Ñee caquiiñeruʼ guneʼ jma la?
1. Xi zándaca uguu triste ti xpinni Cristu.
1 Ñee huayuu biaje huaníʼ íqueluʼ caquiiñeruʼ gucheecheluʼ diidxaʼ jma la? Zándaca riuuluʼ triste purtiʼ maʼ qué randa ruʼnuʼ biaʼ ñuulaʼdxuʼ, purtiʼ maʼ nagólaluʼ, maʼ huaraluʼ o purtiʼ ruʼnuʼ jma dxiiñaʼ para gudiiluʼ ni caquiiñeʼ binnilídxiluʼ. Guzéʼtenu de ti gunaa xpinni Cristu ni napa chonna xiiñiʼ. Laabe guniʼbe riuubaʼ ladxidoʼbe nuu tiru ora ruuyabe maʼ huaxiéʼ tiempu ne stipa rápabe para gucheechebe diidxaʼ, purtiʼ naquiiñeʼ gúʼyabe familia stibe. Ti binni nuu zacá la? galán guʼyaʼ chaahuiʼ pabiáʼ zanda guni. Ximodo yaʼ.
2. Xi ribeza Jiobá gúninu.
2 Xi ribeza Jiobá gúninu. Guiranu nga ñuuláʼdxinu ñúninu jma lu xhiiñaʼ Jiobá. Peru, naquiiñeʼ gánnanu gadxé nga ni ñuuláʼdxinu ñúninu ne gadxé nga ni zanda gúninu. Neca zacá, galán nga gusihuínninu riuuláʼdxinu gúninu jma lu xhiiñaʼ Dios, ne cadi guiníʼ íquenu maʼ qué zándaruʼ gúninu jma. Cadi guiaandaʼ laanu nanna Jiobá pabiaʼtiʼ nga zanda gúninu; laabe qué rinábabe laanu xiixa ni qué zanda gúninu (Sal. 103:13, 14). Yanna, xi rinábabe laanu yaʼ. Gúninu xhiiñabe de guidubi ladxidoʼno, gudiʼnu laabe ni jma risaca nápanu (Col. 3:23).
3. Xi caquiiñeʼ gúninu para gánnanu pa zanda gúninu jma lu xhiiñaʼ Reinu.
3 Ximodo gánnanu pabiaʼtiʼ zanda gúninu yaʼ. Ra guinábanu Jiobá gacané laanu guidúʼyanu pabiáʼ zanda gúninu pur modo nabáninu (Sal. 26:2). Laaca zanda guinábanu ti xhamígunu ni naca xpinni Cristu, ni maʼ xadxí de cayuni ni na Dios, para gabi laanu ximódopeʼ nga jma jneza naquiiñeʼ gúninu xiixa cosa (Pro. 27:9). Ne cadi guiaandaʼ lii ruchaa modo nabani binni ra zidiʼdiʼ tiempu. Nga runi, galán gúninu pa gatigá guidúʼyanu ximodo nuunu (Efe. 5:10).
4. Ximodo naquiiñeʼ guidúʼyanu cani rusietenalaʼdxiʼ Biblia laanu ora ruzeeteʼ naquiiñeʼ gucheechenu diidxaʼ.
4 Ximodo guidúʼyanu cani rusietenaláʼdxicabe laanu. Ñee huayuuyaluʼ xi runi binni ora ziguuyaʼ tuuxa ni cuxooñeʼ lu ti carrera la? Cadi dxandíʼ rucaacabe ridxi laabe para guxooñebe jma la? Rúnicabe zacá ti cúʼcabe gana laabe para guni ganarbe, ne cadi para gusihuínnicabe pur gana si cuxooñebe. Ngaca nga ni runi ca guendaridagulisaa ne ca guiʼchiʼ ni rudii xquidxi Dios laanu. Laacani rusietenalaʼdxiʼ cani laanu naquiiñeʼ gucheechenu diidxaʼ guiráʼ ora casi na Biblia. Ne rábicani laanu zacá para uguu cani gana laanu, cadi para gábicani laanu huaxieʼpeʼ nga biaʼ cayúninu (2 Tim. 4:2). Nga runi, pa gúninu biaʼ gándatiʼ lu xhiiñaʼ Reinu la? zanda guininu qué zusiaandaʼ Jiobá guendanachaʼhuiʼ ne guendarannaxhii stinu (Heb. 6:10).