Laguzaaniʼ «casi biaani»
1. Xi ndaayaʼ naroʼbaʼ nápanu.
1 Nabé sicarú rihuinni biaaniʼ stiʼ Gubidxa ne rusisácani Jiobá dede siadóʼ hasta huadxí. Peru cadi biaaniʼ diʼ ni bizéʼtenu ca nga cayabi Jesús ca discípulo stiʼ gápacaʼ, sínuque «biaani ni rudii enda nabani» (Juan 8:12). Ti ndaayaʼ naroʼbaʼ nga gápanu biaaniʼ stiʼ Dios peru laaca naquiiñeʼ gúninu xiixa. Xi laani yaʼ. Jesús bicabi: «Lagaca casi biaani [...] ti guʼya binni», ni na textu ca nga galán iquiiñenu biaaniʼ ca para gacanenu xcaadxi binni (Mat. 5:16). Yanna nga jma naquiiñeʼ gúninu ni, purtiʼ casi ñaca nabani binni lu ti gueelacahui ne caquiiñeʼ gunibiaʼcaʼ Dios. Xi naquiiñeʼ gúninu para gueeda gácanu ti biaaniʼ cásica guca Cristu yaʼ.
2. Ximodo bisihuinni Jesús risaca gápanu biaaniʼ stiʼ Dios.
2 Gucheechenu diidxaʼ. Jesús biquiiñeʼ tiempu stiʼ, stipa stiʼ, ne guiráʼ ni napa para bisiidiʼ binni de stiidxaʼ Dios ralídxicaʼ, luguiaa, lu dani... ratiica nuube. Jesús nannadxichi xi guiráʼ ndaayaʼ ricaa binni ora gunibiáʼ Dios, purtiʼ ora guiziidicaʼ de stiidxabe casi ñaca nicaacaʼ biaaniʼ ni cudiibe (Juan 12:46). Ne para ganda gacanécabe guicaa jma binni ni la? bisiidibe ca discípulo stibe gácacaʼ casi biaaniʼ (Mat. 5:14). Dxandipeʼ bizaanicabe purtiʼ gucanécabe binni ne bisiidicabe laacaʼ de stiidxaʼ Dios.
3. Ximodo zanda gusihuínninu rusisácanu stiidxaʼ Dios ni zeeda gaca casi ti biaaniʼ.
3 Ca dxi stinu riʼ, nabé rusisaca ca xpinni Dios dxiiñaʼ ni nápacaʼ de sacaʼ «casi naquiiñe sa cani ma nuu ra nayaʼniʼ», nga runi riniʼnécabe binni de stiidxaʼ Dios ratiica nuucabe (Efe. 5:8). Nuu biaje ni caquiiñeʼ si gúninu nga gúʼndanu Biblia o intiica de ca libru ne revista ni nápanu nezalú binni ora maʼ caziiláʼdxinu ra cayúninu dxiiñaʼ o ra scuela. Zacá biʼniʼ ti dxaapahuiiniʼ xpinni Cristu para bizulú biindané ti binni de Biblia ne bisaananebe caadxi libru doce de ca xcompañérube ni rinebe scuela.
4. Xiñee caquiiñeʼ gaca xpiaʼnu galán para ganda gueeda gácanu casi ti biaaniʼ.
4 Gúninu ni jneza. Para ganda gueeda gácanu casi ti biaaniʼ la? laaca naquiiñeʼ gaca xpiaʼnu galán (Efe. 5:9). Pa galán xpiaʼnu ra rúninu dxiiñaʼ, ra scuela ne ratiica nuunu la? zudii binni cuenta xpinni Cristu laanu ne qué zaca nagana para laanu guinínenu laacabe de lu Biblia (1 Ped. 2:12). Zacá bizaaca ti xcuidi huiiniʼ de gaayuʼ iza, pur galán xpiaʼbe biseendacaa maestra stibe jñaabe ne bixhózebe. Maestra que gudxi laacaʼ: «¡Qué huayuu dxi gunebiaʼyaʼ ti xcuidi huiiniʼ ni nanna gunáʼ nga ni jneza ne ni cadi jneza!». Dxandíʼ, ora gucheechenu diidxaʼ ne ora galán xpiaʼnu racanenu chuulaʼdxiʼ binni guidxiña ranuu «biaani ni rudii enda nabani» ne gusisácacaʼ Dios.