Gusisácanu Jiobá guiráʼ dxi
1. Xi riuuláʼdxinu gúninu, ne xiñee.
1 Rey David gudixhe ique gusisaca Jiobá, sicaríʼ guniʼbe: «Guiráʼ dxi zusisacaʼ lii [...,] qué ziuu dxi gusaanaʼ de guneʼ ni» (Sal. 145:2, 7, 21). Laanu laaca nápanu stale razón para gusisácanu Jiobá guiráʼ dxi (Sal. 37:10; 145:14, 18; 2 Ped. 3:13).
2. Ximodo zanda gusisácanu Jiobá ndaaniʼ lídxinu guiráʼ dxi.
2 Ndaaniʼ lídxinu. Nápanu stale libru ne revista ni racané laanu guininu stale cosa de Stiidxaʼ Dios ora maʼ cadúʼndanu textu guiráʼ dxi, ora maʼ cayuni Adorarnu Dios ne Binnilídxinu ne ora maʼ cadúʼndanu dede ante ni chiguizíʼdinu ra ridagulisaanu. Stale familia maʼ biaacaʼ gónecaʼ binnilídxicaʼ neca ti biaje si lu ti dxi, nga racané laacabe guiníʼcabe diidxaʼ sin chuʼ tu guni purá laacabe, ne laaca randa rusisácacabe Jiobá. Galán guni bixhoze binni o jñaa pa laapecaʼ nga guzulú guiniʼcaʼ de Jiobá, zacá zacanécabe ca xiiñicabe guiniisi «modo na [Jiobá]» (Efe. 6:4; Deu. 6:5-7).
3. Xi zanda gúninu ora maʼ nuunenu ca xpinni Cristu.
3 Ne ca xpinni Cristu. Ora maʼ cucheechenu diidxaʼ ne ora ridagulisaanu laaca rusisácanu Jiobá ne xcaadxi xpinni Cristu (Pro. 15:30; Fili. 4:8; Heb. 13:15). Cumu guiranu nuunu tobi si purtiʼ nadxiinu Jiobá la? cadi nagana diʼ zaca para laanu guininu pabiáʼ nachaʼhuiʼ Jiobá ne laanu (Sal. 106:1).
4. Paraaruʼ zanda gusisácanu Jiobá.
4 Ne xcaadxi binni. Neca cadi guiráʼ diʼ dxi nga zanda gucheechenu diidxaʼ de yoo pur yoo la? zanda guinínenu binni de Jiobá ne cani naguixhe ique guni, nga quixhedxí ladxidoʼcaʼ. Zanda guinínenu cani runinenu dxiiñaʼ, cani rinenu scuela, o cani nuu gaxha de laanu neca ti ratu si (Sal. 27:14; 1 Ped. 3:15). Casi ni bizaaca ti gunaa xpinni Cristu ora zeʼ lu avión, laabe guniʼbe de Stiidxaʼ Dios ne gunaa ni zuba cueʼbe, guizáʼ gucané ca diidxaʼ que gunaa que dede gudxi laabe paneza lidxi ti ganda guiníʼnebe laa sti biaje. Neca zeʼ dxi jma stale guendanagana nuu ndaaniʼ guidxilayú riʼ, xquidxi Jiobá cadi cusaana de chiné ca «diidxaʼ nacubi ne galán stiʼ xiixa ni jma sicarú» ra nuu binni ni racalaʼdxiʼ gucaadiaga. Ca diidxaʼ ni zinenu riʼ riguixhedxini ladxidóʼ binni ne rucaani laacaʼ gusisácacaʼ Jiobá (Isa. 52:7; Rom. 15:11).
5. Xiñee racaláʼdxinu gusisácanu Jiobá, ne xi zanda cueendunu pa gúninu ni.
5 ¡Guizáʼ riecheʼ Jiobá ora guʼyaʼ cusisaca ca xpinni laa guiráʼ dxi! Cásica ca cosa ni bizaʼbe, laanu laaca zanda gusisácanu Jiobá biaʼ dxi nabáninu, ndaaniʼ lídxinu, lade ca binni ridagulisaa ne ora guinínenu ca binni ni caʼruʼ gunibiáʼ laabe (Sal. 19:1-4).