Cani racané chuʼ fe stinu naguidxi
1 Biaba si espíritu santu luguiáʼ ca discípulo stiʼ Jesucristu, bizulucaʼ guníʼnecaʼ binni de guendanandxóʼ ni biʼniʼ Dios. Ora binadiaga ca binni que ni lu diidxaʼ gulenecaʼ la? bidxagayaacaʼ (Hech. 2:11). Zacaca racaláʼdxidu guni sentirtu ora guzulú guiuundaʼ folletu Xi canabaʼ Dios lii guʼnuʼ ne libru Biʼniʼ adorar tobi lucha Dios ni dxandíʼ ra nuu Grupu ni Ruundaʼ Libru stiʼ ca Binni Ridagulisaa.
2 Lu enero 2007 zuzulú ca binni riníʼ maya, tsotsil ne diidxazá stiʼ istmo gúʼndacaʼ libru ne folletu ni maʼ biree lu stiidxacaʼ (biluíʼ xii nga cani chiguiuundaʼ ne padxí). Xi zanda gúninu para gacané cani laanu yaʼ. Dede ante naquiiñeʼ guʼndaʼ chaahuiʼ binnigola ni rusiidiʼ ra riuundaʼ libru cani ra lidxi, zaqueca naquiiñeʼ guni ca binni ridagulisaa. Zacá zaguidxi fe stinu ne zúninu ni na Jiobá de guidubi ladxidoʼno. Binnigola ni rusiidiʼ ra riuundaʼ libru ca qué gápadibe xidé guiniʼbe stale ne cadi gutálepebe diidxaʼ ti guluiʼbe ximodo naquiiñeʼ guni xcaadxi ni.
3 Xi canabaʼ Dios lii guʼnuʼ. Ora guiuundaʼ folletu riʼ ra nuu Grupu ni Ruundaʼ Libru stiʼ ca Binni Ridagulisaa la? zánnanu xi zeeda luni ti ganda gúʼndanenu ni binni neza ra rucheechenu diidxaʼ. Folletu riʼ nápani 32 yaza ne de color ni, ne gúcani para gacaneni laanu gusíʼdinu binni cani jma risaca zeeda lu Biblia. Qué gápadini diidxaʼ nagana ne cadi cutáledini diidxaʼ para gusiéneni xi canabaʼ Dios laanu. Nga runi, qué zaca diʼ nagana para laanu guiénenu ni cá luni.
4 Ora gúʼndanu libru Biʼniʼ adorar tobi lucha Dios ni dxandíʼ zacaneni laanu guidxíñanu Jiobá. Laaca zacaneni laanu gánnanu ximodo gábinu binni guidagulisaané laanu para guni adorarnu Jiobá (Sal. 95:6; Sant. 4:8). Biaʼ galaa de ca capítulo stini cá caadxi guendarinabadiidxaʼ ni naquiiñeʼ guicábinu ne naquiiñeʼ guiníʼ íquenu xi nácani. Casi lu yaza 48 ne 49 cá caadxi de laacani. Bíʼchinu ni guʼndaʼ libru ca la? cadi caquiiñepeʼ gúʼndabe ca guendarinabadiidxaʼ ca ora maʼ cayuundabe párrafo ra cá cani. Ora maʼ guiuundaʼ cani la? Binnigola ni rusiidiʼ ra riuundaʼ libru ca zábibe cani cucaadiaga guxheleʼ ca textu ni cá lú ca guendarinabadiidxaʼ ca ne guiníʼcabe ni biénecabe. Pa gudii tiempu la? zanda gúʼyacabe guiráʼ cani.
5 Pa chuunu guenaridagulisaa riʼ la? zacaneni laanu iguidxi fe stinu, ne jma zannaxhiinu ca bíʼchinu ne ca bizáʼnanu. Laaca zánnanu xi zeeda lu ca folletu ne ca libru ni caree lu diidxaʼ ni riníʼ binni ni nabeza ladu ra rucheechenu diidxaʼ.