Xcaadxi huiiniʼ si maʼ qué ziuuruʼ binni pobre
1 Jesús bisihuinni nabé bizaalaʼdxiʼ binni pobre. Dxandíʼ, bisiándabe binni huará ne gucanebe laacaʼ lu xcaadxi cosa, peru jma bizaaláʼdxibe «[g]una diaga ca pobre stiidxaʼ Dios» (Mat. 11:5). Zacaca rúninu yanna riʼ, dxiiñaʼ de gucheechenu diidxaʼ laaca racaneni ca binni pobre ne zaqueca xcaadxi binni (Mat. 24:14; 28:19, 20).
2 Maʼ qué ziuuruʼ binni pobre. Nuu binni pobre rudii de guidubi ladxidóʼ ni napa para ca yuʼduʼ ca, purtiʼ ca xaíque stícani rabi laacabe zabánicabe jma galán pa gúnicabe ni. Peru Reinu si stiʼ Dios nga zabee guendapobre ne guiráʼ guendanagana ni napa binni. Zacá na Biblia (Sal. 9:18; 145:16; Isa. 65:21-23). Nga runi, ora rusíʼdinu binni xipeʼ nga ni rusiidiʼ Biblia, racanenu laacaʼ gánnacaʼ zaree cani ne rusíʼdinu laacaʼ gánnacaʼ jma de Dios (Mat. 5:3).
3 Ca fariseu ni bibani ca dxi stiʼ Jesús, qué liica ñaba ca binni pobre que laacaʼ dede gúdxicabe ca binni que ‛am ha·ʼá·rets («binni guidxilayú»). Peru sicarupeʼ modo biiyaʼ Jesús rini, o xquendanabani, ca binni pobre que (Sal. 72:13, 14). Zanda gúninu casi biʼniʼ Jesús pa gácanu nachaʼhuiʼ ne guiénenu ca binni pobre (Pro. 14:31). Cadi liica tiidiʼ ndaaniʼ íquenu gúninu menu ca binni ni nabeza ca lugar jma pobre o gusaanaʼ de gucheechenu diidxaʼ ra nuucaʼ. Purtiʼ stale de ca binni riʼ caziidicaʼ de Jiobá ne cayúnicaʼ ni nabe.
4 Modo cayacanenu binni tiempu riʼ. Ora tuuxa guiziidiʼ cani cá lu Stiidxaʼ Dios la? riziidiʼ xi naquiiñeʼ guni para cadi guninapeʼ guendapobre laa. Ximodo yaʼ. Biblia rusiidiʼ cadi xhudxi binni, cadi guni apostar, cadi gaca nachaabaʼ, cadi cubaʼ gueza ne xcaadxi cosa ni rúnicabe para guníticabe bueltu (Pro. 6:10, 11; 23:21; 2 Cor. 7:1; Efe. 5:5). Ni rucaa Stiidxaʼ Dios binni nga cadi cuanaʼ ne guni dxiiñaʼ nadipaʼ purtiʼ nga zusisaca laa (Col. 3:22, 23; Heb. 13:18). Ora gunabadiidxaʼ caadxi binni xi jma riuulaʼdxiʼ ti patrón ora guyubi tuuxa guni ti dxiiñaʼ stiʼ la? nacaʼ riuuláʼdxicaʼ binni ni qué ribaʼnaʼ ne ni qué rusiguii.
5 Jiobá racaná ora guʼyaʼ cadiʼdiʼ ca binni pobre ca lu guendanagana. Nga runi, maʼ cadi candaa diʼ Xiiñibe Jesucristu zulá ca binni pobre ni canabaʼ gacanécabe laa (Sal. 72:12). Laanu zanda gacanenu guiráʼ binni, dede ne ca binni jma pobre, guiziidicaʼ xcaadxi huiiniʼ si maʼ qué ziuuruʼ binni pobre casi na Biblia.