Ni rusiidiʼ Jiobá rudiini laanu endanabani
1 ¡Izáʼ galán nga riuʼnu ora rúʼyanu ca binni ca nuucaʼ nayecheʼ ora maʼ riénecaʼ Stiidxaʼ Dios! Nabé nayecheʼ nga riuʼnu ora acanenu xcaadxi binni gunibiáʼ Dios ne cani naguixhe íquebe gúnibe para binni guidxilayú, purtiʼ ni iziidicabe de Dios riʼ zanda acaneni laacabe icaacabe endanabani ni qué ziuu dxi iluxe (Juan 17:3).
2 Xiñee jma risaca ni rusiidiʼ Dios. Ndaaniʼ guidxilayú ni nabézanu riʼ binni zanda iziidiʼ intiisi acalaʼdxiʼ ne nuu stale modo iziidicabe cani (Ecl. 12:12). Neca zacá la? iráʼ ni riziidiʼ binni guidxilayú qué zanda diʼ uchaaganuni ne «irá enda nandxóʼ ni [maʼ] biʼni Dios» (Hech. 2:11). Ñee huayacané ni riziidiʼ binni ndaaniʼ guidxilayú riʼ idxiña Dios ne ganna xi naguixhe íquebe gúnibe la? Ñee huayacaneni binni guiene xi raca binni ora maʼ guti ne xiñee nuu stale yuubaʼ lu guidxilayú riʼ la? Huasiidiʼ ni binni ziuu dxi zaca chaahuiʼ ca cosa ni cazaaca yanna riʼ la? Huayacaneni binni ibaniné binnilidxi nayecheʼ la? Coʼ. Dios si nga zanda usiene laanu cani rinabadiidxanu lu xquendanabáninu.
3 Ni rusiidiʼ Dios riʼ rudiini laanu stale cosa ni qué gapa binni lu guidxilayú riʼ, nga nga ibáninu jneza nezalú Dios. Ca binni ni runi cré Stiidxaʼ Dios ne rúnicaʼ ni na ni la? maʼ qué raca nanaláʼdxicaʼ binni de sti raza, de sti tribu ne maʼ qué rannaxhii xhaatacaʼ xquídxicaʼ, purtiʼ maʼ uleecabe cani ndaaniʼ ladxidóʼcabe (Heb. 4:12). Biblia ca huayacaneni stale binni usaana iráʼ clase de endaridinde ne uchaacaʼ modo laacaʼ (Col. 3:9-11; Miq. 4:1-3). Ne ndiʼ nga ni jma galán, cani rusiidiʼ Dios riʼ huayacaneni millón de binni usaanacaʼ ca viciu ni maʼ xadxí nápacaʼ ne usaanacaʼ stale cosa ni qué riuulaʼdxiʼ Dios (1 Cor. 6:9-11).
4 Xiñee naquiiñeʼ ácani nagueendaca. Jiobá, ni jma nanna usiidiʼ, caguixhená laanu de ca dxi nabáninu. Cani maʼ uniʼbe chigúnibe culuíʼ cani laanu stale cosa ni caquiiñeʼ ganna iráʼ binni guidxilayú (Apo. 14:6, 7). Nánnanu Cristu maʼ cayuni mandar ibáʼ, iráʼ ca religión ni qué rusiidiʼ ni dxandíʼ ca zanitilú cani ne Reinu stiʼ Dios chigunitilú ca gobiernu ni nuu lu guidxilayú riʼ (Dan. 2:44; Apo. 11:15; 17:16). Nga runi, nagueendaca riquiiñeʼ gunibiáʼ iráʼ xixé binni Rey ni maʼ bicuí Dios para guni mandar, naquiiñeʼ ireecabe de Babilonia Guidxi Roʼ ne iniʼnécabe Jiobá ne fe, ra iquiiñecabe labe (Sal. 2:11, 12; Rom. 10:13; Apo. 18:4). Ñee cadi dxandíʼ iranu riuuláʼdxinu gúninu stipa pur gúninu jma lu dxiiñaʼ ni rudii endanabani riʼ la?