Ti ejemplu ni zanda chinanda binni nahuiiniʼ ne ni huaniisi

Uyuu tobi hombre dxiqué nabé uyuuláʼdxibe chuʼbe gaxha de Jiobá ne biaʼ dxi bibánibe bíʼnibe ni na. Laabe uzanebe «Dios ni dxandíʼ», ngue runi ucuaabe ndaayaʼ stiʼ Dios. Hombre ca nga Noé, ne ejemplu stibe zanda chinanda binni nahuiiniʼ ne ni huaniisi (Gén. 6:9). Videu ni láʼ Noé guzané Dios zacaneni laanu idúʼyanu ximodo bibani Noé dxiqué, xi bíʼnibe para gunda ucuaabe ndaayaʼ stiʼ Jiobá ne ximodo zanda ácanu casi laabe.

Ora maʼ biiyatu videu ca la? laguuyaʼ pa zanda icábitu ca endarinabadiidxaʼ ni zeeda lu DVD (gastiʼ diʼ ni lu diidxazá stiʼ istmo): 1) Xi cosa malu nga biʼniʼ caadxi ángel, ne tuu nga uca ca nefilim (Gén. 6:1, 2, 4). 2) Xiñee nabé malu uca ca binni que ne ximodo biiyaʼ Dios modo bibánicabe (Gén. 6:4-6). 3) Ximodo nga uca Noé gadxé de stuudxi binni que (Gén. 6:22). 4) Ximodo binitilú ca binni malu que (Gén. 6:17). 5) Pabiáʼ naroʼbaʼ arca que (Gén. 6:15). 6) Xiruʼ biʼniʼ Noé, ne ximodo bicabi ca binni que laabe (Mat. 24:38, 39; 2 Ped. 2:5). 7) Panda de cada maniʼ uyuu ndaaniʼ arca que (Gén. 7:2, 3, 8, 9). 8) Pabiáʼ dxi biaba nisaguié roʼ que, ne pabiáʼ dxi bilaahua Guidxilayú riʼ (Gén. 7:11, 12; 8:3, 4). 9) Xiñee bilá Noé ne binnilidxi (Gén. 6:18, 22; 7:5). 10) Paraa bireecá arca que (Gén. 8:4). 11) Ximodo gunna Noé pora ndiʼ maʼ zanda guireecaʼ ndaaniʼ arca que (Gén. 8:6-12). 12) Xi biʼniʼ Noé cásipeʼ biree de ndaaniʼ arca que (Gén. 8:20-22). 13) Xi riníʼ arcu iris que (Gén. 9:8-16). 14) Xii nga riníʼ sánenu Dios (Gén. 6:9, 22; 7:5). 15) Xi naquiiñeʼ gúninu ti idúʼyanu Noé ndaaniʼ Paraísu (Mat. 28:19, 20; 1 Ped. 2:21).

Ximodo zanda acané historia stiʼ Noé laanu sánenu Dios, ne guni crenu zulabe ca xpínnibe yanna riʼ ne poder ni nápabe cásica bilabe Noé yaʼ (Gén. 7:1; Pro. 10:16; Heb. 11:7; 2 Ped. 2:9).