Ndaa ra rinabadiidxaʼ

◼ Ñee jneza cheʼ ti testigu chigaca tender ndaaniʼ ti hospital o ti lugar ra rápacabe cani nagola neca runineni ti religión dxiiñaʼ la?

Nuu caadxi religión runiné xiixa hospital o lugar ra rápacabe cani nagola dxiiña, peru stale biaje la? cadi rucaadícabe binni gácapeʼ de religión stícabe para guni tendércabe laa (Apo. 18:2, 4). Sínuque, zándaca ca religión ca bicuí cani para guni ganarcaʼ bueltu. Ca dxi stinu riʼ nuu hospital maʼ cadi stiʼ diʼ xiixa religión ni, sínuque maʼ lá si ni nga ruluíʼ nácani stiʼ ti religión, ne nuu xcaadxi lugar la? rúniruʼ cani naca de religión ca dxiiñaʼ ndaaniʼ cani.

Cada Testigu stiʼ Jiobá naquiiñeʼ guʼyaʼ pa zie ti hospital o ti lugar ra rápacabe cani maʼ nagola ni zándaca runiné ti religión dxiiñaʼ. Zándaca nuu tu guiníʼ ique zanda cheʼ ca lugar ca ne nuu tu coʼ (1 Tim. 1:5). Nga runi, nabé jneza guidúʼyanu caadxi cosa ante guiníʼ íquenu xi gúninu.

Zándaca neza ra nabezuʼ maʼ gástiruʼ sti hospital, ne ni nuu si racá nga ti hospital ni ruluíʼ runiné ti religión dxiiñaʼ pur lani. O zándaca nuu stobi peru ni runi tender binni jma galán nga ni ruluíʼ runiné ti religión dxiiñaʼ. Ne zándaca laa si ni nga ni napa ca aparatu ni caquiiñeʼ para guendahuará ni nápanu, o racá si nga nuu doctor ni ruuyaʼ binni huará. Zándaca xiixa hospital ni runiné ti religión dxiiñaʼ zuni respetar ni runi crenu ora guininu qué ricanu rini ne xcaadxi hospital stiʼ gobiernu o stiʼ binni qué zanádicaʼ gúnicaʼ ni racaláʼdxinu. Ndiʼ nga caadxi de ca cosa ni naquiiñeʼ guʼyaʼ ti xpinni Cristu ante cuí xi hospital cheʼ.

Ni quixhe ique cheʼ ti hospital ni runiné ti religión dxiiñaʼ la? zándaca guiníʼ ique caguixe pur ti dxiiñaʼ ni cayúnicabe laa. O zándaca gúʼyabe hospital ca casi ti empresa stiʼ ti religión ne guiníʼ íquebe caguíxebe pur dxiiñaʼ ni cayuni empresa ca pur laabe ne cadi cudiidibe bueltu para religión ni cadi dxandíʼ ca. Ni cayúnisibe nga caguíxebe pur medicina o dxiiñaʼ cayúnicabe laabe.

Pa zacá ni la? xpinni Cristu ca naquiiñeʼ guʼyaʼ cadi guni xiixa ni runi ca binni de religión ca. Laaca cadi jneza diʼ iquiiñebe diidxaʼ casi «Padre» o «Hermana» para guiníʼnebe ca binni de religión runi dxiiñaʼ ra hospital ca o ca binni zigunibiáʼ lugar ca (Mat. 23:9). Pa chebe lugar ca naquiiñeʼ chebe pur guiándabe ne quíxebe pur ngasi.

Ora cheʼ ti xpinni Cristu para guianda ndaaniʼ ca hospital ca, zanda guiniʼbe nácabe testigu stiʼ Jiobá ne guiniʼbe pa zanda gudiicabe lugar chiganna ca binnigola nabeza gaxha de lugar ca laabe. Nga zacané laabe chuʼbe naguidxi lu Stiidxaʼ Dios biaʼ dxi chuʼbe lugar ca (1 Tes. 5:14).

Cani jma naquiiñeʼ uguu gana ti xpinni Cristu ni cheʼ ti lugar ra rápacabe cani nagola ca nga, ca binnilídxibe, ca binnigola ne xcaadxi xpinni Cristu ni ridagulisaanebe, jmaruʼ si pa lugar ca runineni ti religión dxiiñaʼ. Pa chigánnacabe xpinni Cristu ca la? zaguucabe gana laa ne zacanécabe laa para cadi gúnibe xiixa runi religión ca, casi xiixa saa o sti cosa raca lugar ca.

Ne cani maʼ bidúʼyanu ca, cada xpinni Cristu nga naquiiñeʼ guʼyaʼ chaahuiʼ xi guiráʼ runi ca binni de hospital ra nuu guni tendércabe laa o lugar ra rápacabe cani nagola ca ne guiníʼ ique paraa cheʼ (Gál. 6:5).