Usaananenu binni ca revista ca ora chigucheechenu diidxaʼ
1, 2. Ximodo huachaa ca revista La Atalaya ne ¡Despertad! modo nabani binni.
1 «Galán cani, biáʼsipeʼ ora reeda cani ne riguu cani gana.» «Qué huayuu dxi guundaʼ ca revista ni jma riguu gana riʼ.» Ca diidxaʼ riʼ rusihuínnicaʼ ximodo riníʼ ique stale binni ni ruundaʼ ca revista La Atalaya ne ¡Despertad! lu idubi naca Guidxilayú. Ni dxandíʼ nga ca revista stinu hualuíʼ cani modo riquiiñeʼ cani para chinenu ca diidxaʼ nacubi ne galán ca ra nuu «irá binni» (1 Tim. 2: 3, 4).
2 Ti hombre ni runi dxiiñaʼ de negocio bianané ti revista ¡Despertad! purtiʼ biuláʼdxibe xidé caniʼni. De raqué biindabe lu La Atalaya, sti revista ni neni, ti tema ni bicaa laabe uníʼ íquebe de Trinidad, ni huayuni crebe maʼ xadxí. Ngue bicaa laabe chuláʼdxibe iziidibe jma ne udiʼdiʼ si xhoopaʼ beeu uyuunísabe. Sti hombre ricaa ca revista riʼ gatigá, peru qué ruundadibe cani. Yanna xheelabe la? qué riulaʼdxiʼ ucaadiaga ca Testigu, peru ruundaʼ ca revista ni ricaabe. Ora biʼndaʼ gunaa riʼ ni maʼ bizabiruaa Dios ni cá lu Biblia de ti paraísu ra zabani binni nachaʼhuiʼ la? yendani ndaaniʼ ladxidoʼbe. Qué nindaa diʼ, laabe, ti xiiñiʼ gaanabe ne ti béndabe laaca beeda ácacaʼ Testigu stiʼ Jiobá.
3. Xiñee galán nga usaananu iropaʼ revista ca.
3 Usaananu iropaʼ revista ca. Casi rusihuinni ca ejemplu ni maʼ uninu ca, qué zanda diʼ gánnanu tu laa zuundaʼ ca revista stinu ne qué gánnadinu xi zeeda lú cani ni ucaa laacabe chuláʼdxicabe iziidicabe jma (Ecl. 11:6). Nga runi, nécapeʼ ininu de ti revista si ora inínenu binni la? galán nga usaananenu binni iropaʼ cani. Ne nuu biaje la? zanda usaananenu tuuxa chupa chonna revista de gadxé gadxé fecha.
4. Ximodo ñanda niguixhe chaahuinu ca dxi rireʼnu lu guidxi para usaananenu binni revista.
4 Galán nga cueenu ti dxi lu ti semana para usaananu ca revista ca. Lu Calendario de los Testigos de Jehová 2005 cá iráʼ sábadu casi «Dxi para usaananu revista» (Día de revistas). Dxandíʼ, cumu cadi iráʼ lugar zanda ácani ne nuu tiru laanu qué zanda gúninu ni la? zándaca caadxi de cani rucheeche diidxaʼ uyúbicaʼ sti dxi para laani. Yanna, ñee laaca naguíxheluʼ chineluʼ ca revista ca ora maʼ chigucheecheluʼ diidxaʼ iráʼ semana la?
5. Paraa iráʼ ndiʼ cadi naquiiñeʼ diʼ tiidisinu sin usaananu ca revista ca ne xi zacané laanu gúninu ni.
5 Udixhe xi guʼnuʼ. Pa quíxhenu panda revista usaananu lu ti beeu la? zacaneni laanu gúninu dxiiñaʼ ca jma jneza. Ñee nápaluʼ ti lista stiʼ cani chisaanuʼ revista ra nuu la? Ñee rusaananeluʼ cani binni ora maʼ ziucheecheluʼ diidxaʼ la? Ñanda nusaanaluʼ cani ora maʼ ziucheecheluʼ diidxaʼ ndaaniʼ calle, ra nuu ca tienda ca o ra nabé rié stale binni la? Ñee rineluʼ cani ora maʼ zeluʼ de viaje, ora maʼ zeluʼ luguiaa o pacaa ora maʼ ziguuyuʼ tuuxa la? Ora tiica si bisaanané binni ca revista La Atalaya ne ¡Despetad! ti acaneluʼ laacabe cueendúcabe stale ni galán lu cani.
6. Ximodo ndiʼ zanda iquiiñenu ca revista ni huaxiéʼ nacubi ca yaʼ.
6 Laaca zanda quixhe íquenu chinenu ca revista ni huaxiéʼ nacubi ni nápanu. Nécapeʼ maʼ napa ti beeu o chupa beeu de biree cani la? risácaruʼ iráʼ ni cá lú cani. Bisaanané cani binni ni riulaʼdxiʼ iziidiʼ. Para stale binni ca revista La Atalaya ne ¡Despetad! ca zeeda aca cani «ti diidxaʼ [...] ora caquiiñeʼ» (Pro. 25:11). Iquiiñenu ca revista ca ti ganda gunibiáʼ jma binni Jiobá ne gúnicaʼ ni nabe.