Quixhe chaahuinu tiempu stiʼ binnilídxinu para chuunu irá ca endaridagulisaa ca
1 Iráʼ ca xpinni Cristu ni napa xiiñiʼ la? riuláʼdxicabe gannaxhii xiiñicabe Jiobá ne gúnicaʼ ni nabe, ti ganda ibánicaʼ sin qué chuʼ dxi gáticaʼ ndaaniʼ Guidxilayú ni maʼ bizabiruaa Dios. Ximodo zanda usiiditu laacabe quixhe íquecabe guni adorárcabe Jiobá primé lu endanabani stícabe yaʼ. Naquiiñeʼ gúnitu ni laatu primeru (Pro. 20:7). Ti baʼdudxaapaʼ ni rietenalaʼdxiʼ ni biʼniʼ jñaa pur laa uníʼ sicaríʼ: «Qué ñuu dxi ninabadiidxadu pa ziuudu endaridagulisaa». Ni biʼniʼ jñaabe pur laabe que qué ñuu dxi nusiaandabe ni.
2 Ñee riene ca binnilídxiluʼ xi pur nga raca ca endaridagulisaa ca la? Iráʼ cani rizíʼdinu racá rudii cani stipa laanu ti gúninu ni na Jiobá ne ra idxaaganu ca bíchinu ne ca bizánanu nabé riguu nga gana laanu (Isa. 54:13; Rom. 1:11, 12). Peru nápanu ti razón jma naroʼbaʼ pur riuunu ca endaridagulisaa ca, para usisácanu Jiobá «lade stale binni dagulisaa» (Sal. 26:12). Ca endaridagulisaa ca racané cani laanu uluinu pabiáʼ nadxiinu Jiobá ne guni adorarnu laabe.
3 Guʼyaʼ chaahuinu modo canazanu. Pa gúʼyanu ca endaridagulisaa ca casi ti modo para guni adorarnu Dios la? nga zacané laanu ti cadi guiaʼnu guiáʼdxanu ca endaridagulisaa ca pur intiisi cosa (Efe. 515, 16; Heb. 10:24, 25). Ora quixhe chaahuitu tiempu stiʼ binnilídxitu la? laucaa primé ca iráʼ endaridagulisaa rápanu ne cadi udiitu lugar ucueeza sti cosa laatu de chetu cani. Laguuyaʼ chaahuiʼ, naquiiñeʼ icá ique ca binnilídxinu ca endaridagulisaa ca primeru.
4 Ñee qué riéchenu nga ora idúʼndanu ximodo rudxiilú ca bíchinu ne ca bizánanu stale endanagana para checaʼ iráʼ endaridagulisaa ne ca endaridagulisaa roʼ ca la? Zándaca cadi tan nagana diʼ raca ni para lii, peru laaca rudxiiluluʼ xiixa endanagana. Binidxabaʼ qué rusaana de uyubi ximodo aca nagana para laanu gúninu ni na Jiobá. Peru neca zacá, cadi guiaandaʼ ndiʼ laatu, qué ziuu dxi gusiaanda ca xiiñitu stipa rúnitu pur chinetu laacabe iráʼ ca endaridagulisaa ca. Ne pa qué usaana de gúnitu ni la? zusiiditu laacabe ni na Dios, ne qué ziuu dxi guiaandaʼ nga laacabe.