Uguʼnu gana cani cayuubaʼ ladxidóʼ
1 Lu guidxilayú riʼ nabé huayapa binni stale yuubaʼ, peru ca dxi stinu riʼ jma cayacanácabe pur laacani, nga runi caquiiñeʼ chuʼ tu gacané laacabe. Pur nga, laanu, cani zinándanu ejemplu stiʼ Rey stinu, Jesucristu, rúninu stipa para guchéndanu «venda cani cayuubaʼ ladxidóʼ» (Isa. 61:1).
2 Modo uguʼnu gana binni. Para ganda uguʼnu gana ca binni ni nuu triste la? galán guininu xi chiguni Dios xcaadxi huiiniʼ si. Zanda gúninu ni ora cadi guinípenu guiráʼ guendaquéiquiiñeʼ cayaca lu guidxilayú riʼ, cani cadi jneza rusiidiʼ stale religión, ne gudiʼnu lugar ganna binni xi cá lu Biblia ne xi chiguni Dios xcaadxi huiiniʼ si para laacaʼ. Peru cadi pur nga maʼ qué zaninu de Armagedón. Coʼ, purtiʼ dxiiñaʼ stinu nga guininu «yanna nga iza culuíʼ Jiobá favor binni, ne [mayaca] guquixe Dios stinu ni cayuni binni». Peru cadi naquiiñeʼ iquiiñenu Armagedón ne guiráʼ ni chigúnini para guchíbinu binni, purtiʼ dxiiñaʼ stinu nga guininu ca diidxaʼ nacubi ne galán stiʼ Reinu stiʼ Dios (Isa. 61:2; Eze. 3:18; Mat. 24:14).
3 De yoo pur yoo. Cadi nagana guidxélanu binni ni nuu triste pur xiixa guendahuará, binni ni guti tuuxa ni nadxii, ni cazaaca xiixa guendaquéiquiiñeʼ o guidxélanu binni qué gapa bueltu. Nga runi, naquiiñeʼ guiubaláʼdxinu ca binni ni rinínenu ora maʼ ziuunu de yoo pur yoo, purtiʼ zacá zúninu cásica biʼniʼ Cristu dxi bia ti gunaa ne bisiándabe laa (Luc. 7:13; Rom. 12:15). Neca gúʼndanenu binni ca ti textu o chupa, naquiiñeʼ gucaadiáganu laa ne gudiʼnu lugar guiníʼ ni cuchiiñaʼ laa (Sant. 1:19). Pa primeru gucaadiáganu laabe la? zánnanu ximodo gacanenu laabe.
4 Ora gúʼyanu zanda la? guininu sicaríʼ: «Ñuuladxeʼ ñuundaniáʼ lii caadxi diidxaʼ zeeda lu Biblia ni zacané lii». Ora gúʼyanu cadi jneza ni caniʼbe, zándaca cadi naquiiñeʼ gábinu laabe cadi jneza modo riníʼ íquebe, purtiʼ ni racaláʼdxinu nga gacanenu ne uguʼnu gana laabe ne Stiidxaʼ Dios. Zanda iquiiñenu cani zeeda lu libru Razonamiento a partir de las Escrituras yaza 144 dede 148, ra na «Guluu gana binni». Laaca zanda gusaananenu binni tratadu ni láʼ Consuelo para los deprimidos ne gúʼndanenu laabe ni zeeda luni.
5 Biyubi pora zanda uguuluʼ gana cani nuu triste. Ñee runibiaʼnu ti binni ni caquiiñeʼ uguucabe gana laa la? zándaca ti binnilídxinu, xpesínunu, ti binni ni runinenu dxiiñaʼ o ni rinenu scuela. Xiñee qué gúninu stipa para chigánnanu laacabe ra lídxicabe ne iquiiñenu Biblia para uguʼnu gana laacabe yaʼ. Pa nánnanu xi naguu laacabe zacá la? zanda gúʼndanu dede ante xiixa de ni cayácacabe ca ti gánnanu xi guininu. Nuu caadxi xpinni Cristu rucaacaʼ carta ra nuu ca binni ca o riníʼnecaʼ laacabe pur teléfono. Intiica modo gúninu para guinínenu binni, cumu nadxiinu laacabe la? nga zucaa laanu guianu binni ne iquiiñenu Stiidxaʼ Dios para uguʼnu gana laacabe (Luc. 10:25-37).
6 Dxiiñaʼ stinu nga gacanenu cani cadxibi, uguʼnu gana cani nuu triste ne guluinu laacaʼ xi zuni Dios xcaadxi huiiniʼ si pur laacaʼ. Nga nga ca diidxaʼ ni caquiiñeʼ guiráʼ xixé binni gunadiaga. Laanu zanda uguʼnu gana binni ne gábinu laacaʼ de guiráʼ ca cosa sicarú ni chiguni Dios pur laacaʼ. Qué chuʼ dxi gusiaandanu galán nga guchéndanu venda cani cayuubaʼ ladxidóʼ.