Gúninu casi biʼniʼ Cristu ora gucheechenu diidxaʼ
1 Jesús nga ti ejemplu ni naquiiñeʼ chinándanu ora gucheechenu diidxaʼ. Bisihuínnibe stale tiru ne de stale modo pabiáʼ nadxiibe Dios ne nadxiibe binni. Bisiidibe cani nachaʼhuiʼ de Stiidxaʼ Dios, ne gucanebe ca binni huará ne cani gupa yuubaʼ (Mat. 9:35).
2 Ejemplu stiʼ Jesús ne ca ni bisiidiʼ. Jesús qué ñuu diʼ lu política ne qué nicapeʼ íquebe nudiibe ca pobre ni caquiiñecaʼ. Laaca qué ninádibe ñúnibe xiixa ni ñacané binni ti tiempu si, sínuque jma bisisácabe dxiiñaʼ stiʼ Dios que xcaadxi dxiiñaʼ (Luc. 8:1). Ni jma gucuá ique Jesús nga gucheeche ca diidxaʼ stiʼ Reinu stiʼ Dios, purtiʼ nánnabe laa si ni nga zabee guiráʼ ca guendanagana ni napa binni guidxilayú. Nabé risaca dxiiñaʼ gucuaabe ca, peru qué ñápadibe stale tiempu para ñúnibe ni. Ora ca binni de Capernaum gucaláʼdxicaʼ ñaanané Jesús laacaʼ la? gúdxibe ca discípulo stibe: «Chuu ca xcaadxi guidxi huiini [...] para güe stiidxaʼ Dios, purti para nga nga zendaʼ» (Mar. 1:38).
3 Bisiidiʼ si Jesús ca discípulo stiʼ, biseendabe laacaʼ chigucheechecaʼ diidxaʼ ne gúdxibe laacaʼ xi naquiiñeʼ gúnicaʼ: «Ora maʼ zigucheechetu diidxaʼ la? laguiní sicaríʼ: ma zeda dxiña dxi guni mandar Dios» (Mat. 10:7). Laabe bisiidibe ca discípulo stibe naquiiñeʼ cuaquiʼ íquecaʼ gúnicaʼ primé ni na Reinu stiʼ Dios lu xquendanabánicaʼ (Mat. 6:33, NM). Ante cheʼ Jesús guibáʼ guníʼ caadxi diidxaʼ ni bisihuinni xi naquiiñeʼ guni ca discípulo stiʼ. Gúdxibe laaca: «Nga runi, laché irá xixé guidxi, lachiusiidi irá binni sa nanda naa» (Mat. 28:19).
4 Reinu stiʼ Dios nga ni jma risaca. Tema ni jma guniné Jesús binni nga de Reinu stiʼ Dios, ne gunábabe ca discípulo stibe gúnicaʼ casi modo bíʼnibe. Neca binni guidxilayú cuyubi modo ganda cuee ca guendanagana ni napa binni, peru qué ganda gúnicaʼ ni (Jer. 10:23). Reinu si stiʼ Dios nga zusisaca lá Jiobá ne qué ziuu dxi zusaanani de gacaneni binni guidxilayú (Mat. 6:9, 10). Nga runi, pa gusíʼdinu ca binni ni cacaalaʼdxiʼ ne cayacaná pur guiráʼ ca guendaquéiquiiñeʼ ni cayaca lu Guidxilayú riʼ de Reinu stiʼ Dios la? zabánicaʼ nayecheʼ ne zuni crecaʼ zaca guiráʼ ni chiguni Jiobá (Eze. 9:4).
5 Ca dxi stinu riʼ, Jesús cayuuyaʼ guireeche ca diidxaʼ nacubi ne galán stiʼ Reinu stiʼ Dios, ne guniʼbe zacanebe laanu gúninu ni (Mat. 28:20). Ñee rucheechenu diidxaʼ cásica modo biʼniʼ Jesús ni la? (1 Ped. 2:21.) Lu ca últimu dxi riʼ, naquiiñeʼ gucheechenu diidxaʼ biaʼ gándatiʼ ti zacá gusihuínninu zinándanu ejemplu stiʼ Jesús.