Ti videu ni naquiiñeʼ gucaa laanu guiníʼ íquenu
«Videu riʼ dxandipeʼ nga rucaani binni guiníʼ ique.»
«¡Yendani dede ndaaniʼ ladxiduáʼ!»
«¡Guizáʼ biecheʼ ora biiyaʼ ni!»
1 Primé biiyaluʼ videu Los jóvenes preguntan...¿Cómo conseguir amigos verdaderos? (Cani rinabadiidxaʼ cani nahuiiniʼ... Ximodo guidxélanu cani dxandíʼ xhamígunu), ñee zacaca biʼniʼ sentirluʼ la? Raca chupa chonna iza, ti bíʼchinu ni nahuiiniʼ nabé gudíʼdibe ra nagana pur ca xhamígube. Laacaʼ bicaacaʼ laabe maʼ qué chuláʼdxibe gúnibe ni na Jiobá, ne bixélebe de laa. Peru ca dxipeʼ cadíʼdibe lu guendanagana que biree videu riʼ. Laabe guniʼbe sicaríʼ: «Cada guuyaʼ videu riʼ riete nisa luaʼ. Bidiéʼ xquíxepeʼ Jiobá pur gucanebe naa órapeʼ caquiiñeʼ ni». Videu que bicaa ni laabe guchaabe modo nabánibe ne laaca gucaneni laabe guidxélabe xhamígube ni dxandíʼ zacané laabe. Óraque nabe: «Rihuinni dxíchica nánnatu xi rizaaca cani nahuiiniʼ». Cani napa xiiñiʼ, xiñee qué guibiguetaʼ gúʼyatu videu ca ora gúʼndanetu binnilídxitu sti biaje yaʼ. Guiluxe si cada ndaa stiʼ videu ca lagucueezadxí ni para guiniʼtu de ni bieeteʼ luni ne sin guituí lutu gúʼyatu xi na ca guendarinabadiidxaʼ zeeda raríʼ.
2 Ra ruzulú ni. Tuu nga ni dxandíʼ xhamígunu (Pro. 18:24).
3 Ni zanda gucueeza tuuxa de gapa xhamigu. Ximodo zanda guʼnuʼ para cadi guiníʼ íqueluʼ guirutiʼ riuulaʼdxiʼ gaca xhamigu lii (Fili. 2:4). Xiñee naquiiñeʼ quixhe íqueluʼ guchaaluʼ modo nácaluʼ, ne tu laa zanda gacané lii guʼnuʼ ni. Xi zanda gacané lii para gápaluʼ jma xhamíguluʼ, ne paraa zadxélaluʼ laacabe (2 Cor. 6:13).
4 Gaca xhamígunu Dios. Ximodo zanda guidxíñaluʼ jma gaxha de Jiobá, ne xi zabeenduluʼ pa gúniluʼ ni (Sal 34:8). Tuu nga cani jma zacané lii para chuʼluʼ gaxha de Dios.
5 Cani cadi naquiiñeʼ gaca xhamíguluʼ. Tuu nga cani cadi naquiiñeʼ gaca xhamíguluʼ (1 Cor. 15:33). Cani cadi naquiiñeʼ gaca xhamíguluʼ, ximodo zanda guxhélecabe lii de Dios yaʼ. Xi riziidiluʼ de historia stiʼ Dina (Gén. 34:1, 2, 7, 19).
6 Ni bizaaca tiempu riʼ. Ra guyuu Tara stubi, ximodo bininá ni laabe yaʼ. Xi pur nabe gúpabe xhamígube ni qué runi ni ná Dios. Xi guendanagana bilá ñapa tara. Xiñee qué nudii bixhózebe ne jñaabe cuenta de guendanagana ni bilá ñápabe que yaʼ, ne ximodo gucané bixhózebe ne jñaabe laabe para gunda bibiguetaʼ bíʼnibe ni ná Dios. Ximodo bisihuinni ti precursora dxandíʼ xhamígabe Tara. Laanu ca xpinni Cristu, xiñee naquiiñeʼ gúninu ni na Proverbios 13:20 ne Jeremías 17:9. Xi biziidiʼ Tara pur ni bizaaca.
7 Ra biluxe ni. Xi biziidiluʼ de videu riʼ. Ximodo zanda iquiiñeluʼ ni para gacaneluʼ sti binni (Sal. 71:17).