¡Gucheechenu diidxaʼ ora tiisi!
1. Xi guníʼ Pablu ni naquiiñeʼ gúninu yanna.
1 «Güi lu stiidxa [Dios]. Byuíʼ ni ora tiisi.» (2 Tim. 4:2.) Xiñee nabé risaca gúninu ni na ca diidxaʼ guníʼ apóstol Pablu riʼ. Ximodo zacaneni laanu ne zaqueca xcaadxi binni yaʼ.
2. Xi naquiiñeʼ gúninu ti ganda gucheechenu diidxaʼ ra nuu guiráʼ binni, ne xiñee.
2 Zanda guilá stale binni. Nánnanu nuuruʼ millón de binni lu Guidxilayú riʼ ni qué huayunadiaga ca diidxaʼ nacubi ne galán ni zanda gulá laacaʼ (Rom. 10:13-15; 1 Tim. 4:16). Ne huadúʼyanu nuuruʼ binni ni nayá ladxidóʼ ca lugar ra nabé rucheechenu diidxaʼ. Pa chuunu ralidxi binni gadxé gadxé dxi o gadxé gadxé hora la? jma stale binni zanda guinínenu. Pa gúninu stipa pur guinínenu guiráʼ binni la? qué zuchiiñaʼ xquendabiaaninu laanu ne qué zápanu donda pa guinitilúcabe (Hech. 20:26).
3. Ximodo jma jneza iquiiñenu tiempu ni maʼ guleenu para gucheechenu diidxaʼ.
3 Neca nabé bininácabe ca xpinni Cristu de primé siglu que la? «bichá [caʼ] stiidxa be idubi naca Jerusalén» (Hech. 5:28). Ñee laaca maʼ gudixhe íquenu gucheechenu diidxaʼ cásica bíʼnicabe la? (Hech. 10:42.) Ñee jneza riquiiñenu tiempu ni maʼ guleenu para gucheechenu diidxaʼ la? Ñee rúninu stipa pur guinínenu ca binni ni tiidiʼ ra nuunu pa cabézanu guibiguetaʼ xcaadxi ni rucheeche diidxaʼ ni zigánnacaʼ tuuxa binni sti biaje la?
4. Xiñee jma zatananu pa gucheechenu diidxaʼ ora tiisi.
4 Racaneni laanu gatananu. Cumu mayaca guinitilú guiráʼ ca cosa malu nuu yanna riʼ la? nga runi jma caquiiñeʼ gatananu (1 Tes. 5:1-6). Pa gatigá guininu de ca cosa ni cabézanu guni Reinu stiʼ Dios la? zacaneni laanu para cadi gusidxaga ca cosa nuu lu guidxilayú riʼ laanu (Luc. 21:34-36). Ne pa qué gusiáʼndanu dxi stiʼ Jiobá la? zaguu nga gana laanu para gucheechenu diidxaʼ ti gacanenu guilá jma binni (2 Ped. 3:11, 12).
5. Xiñee jma zucheechenu diidxaʼ pa rusisácanu xquendanabani binni.
5 Pa gucheechenu diidxaʼ ora tiisi la? zusihuínninu rusisácanu xquendanabani binni cásica rusisaca Jiobá ni, laabe «cabeza be inaba irá binni perdón laabe, purti qué racalaʼdxi be initilú nin tobi» (2 Ped. 3:9; Eze. 33:11). ¡Quixe íquenu guinínenu guiráʼ binni ni nuu neza ra rucheechenu diidxaʼ, para gusisácanu Jiobá! (Sal. 109:30.)