Usíʼdinu cani nachaʼhuiʼ sacaʼ lu neza stiʼ Dios
1. Xi iráʼ naquiiñeʼ gúniluʼ para acaneluʼ stobi acaʼ xpinni Cristu.
1 Lu primé siglu que bieeteʼ uyuu ca discípulo que lu «Neza» stiʼ Jesús (Hech. 9:2, NM). Ya, religión ni dxandíʼ zinanda Cristu ca rusiidiʼ ni binni xi neza ndiʼ naquiiñeʼ checaʼ (Pro. 3:5, 6). Nga runi, ora usíʼdinu binni de Stiidxaʼ Dios, naquiiñeʼ usiene chaahuinu laacabe xii nga na Biblia. Ne laaca naquiiñeʼ acanenu laacabe sácabe lu neza stiʼ Jiobá (Sal. 25:8, 9).
2. Xi zucaa binni ni cayúʼndanenu Biblia ca guni ni na ca ley udixhe Dios yaʼ.
2 Acanenu cani cayúʼndanenu Biblia gannaxhiicaʼ Jiobá ne Jesús. Laanu cumu nácanu binni ruchee la? raca nagana para laanu iníʼ íquenu, ininu ne chinándanu modo udixhe Dios gúninu (Rom. 7:21-23; Efe. 4:22-24). Peru neca nagana ni, cumu nadxiinu Dios ne Xiiñibe la? nga rucaa laanu gúninu ni nabe (Juan 14:15; 1 Juan 5:3). Ximodo acanenu cani cayúʼndanenu Biblia gápacaʼ endarannaxhii ca yaʼ.
3. Ximodo zanda acanenu cani cayúʼndanenu Biblia ca gannaxhiicaʼ Jiobá ne Jesús jma.
3 Ucané cani cayuundaneluʼ gánnacaʼ ximodo nga Jiobá. Sicaríʼ bisiene ti bíchinu: «Cani cayúʼndanenu Biblia ca qué zanda diʼ gannaxhiicabe tuuxa ni qué runibiáʼcabe, nga runi ora uzuluáʼ guundaniaʼ binni la? ruluecaʼ laacabe lá Dios ndaaniʼ Biblia ne nabé ruyubeʼ modo gunibiáʼcabe ca guenda stiʼ Jiobá». Ininu jma de ca guenda stiʼ Jiobá ne ejemplu stiʼ Jesús nga ti modo jma galán gúninu para acanenu laacabe gannaxhiicabe Jiobá ne Jesús (Juan 1:14; 14:9). Sti cosa ni nápanu para ganda acanenu cani cayúʼndanenu ca iníʼ íquecaʼ de ca guenda sicarú ni napa Dios ne Xiiñibe nga, guietenaláʼdxinu cani zeeda lu cuadru ra maʼ ziluxe cada capítulo stiʼ libru Xipeʼ ndiʼ cusiidiʼ Biblia.
4. 1) Xiñee raca nagana para cani cayúʼndanenu ucheechecaʼ diidxaʼ. 2) Ximodo zanda acanenu cani cayúʼndanenu ca ora uzulucaʼ ucheechecaʼ diidxaʼ.
4 Usíʼdinu ne ejemplu stinu. Laanu rusíʼdinu cani cayúʼndanenu Biblia gánnacaʼ unáʼ nga neza stiʼ Dios ne racanenu laacabe sácabe luni ra gúʼyacabe modo nabáninu (1 Cor. 11:1). Cumu stale de laacabe caʼruʼ guiaacabe iniʼnécabe tuuxa binni de ni caziidicabe la? nga runi riquiiñeʼ ininu ne diidxaʼ nadóʼ ne uyúbinu ximodo gúninu para ganda usíʼdinu laacabe gannaxhiicabe, guni crécabe ne cadi idxíbicabe ucheechecabe diidxaʼ ne acanécabe stobi aca xpinni Cristu (2 Cor. 4:13; 1 Tes. 2:2). Cumu riuuláʼdxinu acanenu cani cayúʼndanenu Biblia la? nga zucaa laanu chinenu laacabe ora maʼ uzulú ucheechecabe diidxaʼ.
5. Ximodo racané ejemplu stinu cani cayúʼndanenu ti guiénecaʼ xi iráʼ ndiʼ naquiiñeʼ gúnicaʼ para ganda chinándacaʼ ley stiʼ Dios.
5 Ra guʼyaʼ cani cayúʼndanenu ca modo nabáninu la? zacaneni laacabe gánnacabe xiruʼ naquiiñeʼ gúnicabe ti ibánicabe casi ti xpinni Cristu. Casi ora chigánnanu tuuxa binni huará ne ora ugapadiúxinu ca bíchinu ne ca bizánanu ne endanayecheʼ ora idagulisaanu la? zuuyacabe endarannaxhii stinu (Juan 15:12). Ora acanenu guiá ndaaniʼ Yoo stiʼ Reinu ne ora gúninu xiixa para acanenu tuuxa, laaca riziidicabe acanécabe binni (Juan 13:12-15). Ne ora gúʼyacabe qué ricapeʼ íquenu gápanu stale cosa risaca la? ziénecabe xii nga riníʼ ca diidxaʼ uyúbicabe Reinu stiʼ Dios primeru (Mat. 6:33).
6. Xi endanayecheʼ ndiʼ zápanu pa acanenu xcaadxi binni gúnicaʼ ni na Jiobá.
6 Riquiiñeʼ stale stipa nga para ganda usíʼdinu binni de Stiidxaʼ Dios ne acanenu tuuxa aca xpinni Cristu. Peru laaca riéchenu stale nga ora gúʼyanu cani nadóʼ ca «zinanda ca [...] ni dxandíʼ» (3 Juan 4).