Ñee rinabadiidxaluʼ ni cayuundaneluʼ Biblia ca pa runibiaʼbe sti binni ni riuulaʼdxiʼ iziidiʼ la?
Pa cayuundaneluʼ ti binni Biblia, xiñee qué inabadiidxaluʼ laabe pa tuuxa xhamígube, binnilídxibe o tuuxa ni runibiaʼbe riuulaʼdxiʼ iziidiʼ de Biblia yaʼ. Zándaca gábibe lii lá chupa chonna. Ne zanda chigánnaluʼ ca binni riʼ para gaʼbuʼ laacabe pa ziguundaneluʼ laacabe, ne gábiluʼ laacabe ti binni ni cayuundaneluʼ Biblia nga biseendaʼ lii ra nuucabe, pa ni cayuundaneluʼ ca gabi lii zaa iniʼluʼ laa biseendaʼ lii. Zanda uzulú iniʼluʼ sicaríʼ: Cayuundaniaʼ «[uníʼ tu láʼ ni cayuundaneluʼ] Biblia ne uníʼ íquebe lii ñándaca ñuuláʼdxiluʼ niziidiluʼ de laani casi modo rúnidu ni sin quíxetu». De racá la? zanda usiéneluʼ laabe ximodo rúʼndanenu binni Biblia ne libru Xipeʼ ndiʼ cusiidiʼ Biblia.
Pa tobi de cani cayuundanenu Biblia rihuinni caziidiʼ nagueenda la? xiñee qué gábinu laabe usiénebe ca xhamígube o ca binnilídxibe ni ñuulaʼdxiʼ niziidiʼ ximodo nga rúʼndanenu binni Biblia yaʼ. Ne zanda guni invitarbe laacaʼ chuʼcaʼ ora maʼ cayuundanenu laabe. Pa gúʼyatu cadi jneza gúnitu ni zacá la? zándaca guiaananebe binni ca ti dxi para usiénenu ni laabe. Zacá la? zanda acanenu ni cusíʼdinu ca uzulú usiidiʼ xcaadxi binni de lu Biblia.
Ca binni ni nabé rigánnaluʼ, neca caʼruʼ uzulú gúʼndaneluʼ laacabe Biblia, laaca zanda udiicabe lii lá xcaadxi binni. Ora usaananeluʼ laacabe libru Xipeʼ ndiʼ cusiidiʼ Biblia, zanda inabadiidxaluʼ laacabe: «Ñee runibiaʼluʼ tuuxa ni ñuulaʼdxiʼ ñapa libru riʼ la?»
Cumu mayaca idxiña dxi initilú ca cosa malu nuu yanna riʼ la? nápanu gana uyúbinu iráʼ modo ganda acanenu binni para ucaadiágacaʼ ca diidxaʼ nacubi ne galán riʼ. Lii yaʼ, ñee rinabadiidxaluʼ ni cayuundaneluʼ Biblia pa runibiaʼbe sti binni ni riuulaʼdxiʼ iziidiʼ la?