʼ. Ndiʼ rinábani guiníʼ íquecabe casi Isaías, ni gunabaʼ ne stale gana guni ti dxiiñaʼ risaca, guniʼbe sicaríʼ: «¡Raríʼ nuaʼ! Biseendaʼ naa» (Isa. 6: 8). Laabe qué nuguube naróʼ stibe lu guidubi xquendanabánibe. Tu racalaʼdxiʼ cheʼ Scuela ra Riziidicabe Gúnicabe Xhiiñaʼ Dios riʼ la? naquiiñeʼ gúnicabe ni pur guendarannaxhii ni nápacabe ca bíʼchicabe ne ca bizáʼnacabe ne acaláʼdxicabe acanécabe laacaʼ, ne cadi para uguucabe naróʼ stícabe o pur ugaandasícabe xiixa guenda ni risaca. Ilúxesicabe scuela ca la? naquiiñeʼ gúnicabe guiráʼ ni maʼ biziidicabe ti acanécabe xtuudxi (Luc. 12:48).
7 Ni ribeendúcabe. Lu ca xhono semana ra rápacabe stale ni gúʼndacabe la? «[r]idxá ladxidóʼ [cabe] de stiidxa Dios ni runi cre nu [ne de] ca diidxa galán» ca (1 Tim. 4:6). Zacá riziidicabe acanécabe ne uguucabe gana ca binni ridagulisaanécabe ratiica chécabe. Stale de ca lugar ra maʼ biseendacabe cani maʼ binduuxeʼ scuela riʼ la? maʼ bidale cani rucheeche diidxaʼ, ne rucaacabe cani nahuiiniʼ ácacaʼ precursor, peru jma nga cayacanécabe guiráʼ cani nacubi cayuu lade Xquidxi Dios.
8 Pa nacu binnigola lade ca binni ridagulisaa o sierbu ministerial ne solteru de biaʼ 23 o 50 iza, xiñee qué guʼyuʼ pa zanda cheluʼ Scuela ra Riziidicabe Gúnicabe Xhiiñaʼ Dios riʼ yaʼ. Ne pa nahuiiniʼluʼ ne caguixhe íqueluʼ ugaandaluʼ xiixa guenda lu xhiiñaʼ Jiobá la? xiñee qué ibániluʼ sin stale luju ne sin xiixa ni ni cuee xtiémpuluʼ ti ganda chuʼluʼ puertaʼ ni zuxale ndaga para aca jma dxiiñaʼ riʼ yaʼ. Zudii ni lii guendanayecheʼ ne ziuláʼdxiluʼ ni. Scuela ra Riziidicabe Gúnicabe Xhiiñaʼ Dios riʼ la? maʼ bisihuinni ni de que cayacaneni cadi cani runduuxe si luni, sínuque laaca cayacaneni ca neza binni ridagulisaa stiʼ xquidxi Dios ni nuu guiráʼ guidxi.
[Box on page 3]
Ximodo ucané scuela ca laacabe iziidicabe jma yaʼ
«Cani biziideʼ riʼ dxandipeʼ ucané cani naa gannaʼ gucheecheʼ diidxaʼ ne gannaʼ gapa ca dendxuʼ stiʼ Dios ne guendananna stálepeʼ ora iquiiñeʼ Biblia.»
«Scuela riʼ ucané naa guneʼ intiica dxiiñaʼ lade ca binni ridagulisaa ca sin idxibeʼ.»
«Maʼ bichaani xquendanabaneʼ, zaqueca modo guieneʼ modo runi gobernar Reinu stiʼ Dios ne xquidxi.»
«Guiráʼ ni biziideʼ riʼ la? ucané cani naa udiéʼ cuenta pabiáʼ nga risaca chiguneʼ dxiiñaʼ ra jma caquiiñeʼ.»