Biʼniʼ dede biaʼ gándatiʼ para gacaneluʼ binni ni cayuundaneluʼ
1. Xi naquiiñeʼ gúninu para ganda gacanenu cani cayúʼndanenu Biblia.
1 Para ganda gacanenu ti binni ni cayúʼndanenu Biblia dede chúʼnisa la? cadi naquiiñeʼ si gúʼndanenu laabe guiráʼ semana, sínuque caquiiñeruʼ gúninu xcaadxi cosa. Apóstol Pablu gunnaxhii ca binni ni nacubi guca discípulo que cásica rannaxhii ti gunaa ca xiiñiʼ. Ngaca nga laanu, pa racaláʼdxinu gacanenu ca binni ni cayúʼndanenu la? naquiiñeʼ cueenu tiempu, gúninu stipa dede biaʼ gándatiʼ ne gúninu ni de guidubi ladxidoʼno, zacá nga casi ora «nudíʼ [nu] [...] xpida pe [nu]» laacabe (1 Tes. 2:7-9).
2. Xiñee naquiiñeʼ guizaaláʼdxinu binni ni cayúʼndanenu, ne ximodo zanda gúninu ni.
2 Guizaaláʼdxinu laacabe. Ora binni ni cayúʼndanenu ca maʼ guzulú guni cani caziidiʼ la? xquendabiaanibe zucaa laabe guixélebe de ca binni ni cadi zinanda ca conseju stiʼ Biblia (1 Ped. 4:4). Zándaca dede gudxiideche ca binnilídxibe laabe (Mat. 10:34-36). Peru laanu zanda gacanenu laabe para cadi guni sentirbe stúbibe ne para nga naquiiñeʼ gusihuínninu dxandíʼ rizaaláʼdxinu laabe. Ti xpinni Cristu ni maʼ xadxí de naca misioneru guníʼ sicaríʼ: «Cadi guiree guxooñeluʼ cásipeʼ guiluxe gúʼndaneluʼ laabe. Pa ganda la? biaana ra nuube ne guniʼné laabe neca ti ratu». Biiyaʼ xiruʼ zanda guʼnuʼ para gacaneluʼ laabe. Zanda guiníʼneluʼ laabe pur teléfono o chigannuʼ laabe pa huarabe. Laaca galán cuineluʼ laabe ora maʼ cayaca ca guendaridagulisaa ca, ne pa caquiiñeʼ gacaneluʼ laabe ne ca xiiñibe la? biʼniʼ ni pa zanda.
3. Xi zanda gúninu para uguu ca binni ridagulisaa gana binni ni cayúʼndanenu.
3 Laaca zanda gacané ca binni ridagulisaa. Pa canagucheecheluʼ diidxaʼ gaxha de ralidxi binni ni ruundaneluʼ ca la? galán chigannuʼ laabe neca ti ratu ne chineluʼ binni ni canagucheecheneluʼ diidxaʼ ca para gunibiaʼbe laa. Ne ora ganda la? laaca galán guni invitarluʼ xcaadxi de cani rucheeche diidxaʼ, dede ne ca binnigola para chiné lii ora chiguundaneluʼ laabe. Ne ora maʼ bizulú cayuundaneluʼ laabe la? biʼniʼ invitar laabe chebe ca guendaridagulisaa raca ndaaniʼ Yoo stiʼ Reinu. Ora guidxaagabe ca binni ridagulisaa zaguucaʼ gana laabe, ne zanda gueeda gácacaʼ casi binnilídxibe (Mar. 10:29, 30; Heb. 10:24, 25).
4. Xi zuni sentirnu pa gúninu stipa pur gacanenu ca binni ni cayúʼndanenu.
4 Tuuxa ni cayacané ca xiiñiʼ guiniisi lu stiidxaʼ Dios la? nabé riuu nayecheʼ ora guʼyaʼ cayúnicabe ni na Jiobá ne cadi cusaanacabe de sácabe lu neza stibe (3 Juan 4). Ngaca nga guendanayecheʼ zuni sentirnu pa gacanenu cani cayúʼndanenu Biblia dede biaʼ gándatiʼ ne gúninu ni de guidubi ladxidoʼno.